Read Ninia Yali WAHYU 5 Bible Online

WAHYU 5 - Ninia Yali bible

WAHYU 5

¹ Ai duruk mu hauihikdeg, ai en eke na og-hauk kwit, buku enggela yaron fomat-fomat lisu baloho hwililipdeg on, ap hesangge en fiselaroho kumu ha no ulug, ahalue sabirenam enehaleroho dopnoreg kweleg, at ap homi fahat-enesugmu takhta fam hwerieg anyo enggik bekit fil foroho wereg ma hauihik.

²Hauihikdeg boholma yonggo mon-enepuk on malaikat along on misig eke en ele humon uruk kwit, “Buku enggela yaron lisu baloho hwililipdeg su, ahalue dopnoreg anyo, fisela-debelug onggwareg kumu ha on sa mel behep?” uruk men,

³it boholma on inim kwenangma on inim, kwenang apma[3] wereg on inim, buku hwililipdeg anyo fisela-debelug kumu ha on eke eleg ma hauihik.

⁴Buku hwililipdeg anyo fisela-deheg, kumu heheg, duk on onggwareg on ap eke hweaharuk eleg en nahummu siag atuk kwit, oba humon yatihik.

⁵ Owan oba yatuk kwit wereg ma, boholma wereg on enowesi omano eke en hweag-nutuk kwit, “Oba yaruk fug. E asimit indipmen laharuk hag, at Daud omba on unggul unuk Yehuda endag-atsi on, ebe olomene hag unuk Singa anyo, aren buku hwililipdeg ahalue sabirenam dopnoreg anyo fiselaroho kumu ha ale fanoreg su furin,” ulug, hweag-nutuk mu hauihik.

⁶ Ne, it boholma on enowesi 24 omano inim, ap homi enepeleg enoluk wereg on enebe ohwan anyo inim, ap homi fahat-enesugmu takhta eta wereg kweleg, domba eke ebe watswa hag famen, olukdeg lit, enenggelegma unduhuk wereg ma hauihik. Domba omaliki ai andimuk sabiren, ne, il sabiren wereg ma hauihik. Il sabiren ai, Allah Aheime sabiren di o su o noruk kamag ulug mondotsi on enebe sabiren anyo.

⁷Ai en, Domba omalik anyo en lasireg, at ap homi fahat-enesugmu takhta fam hwerieg lit, buku hwililipdeg enggik bekit fil foroho welatsi anyo wauk mu hauihik.

⁸ Wasi mu, it ap homi enapeleg enoluk wereg on enebe ohwan anyo inim, it boholma on enowesi enebe 24 omano inim, domba omalik anyo apma sebe ulug, suni ket felaleg on uruk kwit, “Di ap homi su ap homi, ya ya hu, enunggul unuk domog inim, it ap homi enele domog inim, it ap homi enahap domog inim, it ap homi munobam manobam wereg on inim, enesahalimen misigdeg lisoho, Yesus omaliki welamag ulug, hat binggi howatswa ma, hamep fam enonggo baleheg, hakni Allah apma feselug, at obahet neg duruk kamag ulug, imam unduhuk feseheg, ap homi o kwenangma yahainma, fahat-enesug lamag ulug debeseheg, haren neg dirihin ai fam, buku hwilipdeg ahalue fam dopnoreg anyo, oko fisela-dehen ha alereg lahen ma, fano hat honggwareg neg, ya ya hu,” ulug, suni uruk mu holdihik. Ne, it enoluk wereg on enebe ohwan anyo inim, it enowesi 24 omano inim, enemu hu(...)

¹¹ Airoho duruk mu hauihikdeg, ekenim na og-hauk kwit, ap homi fahat-enesugmu takhta anyo inim, enoluk wereg on enebe anyo inim, it boholma on enowesi anyo inim, bul wereg kweleg, it boholma mon-enepuk on malaikat enebe deng-deng angge humdoho wenahauk fug alereg kweleg, maseroho welatswa anyo en

¹²enele humon seberoho suni uruk kwit, “Domba omalik watswa anyo, hu i, di ap homi su ap homi mundoho, at apma neg sebe ik kweheg, di angge su angge mundoho, at hwalduk kamag ulug og-ereheg, henda mundoho wereg lit, di ale su ale mundoho holukdeg, ai, ulug, hweag-ereheg, hat neg homamne humon deg lit, di deheg su deheg duruk karuhun, ulug, eheg, anggilug yanderurukmu, unuk leho feheg, enahayeg obam foruk kwit, mot-deheg, duruk kamuhup fano,” ulug, suni uruk kwit, mot-duswa.

¹³Airoho mot-duswa ma, it boholma wereg inim, kwenangma wereg inim, kwenang apma wereg inim, ik yenggeleg laut ahummu wereg inim, Allah en wal-debag on di angge su angge, di ap homi su ap homi mundoho en enele seberoho suni uruk kwit, “At Nenakni nit ap homi fahat-nenesug lit, hu e, takhta fam hwerieg wereg anyo inim, Allah andomba anyo inim, nenahayeg enobam foruk kwit, mot-enebeheg, enunuk leho feheg, enanggilug yanderurukmu, it neg alongdeg, ulug, enapma sebe eheg, bok am fug angge debeseruk kamuhuk fano,” ulug, suni uswa.

¹⁴Uswa ma, it enoluk wereg on enebe ohwan anyo en, “Demdoho ehesa,” ulug, “Amin,” uruk kweleg, it boholma on enowesi 24 omano en at fahat-enesugmu takhta fam hwerieg wereg anyo inim, at Allah andomba anyo inim enapma sebe ulug, mot-enepuk mu hauihik.