Read Ninia Yali WAHYU 22 Bible Online

WAHYU 22 - Ninia Yali bible

WAHYU 22

¹ Ai hauihikdeg, wereg ma, at malaikat anyo en eke nil howag ulug unug-nutuk kwit, at Allah inim, at Domba omalik inim, ap homi fahat-enesugmu takhta apma etano en, ik eleruk on ap homi enoluk apdoho enepuk on anyo, ik il wirik on inapumag hag, wilibik waharuk mu, unug-nitsi mu hauihik.

² Ik anyo wilibik watlug, o kota kwe yaho welatsi anyo bulkwe lauk kwit, ik aeg fomat-fomat e ap homi enoluk enepuk on yaho ma, bigalem eke fam anggen yihikeg, bigalem eke fam anggen yihikeg, dil, anggen nesanggoenam yihiruk mu hauihik. Ne, e enggela anyo it ap homi di obam su obam wereg on anyo fanoapdoho hiling-enebukwag ulug wereg ma hauihik.

³ Di angge su angge hururungdoho fesebag ma, siag welatsi anyo o kota anyo welaruhu fug ulug hauihik. Ne, Allah inim, at Domba omalik inim, ap homi fahat-enesugmu takhta anyo o etano wereg kweleg, at Allah amingming angge en at mot-deheg neg duruk kamuhup ulug hauihik.

⁴At mot-duruk kwit, iren at orohole fu debeheg, ne, Allah omaliki ulug, unuk it enelahama lisu bale feheg, duhup ulug hauihik.

⁵ O etma Nenakni Allah en selehap enepuk karuhu angge re, o hup atlug, mum aheg, duk fug angge, o nukoho neg wereg kweleg, ap homi en, o seleg dukwag ulug eral fisareheg, “Mo yarik walep aho,” ulug, beheg, duk fug angge wereg lit, it ap enunuk bogdeg hag mundoho leho lit, welamuhup ulug hauihik.

⁶Airoho ulug hauihikdeg, at wene hweag-nutuk katsi anyo en ekenim hweag-nutuk kwit, “Allah wene hweag-esauk enap nabi anyo Allah wene hweag-esauk kamag ulug, Allah Aheime enobam aik waharuk katsi on Nenakni Allah anyo en, horog ketia duhu ale anyo, at amingming angge enelukdoho unug-esowag ulug ayonggo malaikat eke mondorik waha. Ne, wene hweag-hutuk mu holehen su, mundoho dip-uhu en neg wereg ma, demdoho boruk kamin.

⁷Yesus en, Nautsi, an folo-folo waikohon lahi, ulug, isi mu, hweag-hirihi. Ne, an wene hweag-hutuk kweleg, buku lisu balehen anyo mundoho, ap homi en furebelug, furoho duruk halug, Allah ahayeg enobam fohu,” ulug, hweag-nutuk mu holdihik.

⁸Wene duhu ale nesanggo holeheg, nil heheg, duruk katihik anyo, an Yohanes neg deg ma, nesanggo holeheg, nil heheg, debelug, fobik duhu ale unug-nutuk katsi on malaikat anyo mot-dimin ulug, apma sebe irihik men,

⁹aren hweag-nutuk kwit, “Airoho duk fug! Hit hori Allah wene hweag-esauk enap nabi anyo inim, it buku lisu balehen su furebelug furoho duruk kamuhup on anyo inim, hat inim, an hit hag Allah amingming angge welahi mu, an mot-nabuk fug. Allah apma sebe ulug, at neg mot-duruk kamin,” ulug, hweag-nitsi.

¹⁰Hweag-nitsireg, “Hweag-hutuk kweleg, duhu ale buku lisu balehen su dip-uhu sali horog aik wahasi mu, hendama neg heraho welam fug. Ite, ap homi enoluk amag ulug, fag-duruk kamin.

