Read Ninia Yali RUT 2 Bible Online

RUT 2 - Ninia Yali bible

RUT 2

¹Hwe Naomi re at ahun waratfag on Elimelekh anyo on ori eke ap misig welatfag. Ap aire dung ahun wereg ma re unuk wereg ahun welatfag. Unuk de Boas.

² Nukoho misig salim de hwe Rut en de Naomi fam uruk kwit, “Hwe i, an de yabukmu ap en gandum bal-dauk kwit ando belaboho embeseruk on etma kabog-dik lamin en hweag-hutuk kahi. An den boruk kwit de ap en oho ai on dukwag ulug embesoukohoreg boruk kahi,” ulug hweag-etfag. Airoho ebag ma Naomi en uruk kwit de, “Fano neg, nahaloho! Lamihin fano,” ulug hweag-etfag.

³Ai ebag ma re at Rut anyo yabukmu lebagdeg ap homi gandum yihig baldil lauk on etmano enombolim ondoldil lauk katfag. Ne, at lebag ma etma re ebe hun Boas eyabukmu lebag.

⁴We il misig welatlug etano Boas o Betlehem en watfagdeg de ap homi anggen balduk on etmano dang-esebag. Aren uruk kwit de, “We TUHAN hit hininim welamag,” ulug ebag. Ai ebag ma it anggen balduk katfag on etmano en de, “We TUHAN en hat nenakni fanoap hobaharuk kamag,” ebag.

⁵Airoho ebagdeg at Boas en de ap yabuk durukmu inil kahal-enusug wereg on anyo fam hein og-hauk kwit de, “Hwe aire sa?” ulug ebag.

⁶Ma at anyo en onggo uruk kwit de, “Hwe aire unggul unuk Moab ohwe, o Moab en hwe Naomi nim ketia wahausa hwe.

⁷Aren an heng-napuk kwit de ap homi gandum baldil lauk on etma enombolim belaplusa on etma ondoldil lauk katmin fano a, ulug eheikdeg duruk. O hubet en angge at ondolduk men neg de, we horog ketia dia neg o saboma[5] etma kel wat-damin ulug boge feheik,” ulug hweag-etfag.

⁸Airoho ebag ma at Boas en Rut fam uruk kwit de, “Hesanggo dam holin, ap amu on eneyabukmu gandum ondolik la fug. We suma it homi an neyabuk duruk on nim ondolduk kamuk. Iren kwe kema anggen balik lauk ale ai fubi debeselug de it enombolim lakiyug, ne it weregman yatdoho re la fug. Hat ik obok hapuk halug de, ik ap yabuk duruk on etman ikwag fam hwenanggehesa on etman nakiyug. Ne, hat hele ying habuk no ulug de an den it mundoho hweag-isihi,” ulug hweag-etfag.

¹⁰Airoho urukmu holfagdeg at hwe Rut anyo en de, orohole belabeg Boas olohotma sahun ebagdeg ele uruk kwit de, “Nakni, an de hwe bog nohwe deg lahimu, ne nakni haren fubi nobahalug fano mireg ale napuk kahen ale aire nabuk fug on famen napuk kahen.”

¹¹Ai ebag ma Boas en uruk kwit de, “Hat hahun waratsi hulien angge haren heyamal hwe fam di ale su ale deberuk kahen ale etma an mundoho holdihik. Hat o suma ap homi hapeleg on mel welaikoho hakni hisinga mel, hobam indipmu mel embeselug waharihin ale aire an noluk deg.

¹²Hat henda fano en dirihin on etma TUHAN en neg obalma hobaharuk kamag. Haren At TUHAN Allah Israel on anyo fam nalong baleg welamag ulug waharihin mu re, Aren neg hat hwelowag ulug deg on aire hat hwelauk neg karuhun lamag!” ulug hweag-etfag.

¹³Ai ebag ma Rut en onggo uruk kwit de, “An de nakni heyabuk duruk on etma nim higitdeg lahi fugmen de haren mun fano ale neg nobaharuk kahen. Hobabut sako fam nobaharuk kahen on etare nendama nahayeg kwelabe nobaharuk kahen,” ulug hweag-etfag.

¹⁴Ai ebagdeg nauk ale mun horog atfag ma Boas en Rut fam uruk kwit, “Misigmu siburu ahalue fam yuhul heg naul en ma,” ebag ma at Rut oho it anggen balduk on etmano nim seberoho siburu nebag. Boas en gandum lelengag weraho ono oho Rut og-etfag ma Rut mun homoroho nebag. Nebagdeg de nin ando welatfag.

¹⁵Ai en Rut anyo nikangge gandum ondolik lebag. At lebag ma Boas en it anggen bal-enepuk on etmano fam uruk kwit, “Aren lahe gandum hetdeg on etmano ondolduk halug de hinil feiyug. At enggaliapdoho bet duk fug. Keral-keral deg on etma henapenen dotdoho lit-lit heheg de aren ondolukwag ulug belabe feiyug,” ulug hweag-esebag.

¹⁷Hwe Rut anyo gandum omano ondolduk men neg de o hup atfag. Ne, aren gandum owag etmano anggen owag fam en anggen lolukwag ulug watuk men neg de aren kabog-debag on de sepuluh kilogram hag deg latfag.

¹⁸Airoho dulug aren walug ambol somban de o kota watfagdeg jelai anggen humdoho ibilfag on etmano mel, siburu nebagdeg ando febag on etmano mel, Naomi og-irik watfag.

¹⁹Og-irik watfag ma at Naomi en uruk kwit de, “Suma abirangge hat de keman ondolehen. Yohore hat de ap sa eyabukmu yabuk dehen? Ap hat hobam fano ahareg hobam fano ale habeheik on aire Allah en at fanoap deberuk kamag!” ulug hweag-etfag. Ai ebag ma at Rut en uruk kwit de, “An den gandum ondolihi on etma re ap angge unuk Boas ai eyabuk kwe en ondolihi,” ulug hweag-etfag.

²⁰ Ai ebag ma at Naomi en uruk kwit de, “Nahaloho, ap aire nit nenebe misig kwe en ondoho on. Ne, aren de nit nenebe og-neneplug nit nenobahet di angge su angge let nesauk kam aleroho deheik. TUHAN en airoho henepuk karuhuk ulug wene sali wat-nesauk ale higitdoho ap homi waratswa on mel enoluk wereg on mel let-enesauk on anyo en ap ai fanoap deberuk kamag,” ulug hweag-etfag.

²¹Ai en Rut en uruk kwit de, “Nisinga ap ai en de an nautsi gandum anggen baldil laukmu etma haren anggen wamburuk on ondolduk men neg mundoho baldil laukem neg de bok amuk ulug hweag-nereheik,” ulug ebag.

²²Ai ebag ma at Naomi en onggo uruk kwit de, “Nahaloho, hat de ap homi eke on eneyabukmu anggen ondolik lahun halug de ap homi en lal habuk no re, la fug angge homi at Boas eyabukmu gandum anggen baldukmu hinim baldil lauk kwit ondolduk kamuk,” ulug hweag-etfag.

²³Airoho ebag ai en de at Rut de homi hun Boas eyabukmu anggen baldil laukmu enombolim lauk kwit gandum anggen ondolduk katfagdeg anggen mundoho balfag ma at oho embesebag. Airoho balduk kwit de, gandum anggen maben on keram balduk li em oho ne anggen ebe on ambiangma balduk li em oho re Rut inim neg balfag. Airoho balduk kwit etma mel mundoho balfagdeg inim de at Rut hwe eyamalhwe Naomi nim welatfag.