Read Ninia Yali WAHYU 3 Bible Online

WAHYU 3 - Ninia Yali bible

WAHYU 3

¹Ekenim hweag-nutuk kwit, “Yesus omaliki o Sardis kabogdeg fahat-enesug on malaikat anyo en it hweag-esowag ulug, lisu bal-itmihin en hweag-hirik. An ap homi eneheime hag Allah en fahat-enesug lamag ulug enebe sabiren wereg on hwal-enebeheg, sohwalanggen sabiren nenggikmu foroho laheg, duruk kahi anyo en nele hweag-hesauk kahi su. Hit Yesus omaliki o Sardis dil noruk kahep anyo noluk. Hit wareg hag wereg kweleg, it ap homi en henebug uruk kwit, Ap enoluk wereg lit, enomamne fam dil lauk hag, Yesus omaliki kabogdeg su, fano dil lauk mu esauk kahe, ulug, uruk ale ai nolukdeg.

²Ai famen, hit dil noruk kahep anyo Allah il hanim mun fano dil lauk mu hesauk kahi fug mu, mun waram hag deg kweleg, foma dot fano duruk kahep ai, omamne apdoho furoho duruk kamag ulug, henoluk atlug, inamek.

³ Hit wene hweag-hesauk kweleg, henesanggo holdil lauk kwit wauhup anyo eberiek. Wene wauhup ai furoho duruk kwit, siag duruk kahep anyo henenda wenggele folug embeseiyek. Henesiag embesouk fug angge henoluk amuhup fug halug, ap yoholi angge wauk on ap homi ebereg eleg ma ling-long herahaik kuruk anyo hag, an o ke salim waruhuk henapelegdeg kweleg, henekit fetagdoho waruhuk.

⁴Airoho famen, hit Sardis on henenggelegma it foma dorangge siag dil lauk fam, enesum singap debousa fug mu, “Siag duruk eleg ma, fano neg wereg isihi,” ulug, enesum mun kuron wan-debeselug, an ninim noruk kamuhuk.

⁵ At ap eke enda hambukdeg lit, di siag su siag sebeloho foruk halug, airoho sum kuron wan-debelug, ap homi enoluk mundoho ninim welamag ulug, enunuk buku fam baleg anyo unuk elehap debehuk fug. Ne, an Nakni inim, at ayonggo boholma noruk on malaikat omano inim, inil hanim, “At su an nomalik,” ulug, unuk fag-duhuk.

⁶At Allah Aheime en Yesus omaliki di o su o kabog-duruk on hweag-esauk anyo, enesanggo holuk alereg halug, furoho holduk kamag, ulug, nele hweag-hirihi su hweag-esowag ulug lisu baliyug,” ulug, hweag-nutuk mu hauihik.

⁷ Ekenim hweag-nutuk kwit, “Yesus omaliki o Filadelfia kabogdeg fahat-enesug on malaikat anyo en it hweag-esowag ulug bal-itmihin en hweag-hirik. Daud en ki anggen foroho welatfag anyo an den foroho lit, sok husuruk kahi mu, ap eke en lare feheg, sok latuk kahi mu, ap eke en huse feheg, duk fug alereg kweleg, an neg foroho lit, nenda wenggeleg fam siag duk fug angge fano neg welaheg, ebe on welaheg, welahi anyo en nele hweag-hesauk kahi su.

⁸Hit Yesus omaliki o Filadelfia dil noruk kahep anyo an noluk. Henomamne maben deg kweleg famen, Yesus nenapeleg, ulug, awea wa fug angge, an nawene demdoho bolug wauhup anyo higitdoho duruk katuhup ai noluk. Furiek! An den sok huse henobaharihik anyo, ap eke en laruk fug alereg.

⁹ It Iblis omaliki en famen, we seiale uruk kwit, Nit Yahudi on, il lauk anyo, henapma sebe uruk kwit, an hit nenda hundig welahi ai enoluk amag ulug, it enebe henekit feseik waruhuk, ulug, demdoho hweag-hisihi.

¹⁰Hit henenda hambuk debelug henemurururoho duruk kamek, ulug, hweag-hesauihik wene wauhupdeg, higitdoho duruk katuhup mu re, an den di ap homi su ap homi o kwenangma suma wereg on mundoho enabut balukwag ulug, anggin-fanggin enobam domog feseik waruhuk anyo salim, hit an nomaliki fanoroho napma fahat-henesug laruhuk.

