Read Ninia Yali 1 SAMUEL 10 Bible Online

1 SAMUEL 10 - Ninia Yali bible

1 SAMUEL 10

¹Airoho hweag-etfagdeg at Samuel en ikwag zaitun ahalue hwenanggeg angge anyo webagdeg, at Saul unggulmu hilili febagdeg, at Saul anyo ambilik en dop-hauk kwit, at Samuel en diroho ebag, “TUHAN en At omaliki Israel on fahet enowe raja welaruhun en ulug unduhuk hobahakeik. Haren de it At omaliki etma melal-enepuk kwit it enaselei on famen enalong baloho fahat-enusug laruhun. Hat demdoho TUHAN en momaloho At omaliki Israel on enobahet hat raja unduhuk hobahakeik[23] ulug eneg anggere su:

²Yoho haren an nobahalug lamihin deg duruk men, ap biren angge it Benyamin on enanggwenang fil en at Rahel saleg on horogma o Zelzah etma ambi amluhup. Hinim ambi amluhup deg de iren diroho hat hweag-humulsa, Wam keledai haren heraruruk kahen on etanore mundoho hweahausa. Ne, hat haknire wam etma fahet enda fituk kwit wereg fug famen de hat fahet keroho hweahakuk ulug, hindik-hundig hein og-og uruk kwit neg wereg, ulug hweag-humulsa,” ulug hweag-etfag.

³Airoho hweag-etfagdeg at Samuel en eke inim uruk kwit, “Etan de we bekit neg lamihin deg de e indipmu wene fahet kabog-durukmu o Tabor etma lamihin. Etma re ap enebe henahan angge wam Allah fahet waroho yalik laul en ulug o Betel fil waharukmu ambi amluhup. Ne, iren ap eke en de wam kambing omalik henahan angge sil-eneplug waharuk katmisi, ne at eke en de roti henahan, ne at eke en de ikwag ahap on fam wirig angge anggur ahalue yohwaroho walug waharuk katmisi.

⁴Iren de hat hebe dang-healusareg de roti biren angge og-humulsama hwelamihin.

⁵Airoho dulug de hat hebe Allah anduk fam o Gibea en it ap homi Filistin enobam sabo wiroho nohorukmu etma lakiyug. Etma lauk men de o kota kwik laukmu elehet sokole balegma etman de it ap nabi esan misig duk waroho yalduk sili etman wambik waharukmu hinim sal-kwal uluhup. It enebere kitar hag angge unuk gambus mel, kecapi mel, waruk enenggik dagdoho watuk angge rebana mel, findayo hilinggig angge hag seruling mel, etma watil waharuk kwit de enebe siril, enele ngaril waharuk kamlusa.

⁶It airoho dil waharuk li eta hat hebe TUHAN Aheime hobam atlug melal-hapukmu hat iren siril waharuk ale inim, ngairil waharuk ale inim etma hinim dimihin, ai en hat hebe hobabut keron og-hitil lauk-em ap hobabut amu on atmihin.

⁷Mundoho ihi on etman abirangge atuk neg halug de, haren su fano on deg ma dimin boruk ale etman Allah hinim wereg ma diyug neg.

⁸Airoho mundoho dulug de hat hebe o Gilgal lalug de henggik nukoho sabiren etma nangno hauk kamuk. Hat airoho nangno haukmu an wam TUHAN enda ahayeg howag ulug on fahet waroho yalduk on nim wam TUHAN inim seberul ulug waroho yalduk on inim waroho yal-irik waruhukdeg haren duhun ale fahet diroho duhun ulug hweag-hirik waruhuk,” ulug hweag-etfag.

⁹Airoho hweag-etfag ma at Saul anyo Samuel embeselug lebagdeg duruk men At Allah en Saul obabut keron og-etfag. Di on su on at Samuel en hweag-etfag on etmano mundoho nukoho anyo salim neg mundoho atfag.

¹⁰Ne, at Saul inim amingming angge anyo inim o Gibea aik lebagdeg duruk men de iren nabi esan lohwaleg angge fam ininim ambi atfag. Airoho ambi atfagdeg duruk li etano neg at Saul anyo TUHAN Aheime obam atfag ma it nabi etmano en siril waharuk ale inim, enele ngaril waharuk ale inim etmano ininim debag.

¹¹Airoho dil waharukmu it ap homi atam enoluk deg latfag on de at Saul obabut anyo inil halug de, eke en eke fam hein og-og atuk kwit de, “Hun Kish amloho anyore nangginoho aha no? At Saul anyo oho nabi aha behep a?” ulug uruk katfag.

¹² Airoho uruk kwit de ap misig eke eta welatfag on en hein og-esauk kwit, “Ap nabi foma etma re keroho ne hiren boruk kwit de it ai enaknire sa behep?” Iren kohaleg wene uruk kwit, “At Saul oho nabi on a?” ulug ebag on ai indip de ai.

