Read Ninia Yali WAHYU 4 Bible Online

WAHYU 4 - Ninia Yali bible

WAHYU 4

¹Airoho hweag-nutuk mu na og-hauihikdeg ekenim na og-hauk kwit, o boholma sok eke husig wereg ma hauihik. Ne, etano en bohweap trompet ele hag ap eke ele humon hweag-nutuk mu hauihik anyo, ekenim hweag-nutuk kwit, “Ketia duruk mu hehen anyo debelug, fobik duhu anyo unug-heowag ulug, lahaik ma,” ulug, hweag-nitsi.

² Owan hweag-nutuk kweleg, Allah Aheime nobam atsi mu, o boholma og-naplug lahasi mu ap homi fahat-enesugmu takhta etano ap eke hwerieg wereg ma hauihik.

³At hwerieg wereg anyo orohole re helep weliom on hag baiduri inim, helep mebon delima inim hag hwerieg ma hauihik. Ne, ap homi fahat-enesugmu takhta maseroho uare orohole helep siye youmaruk on hag zamrud hag hauihik.

⁴Ap homi fahat-enesugmu takhta bul wereg kweleg, ap homi fahat-enesugmu takhta 24 en eke maseroho wereg anyo fam, it boholma wereg on enowesi enebe 24 en enunggulmu kware-kware hag mahkota emas fam buhundeg inim, enesum mun kuron inim, wan-debelug hwerieg ma esauihik.

⁵ Ap homi fahat-enesugmu bul etano en oeal lepeng-deheg, ululu sipuk-deheg, duruk kweleg, ap homi fahat-enesugmu takhta alukwe fil lampu sabiren ulog duruk mu hauihik. Lampu sabiren ai Allah Aheime sabiren anyo.

⁶ Ne, ap homi fahat-enesugmu takhta alukwe fil ik sene humon yenggeleg famen, orohole ik il wirik on hag hauihik. Ne, ap homi fahat-enesugmu takhta bul maseroho it enoluk wereg on enebe ohwan enebene alukwe fil ambol fil inil humdoho wilibig mu esauihik.

⁷Enebe ai, eke misig olomene singa orohole hag, ne, eke bireneg on wam sapi yohombuk orohole hag, ne, eke henahaneg on ap orohole hag, ne, eke ohwaneg on suwe ikwesahop darulug noruk on orohole hag wereg ma esauihik.

⁸ Ap homi enapeleg it enoluk wereg on enebe ohwan anyo ai, enemu domog enahwerabul folfaligen, enebene ilonggo fil dag fil inil humdoho wilibig mu, esauihik. It anyo en nukoho, hup anggo bok am fug angge suni uruk kwit, “Atam welatihin, ketia welahen, fobik welaruhun, ue hu, Hat mundoho heitog homamne along humon welahen, ue hu, Nenakni Tuhan Allah, hat neg mun hamu eneg welahen, ue hu, Hat neg mun hamu eneg welahen. Hat neg mun hamu eneg welahen, ue hu,” ulug, suni eheg neg duruk mu esauihik.

⁹Duruk kwit, at mundoho eitog oluk wereg ap homi fahat-enesugmu takhta fam hwerieg anyo unuk leho feheg, anggilug yanderurukmu, dang-deheg, duruk mu, esauihik.

¹⁰It boholma wereg on enowesi enebe 24 anyo en at mundoho eitog oluk wereg takhta fam hwerieg anyo apma sebe ulug, kware-kware mahkota enunggulmu wereg anyo nonggoloho at apma feik waharuk kwit, suni diroho uruk katswa. “Nenakni Tuhan Allah, hat hendan bolug, wae hu, di angge su angge mundoho wal-duhuk, ulug, wal-dirihin men, mundoho wereg atfag ma, ap homi en hat hapma sebe ulug, hat hunuk leho feheg, hanggilug yanderurukmu, duruk kamuhup fano,” ulug, suni uruk kwit, mot-duruk mu esauihik.