Read Ninia Yali RUT 1 Bible Online

RUT 1 - Ninia Yali bible

RUT 1

¹O endam etma it Israel enap enowe raja wereg eleg kweleg de siburu obok humon lahabag. Eta li em de ap eke unuk Elimelekh ai welatfag. At ebere unggul unuk ahutdoho Efrata on fam en, o Betlehem Wilayah Yehuda fam etma welatfag. Famen de siburu obok atfag ai en de, at ebe ohwe Naomi nim ne at omaliki biren angge: Mahlon mel Kilyon mel de o Moab lebag. Lebagdeg de it o etma welatfag. It enebe etma wereg kweleg de,

³at Elimelekh anyo waratfag. Waratfag ma re hwe Naomi nim de at omaliki biren etano nim neg welatfag.

⁴At omaliki biren etano re enohwesi homi Moab on, hwele Rut nim de Naomi nim hwelebag. Tahun num en debelug de,

⁵Naomi omaliki biren etano oho waratfag, ai fam de at Naomi anyo ahun eleg atuk, omaliki etano eleg atuk debag.

⁶Li eke welatfagdeg de Naomi esanggo holduk men de, ap homi Israel on TUHAN en fanoap debesesimu anggen yihig mun ebe on bal-dauk urukmu holfag. Airoho holfagdeg de Naomi eyamal homi biren etano nim de o Moab embeselug laul ulug fik-fouk debag.

⁷It enebe seberoho re o Yehuda fam laul ulug watfag. Waharuk kwit kwe bulmu etman de

⁸Naomi en eyamal homi biren etano fam uruk kwit de, “Hit de henesingasi enobam lakiek. Hiren an ninim ne it waratswa on etano nim fam fano ale nenepuhup eta hagdoho, At TUHAN en oho hit henobam fano ale henobaharuk kamag.

⁹We At TUHAN enda ahayeg en neg hit henahunsi hwelalug welamag ulug hit hinim lomboreg welamuhup on og-hesowag,” ulug hweag-esebag. Airoho hweag-esalug de at Naomi anyo laroho re it hweag-eseheg, enorohole kwe dopdoho dang eseheg debag. Famen de Orpa nim Rut nim etano re oba enele hum fam yatfagdeg,

¹⁰iren Naomi fam uruk kwit de, “Hwei, eleg! Nit de hat hinim seberoho ap homi hat hunggul unuk on wereg ma etma laul,” ulug ebag.

¹¹Ai ebag ma at Naomi en uruk kwit de, “Eleg, nahwelani!” ulug hweag-esebag. “Hit de sombandoho laluhup. Nunggwelug hit an ninim laul? An de ap hit henahunsi[1] amag ulug omaliki oho eke enderihi ha fug alereg oma hwi

¹²Nahwelani henobam somban diek, an de ap hwelauk ale fahet de mun sobal deg lahi anggere. Ne, an den ap hwelauk ale hup su fam hwilihi hareg en omaliki ap angge endag dihi ha man oho re,

¹³hit de omalik eta log atuk nangno hauk kwit welamuhup henenda a? Ai fahetdoho ulug ap amu on hwela fug angge welamuhup etma nunggwelug? Eleg, nahwelani, airoho fug! TUHAN en an unggum og-nuruhumu hiren hahup ale eta fahet de an nahumu oba napuk,” ulug hweag-esebag.

¹⁴Rut nim Orpa nim etano oba mun omamneroho yatfag ma re at Orpa anyo re hwe eyamal hwe anyo fam sombandoho lamin en ulug hweag-utuk kwit de orohole kwe dop-dop dang-debagdeg obam lebag.[2] Famen de at Rut de hwe eyamal hwe anyo fotog halug la fug ale duruk katfag.

¹⁵Airoho duruk katfag ma re Naomi en Rut fam uruk kwit de, “Rut, fu hakin! Hombarik de ap homi at unggul unuk on mel anggembu dewa omano mel fam sombandoho laha angge. Nahaloho hat oho at ombolim hobam lakin!” ulug hweag-etfag.

¹⁶Famen de at Rut en uruk kwit de, “Nisinga haren an hat hobahalug hobam lakin ulug hweag-nutuk eleg! An de nisinga hat hinim lamin. Hat lamihin kwe etma an oho hinim lamin. Hat welatmihin mu etma an oho etma welatmin nenda. Ap homi hat hunggul unuk on etma re an oho nunggul unuk etma on. Allah hwe haren apne wauk kahen on aire an den oho apne wauk katmin.

¹⁷Hat wararuhunmu etma re an oho etman wararuhukmu sal nabuhup. We waratuk on fam en neg de hat inim an ninim nenemu-nenemu amuhuk, ne an den nisinga hat hobahalug lamin halug de we At TUHAN en an nobam unggum al bereloho og-nomag!” ulug ebag.

¹⁸At Naomi en hauk men de hwe Rut anyo re ninim laul ulug ning-ning urukmu hebagdeg de aren ele diroho-suroho eke ebag fug.

¹⁹Airoho debagdeg de it anyo dil-dil de o Betlehem aik watfag. It o etma aik watfagdeg duruk men de, o kota anyo re ap homi enele neg saha-faha ebag. Homi etma on en uruk kwit de, “At aire demdoho hwe Naomi anyo a?” ulug ebag.

²⁰Ai ebag ma at Naomi en uruk kwit de, “An de Naomi ulug wol-napuk eleg ite ‘Mara’[3] iek. An de Mun Omamne wereg on anyo en nobahasimu asig anggoloroho hauk katihikdeg anggere.

²¹An o suman wiliplug lauihik li em de nangge weregdoho lauihik, famen de ketia TUHAN en nenggik abie angge sombandoho og-naplug waha. Ai fahet de hiren an nunuk Naomi re uk fug, an de TUHAN Along Humon wereg on anyo en an nobam unggum anggin-fanggin hum-ham ale nobahasimu anggere!” ulug hweag-esebag.

²²At hwe Naomi anyo o Moab en eyamalhwe Moab on hwe Rut anyo nim sombandoho watfag ale fahet andindil de airoho. It enebe o Betlehem aik watfag on de etma no gandum [4] anggen balduk ale keram indip debag li em watfag.