Read Ninia Yali 1 SAMUEL 1 Bible Online

1 SAMUEL 1 - Ninia Yali bible

1 SAMUEL 1

¹Ap misig eke unuk de Elkana welatfag, ne at ebe unggul unuk Efraim on obam de o Efraim doman o kota Rama etma welatfag. Hun Elkana ebere at Yeroham amloho, hun Elihu omba. Aireg ma at aire it ap Tohu enap it Suf on ai en enggikdoho ondoho on welatfag.

²Ne, hun Elkana ai ohwesi enebe biren angge og enusug latfag on enunuk de Hana inim Penina inim. Ne, at Penina omalik welatfag famen de at Hana re omalik eleg angge welatfag.

³Airoho wereg lit at Elkana re di tahun su tahun hundig-hundig o Rama en de o Silo TUHAN obahet kabog-dik laukmu etmano, nenakni TUHAN At Mun Along humon wereg ahun anyo fahet wam waroho feik lauk katfag. O Silo etma imam de hun Eli omaliki nimi Hofni ha, Pinehas ha en TUHAN obahet duruk katfag.

⁴Airoho wereg ma, at Elkana en wam waroho feik lauk kwit halug de, it Penina inim, at omaliki mundoho inim de wam anyo en it enobahet deg on etmano lenggaroho og-esauk katfag.

⁵Famen de at Hana neg de TUHAN en omaliki eke og-utuk katfag fug mu, we at obahet on neg og-utuk katfag. Airoho deg kweleg famen[1] de at Elkana en de at Hana mun enda hundig duruk katfag.

⁶At TUHAN en hwe Hana omalik eke og-utuk katfag fug ale ai fahet, hwe Penina endelaha anyo en ahummu het kwelabe foruk kwit ebe sebele foruk katfag.

⁷It lahe Tuhan obam wirigmu lauk kwit halug at Penina en hwe Hana enda oukap kwelabe foruk neg katfag. Airoho neg durukmu eke salim at Hana en an airoho sebele nobaharuk neg oma, ulug siburu na fug angge oba neg yatuk katfag. Di tahun su tahun airoho neg duruk kwit welatfag.

⁸Airoho neg durukmu, hundig-hundig at Elkana Hana ahun anyo en hein og-hauk kwit, “Hwe Hana, hat de nunggwelug neg oba yatuk kwit welahen? Nunggwelug siburu na fug angge henda hesiloho neg welahen abi, hat homaliki ap neg numen wereg lalepman ohore, it wereg kweleg an neg de henda bik-bulmu nusug lalen fug a? Airoho nusug lalen lit deg,” ulug hweag-etfag.

⁹Nukoho misig salim de it o Tuhan obam wirigmu Silo etmano en siburu mel ik mel mundoho nebagdeg, etali em at Imam Eli anyo oho o Tuhan obam ilonggoma etma sokole kurukmu etmano hwerie-atuk angge fam hwerieg wereg kweleg, at hwe Hana anyo siburu doaloho e fam folug nebag ma etmano en inatfagdeg, enda mun hesiloho oba mun yihunuroho yatuk kwit somban TUHAN fam uruk katfag.

¹¹ Aren airoho uruk kwit, ele sali diroho ebag, “TUHAN nakni Hat hebe homamne humon welahen on nakni, an hamingming angge en anggin-fanggin hauk kahi ale su hil neakin! An hamingming angge hendama wenggel-neauk kamuk, hapeleg-am fug nakni. An hamingming angge deg lahi ale ai fu-nobahain. Haren lahe an hamingming angge fam omalik ap angge eke og-nuruhun halug de, at ebe oluk welaruhuru huli aire ebe mundoho Hat og-huruhuk en ulug abug og-hutuk kahi. Ne, eke an hamingming angge en de at ai oruk de mundoho eke baluhup fug mu[2] welaruhu ulug nele foruk kahi, nakni,” ulug ebag.

¹²Airoho uruk kwit hwe Hana anyo mun anunuroho somban urukmu at hun Eli anyo ambilik fu deberuk katfag.

¹³Fu-deberuk men de hwe Hana anyore somban we endaman neg uruk kwit de ambilikmu neg lebe-lebe uruk katfag, famen de ele urukmu enesangge holduk katfag fug. Airoho durukmu at hun Eli anyo en boruk kwit de hwe sure siomo deheik deg ane, bebag.

