Read Ninia Yali WAHYU 7 Bible Online

WAHYU 7 - Ninia Yali bible

WAHYU 7

¹ Ai uruk mu holdihikdeg, ekenim na og-hauk kwit, it boholma yonggo mon-enepuk on malaikat enebe ohwan en o kwenangma suma unggutmu indip ohwan etano unduhuk lit, o hol ohwan en o kwenang fam inim, ik yenggeleg laut fene inim, di e su e fam inim, firil wam no ulug, hwalduk mu esauihik.

²Ai hauihikdeg, ap boholma yonggo mon-enepuk on malaikat amu on eke mo wilibik waharukmu etman laharuk kwit, Allah oluk wereg on omaliki enehaleroho debesoukwag ulug eneg angge walug wahasireg, kwenang inim, ik yenggeleg laut inim siahapdoho foukwag ulug, it yonggo mon-enepuk on malaikat enebe ohwan akniap debesesi anyo, ele humon fam hweag-esauk kwit,

³ “Niren Nenakni Allah amingming angge Allah omaliki enegdeg welamag ulug, enelaha fam owan enehaleroho debesouk fug angge wereg kweleg, kwenang inim, ik yenggeleg laut inim, di e su e inim siahapdoho fesouk fug,” ulug, hweag-esauk mu holdihik.

⁴Holdihikdeg, “It ap homi Israel on enunggul unuk enemu hundomog en it Allah omaliki enehalereg on seberoho enebe wenako 144.000 wereg,” ulug, uruk mu holdihik.

⁵“Yehuda on 12.000, Ruben on 12.000, Gad on 12.000,

⁶Asyer on 12.000, Naftali on 12.000, Manasye on 12.000,

⁷Simeon on 12.000, Lewi on 12.000, Isakhar on 12.000,

⁸Zebulon on 12.000, Yusuf on, 12.000, Benyamin on 12.000 enehaleroho fesesi mu wereg,” uruk mu holdihik.

⁹Ai uruk mu holdihikdeg, ekenim na og-hauk kwit, it ap homi munobam manobam wereg on mundoho inim, di ap homi su ap homi enunggul unuk domog inim, it enahap enemu hundomog inim, it enele enemu hundomog inim, enesahalimen misigdeg lisoho enebe humdoho deg ma, aben wenahauk fug alereg kweleg, kabogdeg ma esauihik. It ap homi ai, enesum yaron kuron wan-debelug, lua enggela hag enenggikmu senetlug, ap homi fahat-enesugmu takhta inim, domba omalik inim, enolohotma unduhuk lit,

¹⁰enele humon uruk mu holdihik. Enele uruk kwit, “Ap homi fahat-enesugmu takhta fam hwerieg lahen Nenakni Allah inim, hat domba omalik inim, hiren neg de nenahap wendaroho nenobaharuhup,” ulug, uruk kweleg,

¹¹it boholma yonggo mon-enepuk on malaikat mundoho anyo en ap homi fahat-enesug lit, hweriatukmu anyo inim, it boholma on enowesi enebe 24 omano inim, it enoluk wereg on enebe ohwan anyo inim maseroho welatswa anyo en takhta apma enorohole belaboho sebe ulug, Nenakni Allah mot-duruk mu hauihik.

¹²Mot-duruk kwit, “Demdoho. Nenakni Allah hat neg, nenahayeg boruk kwit, mot-habeheg, hunuk leho hobahakeg, Henda mundoho wereg lit, di ale su ale mundoho holukdeg, ulug, hweag-hereheg, dang-habeheg, hanggilug yanderurukmu, hat hapma neg sebe ik kweheg, Hat neg along humon deg lit, homamne fam di deheg, su deheg, duruk karuhun, ulug, hweag-hereheg, airoho neg mundoho duruk kamuhuk,” ulug, uruk mu holdihik.

¹³Uswa ma, it boholma on enowesi misig eke en an hweag-nutuk kwit, “It ap homi enesum yaron kuron wandeg su, ke on? Ne, it keman wahausa behen?” ulug, hein og-napsi.

¹⁴ Hein og-napsi mu, an den, “Nakni, an napeleg ma, haren neg in,” ulug, hweag-itihik mu, aren an hweag-nutuk kwit, “Ap homi kwenangma anggin-fanggin mun nigon enobam debeseruk kweleg, enenggelegman enahap wendaroho wilibik wahausa on su. Ne, enesum yaron anyo kut amag ulug, iren domba omalik amep fam ho-dausa.

¹⁵Aireg halug, iren takhta olohotma unduhuk wereg lit, at Allah obam wirigmu obahet hupmu hubet duruk kweleg, at ap homi fahat-enesug lit, takhta fam hwerieg wereg Nenakni Allah anyo en siag on enobam am no, ulug, apma mapnu-debeseruk kwit, wereg.

¹⁶ At domba omalik ap homi takhta bulmu hwerieg anyo en, it at andomba fahat-enesug lit, hwal-enebeheg, eneluk mundoho welamag ulug, ik elerukmu nil lowag ulug, hondog-eneplug laheg, duruk karuhu mu, siburu obok enebeheg, ik obok enebeheg, mo olok enobam yareheg, o ahanhan en enahap halet deheg, duruk mu hahup fug. Ne, it oba yatuk halug, enakni Allah en inil obaluk somag-esauk karuhu,” ulug, hweag-nutuk mu holdihik.