Read Ninia Yali WAHYU 9 Bible Online

WAHYU 9 - Ninia Yali bible

WAHYU 9

¹Airoho uruk mu holdihikdeg, it boholma yonggo mon-enepuk on malaikat enebe sabiren anyo eke foap on en bohweap trompet ele furisi mu, eke sohwalanggen boholman kwenangma bule wambik wahasireg wereg ma, hauihik. Ne, hauihikdeg, bohwe ele oholuk mun yatdeg ma sok lareg anyo husukwag ulug, ki anggen[5] og-utuk mu hauihik.

² Ki anggen og-itsi mu, bohwe elma sok husisi men, bohwe elman alalangge baloho indokma yalduk halug hobu laharuk anyo hag, hobu humon lahasi. Bohwe elman hobu humon ai laharuk kwit, mo inim, o kolokwe inim, mum apdoho foruk mu hauihik.

³ Hauihikdeg, hobu enggelegman bulue humdoho wilibik wahausa ma, ebeiyug olok humon anyo en ap homi senggel-enepuk mu, ouk humon enepuk anyo hag debeseil noruk kamag ulug, enomamne apdoho debeseruk mu hauihik.

⁴ Enomamne apdoho debeselug, “Enggelangge inim, o suk angge laharuk anyo inim, di ahan su ahan anyo inim, siahapdoho feseil la fug. Ite, it ap homi Allah omaliki enehaleroho welamag ulug, enelaha fam Allah eneg angge dopnoreg eleg esalug neg de, siahapdoho feseil noruk kamuhup.

⁵Enebe binggi waramag ulug, enowaruk fug. Ite, bigalem foaben enam dauk kweleg, we ouk nenek duruk kamag ulug senggel-enebil noruk kamuhup,” ulug, hweag-esauk mu hauihik. Ne, ebeiyug en ap senggelduk mu, ouk nenek duruk anyo hag, higitdoho neg bulue anyo en ap homi senggel-enebil noruk mu, ap homi ouk nenek dil lauk mu esauihik.

⁶ Bigalem foaben ai enam dauk kweleg, it ap homi en ouk nenek duruk kwit, “Nit lebegdoho warala aho,” ulug, enori en enowarukwag ulug, hweag-esahup famen, Allah en waramuhup ulug enebuhu fug mu, waram fug angge, we enoluk kengge ouk nenek duruk kamuhup.

⁷ Bulue ai, enorohole re, ap enorohole hag, ne, enoruk de, homi enoruk yaron hag, ne, enaeg de, olomene singa enaeg olok hag, ne, enemigmu ap enesing bosie manggen yihig on wandeg hag, ne, enunggulmu re, kware-kware mahkota emas fam buhundeg hag henaho wan-debelug, wereg ma esauihik. Ne, kuda humdoho enombalowag fam ap hweria atlug, dog abukoho lit fik-foukdoho fahat-dauk anyo hag, bulue anyo airoho wereg lit, kuda humdoho en kereta lit-halug buroho dog abik kuruk kwit, eneyog en aplohok duruk anyo hag, bulue anyo darulug lauk kwit, enahwerabul aplohok higitdoho dil noruk mu esauihik.

¹⁰Enahae re, ebeiyug enahae anyo hag olok wereg ma, ap homi senggel-enepuk mu, bigalem foaben ouk nenek duruk kamag ulug, enomamne enahae fam wereg ma esauihik.

¹¹At boholma yonggo mon-enepuk on malaikat bohwe ele oholukmu yatdeg anyo foroho lit wereg ai, it bulue enowe unuk bogdeg fahat-enesug lit wereg. At unuk ai, it ap homi Ibrani enele fam, “Abadon,” eheg, ne, it ap homi Yunani enele fam, “Apolion,” eheg, uruk. (Ne, nit nenele fam de, “Elehapdoho foruk on,” ulug, uruk kahe.)

¹²“Enelaheg,” ulug, henahanam uruk mu holdihik anyo, atam on duruk mu hauihik anyo hweag-hisihi ai famen, fobik on biren eke duruk mu hauihik anyo hweag-hesamin mu, furebeiyek.

¹³ It boholman yonggo mon-enepuk on malaikat enebe sabiren anyo eke folfalik on en bohweap trompet ele furisi men, Allah apma hendali hag amben fano angge unuk kemenyan yaldukmu emas fam buhundeg unggut-unggut kambing andimuk hag ngi-nganogdoho wereg etano en

¹⁴ele eke en at malaikat folfalik on trompet foroho wereg anyo hweag-utuk kwit, “It malaikat enebe ohwan ik humon unuk Efrat aegma sabu hetdeg wereg anyo fisela-enebin,” ulug, hweag-utuk mu, na og-hauk kwit, holdihik.

¹⁵“Fisela-enebin,” ulug, hweag-itsi mu, it malaikat enebe ohwan anyo tahun ai fam inim, bigalem ai fam inim, nukoho ai fam inim, jam ai fam inim, o ai salim higitdoho neg aik lauk halug, fik-foukdoho fesesi anyo, fisela-enepuk mu hauihik.

¹⁶Hauihikdeg, ap eke en, “It ap dog abukoho lit kuda ambolowag fam hwerieg wereg anyo enebe wenako 200 juta wereg,” ulug, hweag-nutuk mu holdihik.

¹⁷Ne, kuda inim, ap enebe kuda ambolowag fam hwerieg wereg anyo inim na og-hauk kwit, esauihik anyo su. Enesing wandeg ai, enorohole re, indok ambulbul duruk mu hag mebon inim, bohol singon hag on inim, sel on inim wandeg ma esauihik. Ne, kuda enunggul ai, olomene singa enunggul hag deg kweleg, enambilikmen indok ambulbul ulog deheg, hobu wilibik waheg, amben siag angge orohole sel on unuk belerang wilibik waheg, duruk mu hauihik.

¹⁸Enambilikmen indok ambulbul inim, hobu inim, amben siag angge belerang inim, henahan anyo wilibik waharuk famen de, it ap homi foma minggiroho biren hag embeseruk kwit, eke neg sepertiga enowatil lauk mu esauihik.

¹⁹It kuda ap homi enowatil lauk kamag ulug, enambilik inim enahae inim enomamne humdeg. Ne, enahae re kisu olok on enunggul hag anyo inim en, ap homi enowatil lauk katswa.

²⁰ Indok ambulbul inim, hobu inim, amben siag angge belerang inim, anyo en ap homi foma enowatil lauk kweleg, it ap homi foma embeseswa ma enoluk wereg on anyo en, “Nit airoho nenowaruk no, Su Allah higitdeg, ulug, inil neseheg, nenele enesanggo holeheg, eneyog kwenangkwe laheg, dil lauk eleg on famen, Allah obalma bosie emas fam inim, perak fam inim, tembaga fam inim, helep fam inim, e fam inim, kembu buhundoho wire folug, mungguat enenuk leho foruk kwit,

²¹nenolok en ap homi binggi enowareheg, bamo wareheg, babi dil laheg, ap enangge herahakeg, duruk kahe anyo mundoho siag,” ulug, enenda wenggele folug, embesouk fano famen, deg kweleg, dil lauk mu esauihik.