Read Ninia Yali WAHYU 8 Bible Online

WAHYU 8 - Ninia Yali bible

WAHYU 8

¹Ai en, at domba omalik anyo en ahalue sabirenam enehaleroho dopnoreg anyo sabiren on fisela-disi mu, boholma etma setengah jam atuk kweleg, enele inim, enaplohok inim, mundoho eleg angge bok welatswa.

²Ai en, it malaikat enebe sabiren Allah olohotma unduhuk wereg anyo bohweap trompet sabiren og-esauk mu hauihik.

³ Ai hauihikdeg, malaikat amu on eke waruk emas fam buhundeg on enggikmu walug, Allah obahet domba waroho yaldukmu inaik wahasi mu, it ap homi Allah demdoho boruk on enele Allah hweag-utuk kweleg, hendali hag amben fano angge unuk kemenyan yalduk men, enele inim amben fano seberoho lahaukwag ulug, kemenyan indok yaldukmu emas fam buhundeg takhta apma wereg anyo fam yalukwag ulug, kemenyan humdoho hwenanggeg og-utuk mu hauihik.

⁴Ne, at malaikat en Allah il hanim kemenyan yalsi mu, hobu amben inim, it ap homi Allah demdoho boruk on enele Allah hweag-utuk on anyo inim, seberoho laharuk mu hauihik.

⁵ Ai en, at malaikat anyo en waruk emas fam buhundeg on anyo walug, kemenyan indok yaldukmu indok alhanman indok anggen oko waruk fam yohware fesireg, kwenangma hililoho hwik-esa wahasi mu, ululu aplohok humon sipuk-deheg, oeal lepeng-heheg, o meik lang-deheg, duruk mu hauihik.

⁶Ai duruk mu hauihikdeg, it malaikat enebe sabiren en trompet sabiren foroho welatswa anyo, trompet ele furul ulug, duruk mu esauihik.

⁷ It malaikat enebe sabiren anyo on eke atam on en trompet ele furisi men, osit lumbiak inim, indok inim, mep inim, anggelegseg debelug, o kwenangma hililoho wambisi mu, kwenang foma minggiroho biren hag embeseruk kweleg, eke neg sepertiga anyo indok nenggeg, di ahan su ahan foma minggiroho sepertiga nenggeg, enggelangge oluk wereg anyo mundoho nenggeg, duruk mu hauihik.

⁸Ai en, it malaikat enebe sabiren anyo on eke bireneg on en trompet ele furisi men, eke dom humon hag indok ambulbul duruk kweleg, ik laut ahummu hwik-esasi mu,

⁹ik yenggeleg anyo foma minggiroho sepertiga anyo mep aheg, di angge su angge ik ahummu noruk on foma minggiroho sepertiga anyo waraheg, ne, kapal ik emberim fene noruk anyo foma minggiroho sepertiga anyo siahap-biahap debeheg, duruk mu hauihik.

¹⁰ Ai en, it malaikat enebe sabiren anyo on eke henahaneg on en trompet ele furisi men, sohwalanggen humon eke eral fisaho hag ulog duruk kwit, boholman belabik wahasireg, ik lauk on inim, ik elerukmu inim, mundoho foma minggiroho sepertiga anyo fam hililoho wambisi.

¹¹ Sohwalanggen ai, unuk de “Asig on” deg ma, ik mundoho foma minggiroho sepertiga anyo unduk asig apdoho fesi mu, ap homi humdoho ik asig on ai nil lauk kwit, waratuk mu esauihik.

¹² Ai en, it malaikat enebe sabiren anyo on eke ohwaneg on en trompet ele furisi men, mo foma minggiroho sepertiga anyo wareheg, bigalem foma minggiroho sepertiga anyo wareheg, sohwalanggen foma minggiroho sepertiga anyo wareheg, disi mu, seleg duruk katsi anyo foma minggiroho mum apdoho foruk kwit, o nukoho foma sepertiga anyo seleg duk fug angge deheg, o hup anggo foma sepertiga anyo seleg duk fug angge deheg, duruk mu hauihik.

¹³Ai hauihikdeg, suwe ikwesahop darulug bohol bik-bul kwe lauk kwit, ele humon ngaruruk kwit, “It malaikat enebe sabiren anyo foma henahan eke en trompet ele furukohoreg ma, it di ap homi su ap homi o kwenangma wereg on enelaheg e! Enelaheg e! Enelaheg e!” ulug, ele ngaril lauk mu holdihik.