¹³At Saul anyo etmano mundoho sireheg, ngaireheg, duruk katfagdeg wam waroho yalduk katfag angge obale wirig welatfag ma dukmu etmano lebag.

¹⁴It airoho laharukmu at Saul akni aut anyo en il-esebagdeg it hein og-esauk kwit, “Hit de keman?” ulug hein og-esebag ma iren onggo hweag-utuk kwit de, “Nit de wam keledai longgo isi on anyo herarik lauhuk men de eleg en de hun Samuel akit lauhuk deg,” ebag.

¹⁵Airoho ebag ma aren it hein og-esauk kwit, “Hit de keroho nangginoho hweag-hesasi?” ulug hein og-esebag ma,

¹⁶At Saul en onggo uruk kwit de, “Aren hweag-nesauk kwit de wam etmanore mundoho hweahausa ulug hweag-nesasi,” ebag, famen de at Saul ebe at Samuel en raja unduhuk febag ale anyo fahet de akni aut fam mel dindil-hebag fug.

¹⁷Airoho debag ma at Samuel en ap homi Israel on mundoho o Mizpa kabog-dik wamag ulug hweag-esebagdeg, aren it hweag-esauk kwit,

¹⁸“Hit ap homi Israel on henakni TUHAN Allah anyo en isi on de su, An den at ap homi Mesir on enomamne fam sebel-henusug men inim, ap homi enunggul unuk amu on en anggin-fanggindoho henobam foruk men inim, o Mesir en loloho og-heneplug wilibik waharihik.

¹⁹An den neg hit anggin-fanggin hauk katuhup on mel, ouk-bouk hauk katuhup on mel, oko henobahaik waharihik, famen de hiren ketia nit raja eke nenenda ulug heng uruk kwit An henakni Allah anyo, At nenerim ulug embesehep. Aire fano anggere, hit henebe henunggul unuk domog mel, hinindip deg ale mel, An henakni TUHAN nolohotma kabog-dik manik,” ulug hweag-esebag.

²⁰Airoho hweag-esebag ma at Samuel anyo en it enunggul unuk mundoho etmano olohotma aik wamag ulug hweag-esebag ma, waharuk men de it enunggul unuk Benyamin on eneko momal-enepfag.

²¹Ai en it enunggul unuk Benyamin on anyo enunggul unuk enggikdoho deg ale domog olohotma aik manik ulug hweag-esebag ma waharuk men de, it hun Matri eyog indip kwe on eneko momal-enepfag. Ai en fotogdohore it hun Matri[24] ahain elekwe on ap neg olohotma aik waharuk men de at Saul hun Kish amloho anyo en-atfag. Airoho en-atfag ma iren Saul ebe herarebag famen de at ebe etma welatfag fug.

²²Airoho welatfag fug mu it ap homi etmano en TUHAN obam hein og-hauk kwit, “TUHAN nenakni, ap aire ebe suma wereg a?” ulug hein og-hebag ma, At TUHAN en onggo hweag-esauk kwit, “At Saul ebere di angge su angge omano ambol fil heraho ai,” ulug hweag-esebag.

²³Airoho hweag-esebag ma it ap homi etmano en at Saul anyo hondohweik lebagdeg walug de ap homi humdoho kabogdeg ma etmano feik watfag. Feik watfag ma at Saul ebe it ap homi etmano enesahalimu inatfag famen de, at neg de owag yatdeg latfag, ne it fomanere enowag at um fam huli neg deg latfag.

²⁴Airoho deg latfag ma at Samuel en ap homi humdoho etmano hweag-esauk kwit, “Ap nenakni TUHAN en momalsi on anyo ebe su, ap homi nit welahe on eiya en at inim higit on eke wereg fug,” ulug hweag-esebag ma, ap homi enunggul unuk mundoho etmano en amitmit sup uruk kwit, “Nenowe raja leho welaruhun a!” ulug enahayeg duruk katfag.

²⁵Airoho duruk katfag ma at Samuel en ap homi etmano fam, iren at raja ai obahet duruk kamuhup ale fahet ulug inim, ne aren it nenebukwag ulug duruk kamuhup ale fahet ulug inim, enamegdoho hweag-esebagdeg, anyo mundoho lisu balohore buku fam obale mun eneg etmano febag. Airoho mundoho debagdeg de at Samuel en ap homi etmano enobam domog lowag ulug hweag-esebag.

²⁶At Saul anyo oho obam o Gibea laukmu ap enebe foma enenda TUHAN en inim lowag ulug debebag ma, ap mun ambolbolnaha deg lit enambong se on[25] neg inim lebag.

²⁷Airoho debag famen de ap foma enolok on en uruk kwit de, “Ap su en nit fahet wereg lam alereg behep a?” ulug uruk kwit de, iren Saul maben deg bebagdeg at ebe fahet onggo ahayeg angge og-etfag fug. Famen de aren ihi fug kanggo duruk katfag.