¹¹ Fag-duruk men, it ap homi siag duruk on, siag neg deheg, ap homi foman duruk eleg on famen, it foman enendan siag hesangge dul boruk on, enendan siag hesangge dil laheg, duruk kamag. Ne, it foman siag duk fug angge fano neg dul boruk on, fano neg dil laheg, it foman Allah obahet eneko wereg lit, duruk kamul boruk on, Allah obahet eneko welaheg, duruk kamag,” ulug, hweag-nutuk mu holdihik.

¹² Ai en, ekenim hweag-nutuk kwit, “O atam indip hag welatihik inim, fobik onggombi hag welaruhuk inim, an neg welahi angge re, folo-folo waikohon lahi. Folo-folo waharuk kwit, it di ap homi su ap homi duruk katswa ale higitdoho neg enemu domog onggo og-esa waruhuk mu, furebeiyek!” ulug, hweag-nutuk mu holdihik.

¹⁴ Hweag-nutuk mu holdihikdeg, it ap homi en o kota anyo sok husig kwe fanoroho kwik lalug, e enoluk enepuk on anggen nauk kamuhup en, enesum fano ho-dahup halug, enahayeg humon hauk kamuhup famen,

¹⁵it mene hag hesangge dil noruk on inim, it bamo watuk on inim, it homi hesangge hambena enepuk on inim, it enolok en binggi enowatuk on inim, it kembu wire folug, enenda ai fam dipdeg lit dil noruk on inim, it lal-enepuk ale fano beheg, seiale eheg, duruk on inim mundoho neg de o kota kuk fug angge helep fak lehet dag fikit neg welamuhup ulug hauihik.

¹⁶ Airoho hauihikdeg, at Yesus en hweag-nutuk kwit, “Hit an nomaliki di o su o kabogdeg welahep on anyo, fobik duhu ale fagdoho hweag-hesamisi en, nayonggo malaikat eke an Yesus en henekit mondorik wahi. O sekan delag sohwalanggen wap enam atuk anyo hag, unggul unuk Daud on enomba an,” ulug, hweag-nitsi mu,

¹⁷ malaikat anyo en eke hweag-nutuk kwit, “Allah Aheime inim, at Domba omalik ohwe anyo inim en Yesus fam, Ma, uruk. Ne, it ap homi wene su hole folug demdoho boruk on anyo en oho, Ma, ukwag. Ne, ap eke en ik obok duruk halug, ik enoluk enepuk on anyo, Nele e, boruk kwit, we onggoleg na wamag,” ulug, hweag-nutuk mu holdihik.

¹⁸ Ai hweag-nutuk mu holdihikdeg ekenim hweag-nutuk kwit, “Wene duhu ale fagdoho hweag-hutuk kweleg, buku su lisu balduk katihin anyo, ap homi hole folug, ap eke en wene amu ekenim dopnoroho fohu halug, at Allah en anggin-fanggin ap homi enobam fesehu en wereg, ulug, buku su fam bilinggoho baleg wereg anyo, Allah en ap ai obam neg fohu.”

¹⁹Ne, at ap eke en, wene duhu ale fagdoho hweag-hutuk kweleg, buku su lisu balduk katihin anyo foma wauk kwit, foma embesehu halug, buku su fam bilinggoho baleg wereg ale higitdoho at e anggen nowag ulug wereg famen, at Allah en, “Hat e enoluk enepuk on anggen namihin fug,” ulug, hweag-ereheg, o kota kukwag ulug wereg famen, “Hat o kota Allah obahet eneko wereg etmano kwimihin fug,” ulug, hweag-ereheg, duhu ulug wene hweag-nutuk mu holdihik.

²⁰Di wene su wene fagdoho hweag-nutuk on anyo en, “An folo-folo waikohon lahi, ulug, demdoho hweag-hirihi,” ulug, hweag-nitsi. Hweag-nitsi mu, “Tuhan Yesus, folo-folo waharuk kamin,” ulug, “Amin,” irihik.

²¹Tuhan Yesus en, hit Allah omaliki[12] anyo mundoho henelaheg boruk kwit, fahat-henesug lamag. Amin.