¹¹An folo-folo waikohon lahi. Hit demdoho bolug wauhup anyo bug-bagdoho foroho welahep halug, ap buroho lauk on along atuk mu kware-kware wan-debeseruk anyo hag onggo og-hesahuk anyo, deluk no ulug, bug-bagdoho foroho nu.

¹² At ap eke enda hambukdeg lit, di siag su siag sebeloho foruk halug, o omamne welamag ulug, fisengge bul belapuk anyo hag, ap ai Allah obam wirigmu airoho unduhuk fohuk mu, fobik etman wilibik lahu fug. An Nakni Allah unuk inim, Allah obam o bumbuk kota Yerusalem keron Nakni Allah boholman belabik waruhu anyo unuk inim, an nonggwareg nunuk ket soaleg anyo inim, obam bale fohuk.

¹³At Allah Aheime en Yesus omaliki di o su o kabogdeg on hweag-esauk anyo, enesanggo holuk alereg halug, furoho holduk kamag, ulug, nele hweag-hirihi su hweag-esowag ulug lisu baliyug,” ulug, hweag-nutuk mu hauihik.

¹⁴ Ekenim hweag-nutuk kwit, “Yesus omaliki o Laodikia kabogdeg fahat-enesug on malaikat anyo en it hweag-esowag ulug bal-itmihin en hweag-hirik. At Allah en di angge su angge wal-dimin ulug owan boruk kweleg, wal-debag indip[2] an deg ma, Allah nangginoho wereg anyo demdoho dipdoho fag-duruk kahi on, nunuk Amin anyo en nele hweag-hesauk kahi su.

¹⁵Hit Yesus omaliki o Laodikia on dil noruk kahep anyo an noluk. Hit henenda habupdeg eleg, ahanhandeg eleg, we seram hag neg welahep hesauk kahi mu, habupdeg halug fano, ahanhandeg halug fano neg, ulug, we misig neg welalep aho, boruk kahi.

¹⁶Famen de, hit henenda habupdeg eleg, ahanhandeg eleg, we seram hag neg welahep ma, ik unduk seramdeg halug enambilikmen luko embeseruk anyo hag, hit henebe embeseikohon boruk kahi.

¹⁷Hiren uruk kwit, Nit dil lauk kwit, nenenggik mundoho wereg atsi, eke eleg ma hauk kahe fug, ulug, uruk kahep famen, hit henenggik eleg, hinil bugdeg, henesum eleg angge abienggohouk deg lit, henahayeg mun eleg, henelaheg humon welahep ale furebouk fug angge welahep.

¹⁸Airoho deg lahep ma, diroho duhup en an komo-henebik. Ebe on fam henenggik wereg amag ulug, emas indok amorolengdoho yalegma orohole mun fano buhun aheg, hit henebe henesum eleg angge abienggohouk deg lit, henenggalireg henesa no ulug sum mun kuron wan-dahup en hun-deheg, hinil fenggen atlug fano hauk kamuhup en hinil fam obat ahalue are deberuk on, an nakit neg hun-da waheg, diek, ulug, komo-henebihi.

¹⁹ It ap homi nenda hundig enepuk kahi anyo, siag duruk halug bet-enebeheg, enenda wenggelukwag ulug komoroho enowareheg, duruk kahi mu, henenda ahanhandoho dil lauk kwit, hit henenda wenggele folug, siag duruk kahep anyo embeseiyek.

²⁰An sokolma unduhuk lit, sok fam kweng-duruk kahi anyo furebeiyek. Ap eke en an nele uruk kahi anyo esanggo holdil lauk kwit, sok hut-napuk halug, an akit kuhukdeg, nenenda misig sebereg lit, siburu nauk kamuhuk.

²¹At ap eke enda hambukdeg lit, di siag su siag sebeloho foruk halug, an den di siag su siag sebeloho folug, an Nakni Allah ap homi fahat-enesugmu takhta fam hweriatihik anyo hag, ap ai an ap homi fahat-enesugmu ninim hweriamuhuk en, hweag-uruhuk.

²²At Allah Aheime en Yesus omaliki di o su o kabogdeg on hweag-esauk anyo, enesanggo holuk alereg halug, furoho holduk kamag, ulug, nele hweag-hirihi su hweag-esowag ulug lisu baliyug,” ulug, hweag-nutuk mu hauihik.