¹⁴Airoho bebagdeg at hun Eli en hwe anyo fam hweag-utuk kwit, “Hat de suman airoho siomo duruk katmihin oma! Anggur ahalue neg nauk kam fug!” ulug hweag-etfag.

¹⁵Airoho hweag-etfag man at hwe Hana anyo en onggo hweag-utuk kwit de, “Nakni an de siomo duruk kahi fug, ne anggur ahalue oho ninggi fug. An de mun nenda wat-dauk kwit de, nakni TUHAN fam anggin-fanggin hauk kahi ale su dindiloho somban fam hweag-utuk kahi.

¹⁶Aireg ma re an den diroho deg lit somban uruk kahi aire mun nenda hesilduk en anggere, an fahet hwe su enal belesim wareg on bouk fug,” ulug hweag-etfag.

¹⁷Airoho hweag-etfag ma at hun Eli en uruk kwit, “Aireg halug de hobam seroho hobam lakin. At Allah it Israel on enakni ai en neg haren heng ehen on ai yuo bolug onggo hweag-homag,” ulug hweag-etfag.

¹⁸Airoho hweag-etfag ma at hwe Hana anyo en uruk kwit de, “Nakni haren hele horoho nobam fehen ai fam nobam amag,” ulug ebagdeg, at anyo lalug siburu nebagdeg de at enda hesilduk katfag fug.

¹⁹Likia sekandohore hun Elkana ohwesi omaliki inim hubetdoho inatfagdeg, enakni TUHAN mot-debagdeg o Rama watfag. Watfagdeg at hun Elkana anyo ohwe Hana inim nohobag ma, At TUHAN en hwe Hana en somban ebag on anyo onggo hweag-etfag.

²⁰Hwe anyo omalik ahummu atlug omalik ap angge endag-debag. Airoho endag-debagdeg aren uruk kwit, “At aire an den nakni TUHAN fam heng irihik on” ebagdeg unuk Samuel[3] soalfag.

²¹Airoho soalfagdeg weregman, at Elkana ahain elekwe on inim o Silo TUHAN obahet wam tahun waharukmu feik lauk katfag on fahet feik lauk ale horog aik watfag. Airoho atuk kweleg at Elkana en TUHAN fam abug hweag-utuk kwit, “Hobahet amu eneg on eke og-huruhuk,” ulug hweag-etfag.

²²Famen de ai salim de at hwe Hana ininim lebag fugdeg aren ahun fam uruk kwit de, “At Samuel su ag monde fohukdeg halug neg de, o TUHAN obam wirigmu etma mundoho welamag ulug hondoko feik lahuk,” ulug ebag.

²³Airoho ebag ma at Elkana en onggo uruk kwit, “Ai halug de we haren diroho fano behen aleroho dulug olma weregman neg nit nenomalik ai ag bale foruk ale higit aruhu mu halug walug lahun. Haren[4] airoho duhuk ulug hele sali irihin on ai ebe demdoho amag ulug At TUHAN en neg deberuk kamag,” ulug hweag-etfag. Airoho hweag-etfag ma, at Hana olma weregman neg omalik anyo ag balduk ale horog atfag.

²⁴At Samuel anyo ag mundoho bale febagdeg, at isinga en hondoholug Tuhan obam wirigmu o Silo etmano feik lebag. Etali em de at ebe mun fem dotdeg kweleg walug feik lauk kwit, at hwe Hana en wam sapi yohombuk misig umur tahun henahan deg on[5] eke inim, gandum ilit angge fam ilitdoho 10 kilogram inim, anggur ahalue ikwag wam ahap on fam hwenanggeg angge eke inim, walug lebag.

²⁵Wam sapi anyore waroho at Samuel anyo hondoko hun Eli akit feik lebag.

²⁶Walug feik lebagdeg at hwe Hana anyo en hun Eli anyo fam hweag-utuk kwit, “Yehei nakni, an de fubi nobahaken a? An de hwe nebe dia inaik waharihik deg somban nakni TUHAN fam urukmu hil neauihin on anyo.

²⁷Omalik su fahet nakni TUHAN fam heng-irihik mu, somban irihik on anyo mundoho holsi su.

²⁸Airoho disi ai fahet de omalik su mundoho oluk welaruhu huli ai ebe mundoho TUHAN angge welamag ulug og-utuk kahi su,” ulug hweag-etfag. Airoho mundoho debebagdeg iren[6] TUHAN obahet mot-debag.