Read Ninia Yali RUT 3 Bible Online

RUT 3 - Ninia Yali bible

RUT 3

¹Il eke welatlug, hwe Naomi en Rut fam uruk kwit de, “Hat hahun hwelalug ahain anggendoho welalen ulug boruk kwit duruk kahi.

²Hat de hwelani amu on nim hun Boas eyabukmu yabuk duruk kahep angge anyo re, hun Boas aire ebe niron, anggere hesanggo holin! At de yoho hup su re eyabukmu gandum anggen lolik larohoreg.

³Anggere ketia kume watmihindeg amben angge[6] areroho hasum mun fano on wan-dakin. Wandalug de hun Boas gandum anggen omalo fam en loloho belapukmu etma lakiyug. Lalug de eta nangno hauk kwit weregman at asiburu nim ahaik nim mundoho namisimen de hat hebe eta wereg ale at oluk atmisi hayog.

⁴Wereg lit de at ebe kea noheik lamisi e ulug hil fubi debeiyug. At lahe mundoho nohoruk halug de eta lalug, asilimut leg halug eyog[7] lulukmu etma ying-aik lakiyug. Airoho dimihin mu neg de aren hat diroho din ulug hweag-hitmisi,” ulug hweag-etfag.

⁵Ai ebag ma Rut en onggo uruk kwit de, “Nisinga fano, hweag-nerehen ale eta mun higitdoho dimin,” ulug ebag.

⁶Ai ulug at Rut anyo it ap gandum anggen omaloman loloho belapukmu etma lebag. Etma lebagdeg eyamal hwe en hweag-etfag ale etano higitdoho neg dik lebag.

⁷At Boas anyo ahaik inim asiburu nim mun homoroho nebagdeg endama ahayeg hebag. Airoho dulug at ebe gandum anggen loloho kabogdeg ma alulukmu noho ik lebag. Ai en at Rut anyo ling-long lebagdeg Boas a silimut leg halug eyog lulukmu ying-aik lebag.

⁸Ying aik lebag ma hup andundu Boas anyo oluk atfagdeg ebe enden dauk men de hwe misig eke eyog lulukmu yinggigmu hebagdeg de youk lebag.

⁹Youk lebagdeg hein og-hauk kwit de, “Hat de sa?” ulug ebag ma, At Rut en de, “Nakni an Rut. Hat hebe niron deg lahenma, an hwale nobahakun en hohwe amag ulug og-nabin,” ulug hweag-etfag.

¹⁰Ai ebag ma at Boas en uruk kwit de, “Nahaloho At TUHAN en fanoap hapuk kamag, ulug hweag-etfag. Haren hwe heyamal hwe anyo fam deberuk katihin ale etma nim ilit ha man de, haren ketia dehen on au neg de henda hundig mun humon deg lahen ale anyo unuhuk fehen. Haren ap hahunsi hwelamin ulug ap sauwe enenggik wereg on oho enenggik eleg on oho enesahali kwe en hera enebuk alere deg kweleg famen de haren airoho dirihin fug ai.

¹¹Aireg anggere hat henda firuk fug. Hwele hat de habut fano on deg lit duruk kahen ale etma re ap homi o kota su on de mundoho enoluk deg ma re haren heng ehen on eta an den abirangge duhuk neg.

¹² An den hat hebe holuk fahet hwale hobahauk ale aire, an nebere hat indip on deg lahimu re an den duk ale aire dik-demdoho. Famen de hat hebe holuk hwale hobahauk ale on aire ap amu on eke wereg. Ne, an de il misig yat hag famen de at neg de mun indip horogma on.

¹³Yoho hup sure hat hebe suma welamin. Sono hubet neg de aren hat hebe holuk anyo hwale hobahaku a, eleg a, ulug hein og-hahuk. At enda halug fano neg, famen de at erim halug de, Allah oluk wereg on anyo unuk hombuk baloho dik-demdoho uruk kahi anggere, hat hebe hwale hobaharuk ale aire an den duhuk. Ketiare o suma nohoruk men o sekan duhu,” ulug hweag-etfag.

¹⁴Airoho hweag-etfag ma re hwe Rut anyo Boas eyog lulukmu etano nohobag. Nohobag ma re at Rut watfag ale anyo at Boas oluk atuk ale erim en de, at Rut anyo ap homi en neano ulug de, hubet-habet o hil yinggiruk kweleg etano oluk inatfag.

¹⁵Inatfag ma Boas en Rut hweag-utuk kwit, “Haren karesilag ai kweraroho dia doale fein,” ulug ebag ma at Rut en sum karesilag anyo kweraroho doale febag. Ne, at Boas en de sum karesilag anyo fam gandum maben on anyo 20 kilogram en hagdoho yohwat-etfag. Ai en de hamboko Rut ummu lahabe folug neg de Boas o kota Betlehem lebag.

¹⁶At Rut anyo obam aik lebag ma hwe eyamal hwe anyo en hein og-hauk kwit, “Nahaloho, anyo re keroho a?” ulug hein og-hebag ma, at Rut en de Boas en at fam debebag ale omano abirangge dindil etfag.

¹⁷Ne, at Rut en ele lisoho eke nim uruk kwit de, “Gandum eiya abirangge re aren neg og-nereheik. Aren uruk kwit de, Henggik abie hisinga kit lamihin fug, ulug yohwat-nereheik,” ulug hweag-etfag.

¹⁸Hweag-etfag ma at Naomi en uruk kwit, “Nahaloho, we nangno hauk kwit welamuhuk men ambiangma nanggin aruhu e? Wene su fahet de Boas oho bok welatmisi fug lit deg, yoho su neg wene au wut-dikohoreg,” ulug hweag-etfag.