Read Ninia Yali RUT 4 Bible Online

RUT 4 - Ninia Yali bible

RUT 4

¹At Boas anyo o kota kwik laukmu sokolma ap homi kabog-duruk katfag ma etmano lebag. Lebagdeg etano hweriegman de, at Boas en ap aire hun Elimelekh indip on abinggi angge aknireg on anyo kwe etma laukmu hebag. Laukmu re Boas en at anyo wol-duruk kwit de, “Nare, dia hweria aik ma!” ebag ma, ap anyo watfagdeg etano hweria aik watfag.

²Ai en at Boas ap o kota ai on kaindeg enebe num en etma ininim seberoho hweria amag ulug ulug hondog-enepfag. It anyo hweria atfag ma,

³Boas en ap at are on anyo fam uruk kwit, “Hwe Naomi re o Moab en sombandoho nikangge wahasi. Ne, ketia aren de kwenang hun Elimelekh nit indip on eleg atsi ahun en omano onggo bal-damin ulug duruk.

⁴Ai fahet de an den boruk kwit de hat oho holukdoho ulug uruk kahi. Ne, haren kwenang ai hunduruhun halug de ap hwerieg on inil hanim eiyan in. Ne, eleg halug de wene ai fahet de nit hat nim neg akniroho deg lahema re, enamegdoho in. Hat dam il lauk em de an de fobik,” ulug hweag-etfag. Hweag-etfag ma ap anyo en onggo uruk kwit, “Yu, an den hunduruhuk,” ebag.

⁵Ai ebag ma Boas en uruk kwit, “Aireg halug de fano. Famen de haren kwenang ai hunduruhun[8] halug de, hwele Rut o Moab on, hwe Naomi amloho waratsi on anyo sohwe ai ohore hat hwelahun. Aire kwenang ai ap waratsi on ai ambiangma on enangge deg lamag ulug anggere,” ulug hweag-etfag.

⁶Ai ebag ma ap anyo en uruk kwit, “Aireg halug de anden de dihi ha fug alereg. Ketiare kwenang ai keram an den neg hundurukwag ulug deg on ai fotog-esauk kahi. Kwenang ai an nambiangma on enengge am fug on fahet, an den alemaroho fahet dihi ha fug alereg. We etare haren hundutmihin ai neg de mun fano,” ulug hweag-etfag.

⁷ Eta li em de ap homi enangge on onggo balduk halug oho, ne aham-aham atuk halug oho re anyo demdoho aha ulug de eneg aleroho re at onggo balduk on anyo en de a sandal horoho foruk katfag. Airoho duruk ai fam it Israel on wereg ma etma wene kwenang fahet onggo hundureheg, onggo baleheg, duruk kwit de iren duruk on anyo omamneroho re airoho duruk katfag.

⁸Ai fam de ap anyo en Boas fam uruk kwit de, “We haren hundutmihin,” ulug ebagdeg at asandal anyo hogdoho Boas og-etfag.[9]

⁹Airoho debag ma at Boas en ap homi enowesi kaindeg mel, ap amu on eta hwerieg welatfag on mel, fam uruk kwit de, “O yoho su salim di angge su angge it ap homi waratswa on hun Elimelekh mel, omaliki nimi Kilyon nim, Mahlon nim, enengge deg latsi on etma abirangge, an den hwe Naomi fam hundurihi ale aire hit abirangge en hinil neehep ai.

¹⁰ Eta nim de at Rut Moab hwe, nimi Mahlon waratsi on anyo sohwe anyo ohore an nohweapdoho hwelamin. Airoho dimin ai fam de kwenang aire ap waratswa on eta enahain elekwe on enangge deg laruhu. Ne, it enahain elekwe on enebe ohore, it enori enahain elekwe on enesahalimu etma wereg lit enobam kota fam etma welamuhup. Nori o yoho hit abirangge hinil neehep ale aire furebeiyug,” ulug hweag-esebag.

¹¹ Ai ebag ma it ap homi enowesi kaindeg mel, it ap amu on mel eta welatfag on etmano en uruk kwit de, “Yu abi, nit ninil heehe. We At TUHAN en neg debesimu, it hun Yakub ohwesi hwe Lea mel Rakhel mel en omalik humdoho endag utswa hag, hat hohwe oho airoho neg deboukwag. Ap homi enunggul unuk agdoho Efrata on wereg ma etma enesahalimu en hat de hangge di on su on weregdoho neg welaruhun on lamag, ne o Betlehem fam etma hat de ap homi en oho mun enoluk deg on deg laruhun lamag.

¹² At hwele duhum on ai fam en, TUHAN en homaliki og-huruhu on etman de hat hahain elekwe re, hun Peres at hwe Tamar omalik unuk Peres it eyamal Yehuda nim en ondoho on anyo fam unuk hum atsi anyo hag deg lamag,” ulug hweag-etfag.

¹³Airoho ebag ma re at Boas en Rut anyo ohweapdoho hwelebag. TUHAN en Rut fanoap debebag ma at omalik ahummu atfagdeg omalik ap angge endetfag.

¹⁴Endetfag ma it homi en hwe Naomi fam uruk kwit de, “TUHAN neg motdeg welamag! Aren neg hat hombalo ap misig eke hat hebe hwale hobahaku on fahet yoho og-hereheik. Omalik aire o ap homi Israel on wereg ma etma unuk leho on welamag!

¹⁵At heyamal hwe ai en de hat fam enda heasi. It ap omalik sabiren etan og-hutswa alere maben hag deg kweleg, aren neg de mun along ale hobahakeik. Hat hebe hahayeg keron og-hereheg, hat hebe sobal li hwale hobahakeg, duruk karuhu on fahet yoho aren hombaliap angge ai og-hereheik,” ulug uruk katfag.

¹⁶At Naomi en omalik anyo webagdeg de enda hundig deg lit kul-dauk katfag.

¹⁷It homi o aluluk kwe on en de omalik anyo unuk de Obed soalfag. Iren ap homi domog fam uruk kwit de, “Naomi re omalik ap angge misig eke hweag-dasi!” uruk katfag. At Isai aknire Obed ai atfag ne at Isai aire Daud akni.

¹⁸Ne, it enebe Daud fam en indip debagdeg Peres huli endag-ail lebag ale re su: Peres, Hezron, Ram, Aminadab, Nahason, Salmon[10] Boas, Obed, Isai, Daud nim endag-atil lebag.