Read Ninia Yali WAHYU 6 Bible Online

WAHYU 6 - Ninia Yali bible

WAHYU 6

¹Ai duruk mu hauihikdeg, at domba omalik anyo en ahalue sabirenam enehaleroho dopnoreg anyo atam on fisela-disi mu, it enoluk wereg on enebe ohwan anyo eke en ele ululu hag uruk kwit, “Ma,” ulug, uruk mu nesanggo holdihikdeg,

² nil fu hauk kweleg, wam kuda orohole mun kuron ambolowag fam ap hwerieg anyo enggikmu sehen foroho lit wahasireg, kware-kware hag mahkota eke og-utswa ma, ap homi sebele fesemin ulug, sebele feseil lasi.

³Ai en, at domba omalik anyo en ahalue sabirenam enehaleroho dopnoreg anyo bireneg on fisela-disi mu, it enoluk wereg on enebe ohwan anyo bireneg on anyo en, “Ma,” ulug, uruk mu nesanggo holdihikdeg nil fu hauk kweleg,

⁴ wam kuda orohole mebon ambolowag fam ap hwerieg anyo wahasi mu, “It ap homi enakol eleg angge enenda hambukdeg lit welam no ulug, ite, it dog apuk kwit, it it wat-wat atuk kamag ulug, debeseil lamihin fano,” ulug, karog yaron og-utlug mondotuk mu hauihik.

⁵ Ai en, domba omalik anyo en ahalue sabirenam enehaleroho dopnoreg anyo henahaneg on fisela-disi mu, it enoluk wereg on enebe ohwan anyo henahaneg on anyo en, “Ma,” ulug, uruk mu holdihikdeg, an nil fu hauk kweleg, wam kuda orohole sing on ambolowag fam ap hwerieg anyo enggikmu anggin wal-hauk angge timbangan foroho wereg ma hauihik.

⁶Ne, ap eke ele uruk hag, it enoluk wereg on enebe ohwan anyo enenggelegman ele eke uruk kwit, “Ap misig yabuk misiham duruk mu, onggo wauk fam misiham nowag ulug gandum hundureheg, ap misig yabuk misiham duruk mu, onggo wauk fam henahanam nowag ulug sowabuk hundureheg, duhup en duhun fano famen, e zaitun ahalue inim, e anggur ahalue inim siahapdoho fouk fug,” ulug, uruk mu holdihik.

⁷Ai en, at domba omalik anyo en ahalue sabirenam enehaleroho dopnoreg anyo ohwaneg on fisela-disi mu, it enoluk wereg on enebe ohwan etano ohwaneg on anyo en, “Ma,” ulug, uruk mu holdihikdeg,

⁸ an nil fu hauk kweleg, wam kuda ap waraikoho ma orohole kise fog uruk hag orohole selon ambolowag fam ap unuk “Waratuk on”[4] hwerieg anyo waharuk kweleg, at eke unuk “Ap waratlug lauk mu” ombolim waharuk mu hauihik. Wahausa ma, hweag-esauk kwit, “Hiren ap homi kwenangma on henahan minggiroho embeseruk kwit, eke neg karog fam enowatil laheg, siburu obok en waramuhup en, siburu obok humon lahaukwag ulug deheg, ouk hil-hil waramag ulug, ouk humon enobam debeseheg, ne, wam maro inim, olomene inim en senggel-enepuk mu waramag ulug, anyo mondorik laheg, dil lauk kamek,” ulug, unduhuk feselug, mon-enepuk mu hauihik.

⁹Ai en, at domba omalik anyo en ahalue sabirenam enehaleroho dopnoreg anyo foap on anyo fisela-disi mu, it ap homi Allah wene demdoho bolug, dipdoho fag-dil lauk mu enowatswa on eneheime omano Allah obahet domba waroho yaldukmu apma etano esauihik.

¹⁰It anyo en enele humon uruk kwit, “Nenakni hunuk bogdeg Tuhan yei! Hat neg siag duk fug angge fano neg deheg, dipdoho neg deheg, duruk kahen ma, it ap homi o kwenangma wereg on en nenowatswa ma, nenemep hililsi anyo ayo wiroho nenunggulmu enowaruk fug angge nunggwenam welaruhun?” ulug, hein og-hausa.

¹¹Hein og-hausa ma, “Eleg. Hit henori Allah amingming angge wereg lit, hinim Allah wene furebelug dil lauk anyo, hit henowatswa hag, it airoho enowaruhup ale owan dip-uruk eleg kweleg, hit ekenim henenda hambukdoho dorangge kel wat-dauk kamuhup,” ulug, enemu domog sum yaron kuron wan-dowag ulug og-esauk mu hauihik.

¹² Ai en, at domba omalik anyo en ahalue sabirenam enehaleroho dopnoreg anyo folfaligen on fisela-disi mu, an nil fu hauk kweleg, o meik humon lang-deheg, fong watuk kwit, enebene sum orohole singon wan-dauk anyo hag, mo orohole mum aheg, ap homi enamep hag bigalem orohole mep aheg,

¹³ o sielu humon firil waharuk kwit, e ara anggen owan wirik atuk eleg on loloho wambil lauk anyo hag, sohwalanggen loloho kwenangma wambeheg,

¹⁴ buku enggela hwililipdoho foruk anyo hag, o bohol singon heale folug hwililip-dil eleg ail laheg, ne, di dom su dom inim, ik yenggeleg bul kwenang hukdeg wereg on pulau mundoho inim, enobalman heneko feik laheg, duruk mu, hauihik.

¹⁵ Ai duruk mu hauihikdeg, it ap homi kwenangma on enowesi enunuk bogdeg raja omano inim, ap mun leho on inim, it ap dog abukoho lit enele melale feseruk on panglima omano inim, it enenggik wereg on inim, it enalong wereg on inim, it enemingming angge hetdeg on inim, wundet angge wereg on inim, di ap homi su ap homi mundoho en, “Allah inim domba omalik inim en enolok nit ap homi nenobam feseik wamuhup salim mundoho enam atsi mu, nit nenoluk welahe ha fug alereg,” ulug, enakol en, “Kema laul?” ulug, owikmu inim, bohwe elekwe inim, herahaik kuruk kwit, at ap homi fahat-enesugmu takhta fam hwerieg wereg anyo inim, at domba omalik inim enolok en nenowaruk no, dom fam inim helep fam inim, “Sebel-nenebik manik,” ulug, uruk mu holdihik.