Read Ninia Yali 1 SAMUEL 11 Bible Online

1 SAMUEL 11 - Ninia Yali bible

1 SAMUEL 11

¹Airoho debagdeg duruk men at hun raja Amon on unuk Nahas anyo en autsi sehen foroho on lit-esebagdeg, o Yabesh, o Gibea kwenang fam etma labo wirik lebag. Airoho dik lebag ma ap homi Yabesh on etmano en diroho duk ale fano a, ulug hun Nahas anyo fam hweag-etfag on de diroho, “Haren nit inim wene abug katukdoho watmihin halug de nit hat henggik apma amul,” ulug hweag-etfag.

²Airoho hweag-etfag man at hun Nahas anyo en onggo hweag-esauk kwit de, “Ap homi Israel on enunuk sebeloho ulug, hit henebe hundomog hinil bekit fil mundoho hwililminmu wene ai fano boluhup halug neg de wene abug katukdoho hit hinim baldul,” ulug hweag-esebag.

³Airoho hweag-esebag ma it o kota Yabesh ai enowesi enolohotma unduhuk on en onggo uruk kwit de, “Nit nenenggik nukoho sabiren og-nesamihin mu niren ap homi Israel wereg kwe yonggo mundoho mondotulmen ap homi eke en let-nenepuk eleg halug de, nit hat henggikmu aik wahe ul en de hweag-nesakin,” ulug hweag-etfag.

⁴Airoho hweag-etfagdeg de ap yonggo mondotfag on anyo at Saul wereg ma o Gibea aik lebag. Aik lebagdeg wene ebag ale anyo fahet dindil-esebag ma re ap homi mundoho enenda siagdoho hesilduk kwit de oba yatfag.

⁵It ap homi etmano airoho durukmu at Saul yabukmu en owam sapi walug ket watfag hag ap homi airoho durukmu esebagdeg, aren oho hein og-esauk kwit de, “Nunggwe ale aha? Nunggwelug ap homi mundoho oba neg yatuk?” ulug hein og-esebag ma, iren ap wene o Yabesh en walug watfag ale anyo fahet hweag-etfag.

⁶Airoho urukmu hol-hauk men de at Saul anyo Allah Aheime obam atfag.

⁷Airoho obam atfag ma mun olok hum atfagdeg aren wam sapi biren angge webagdeg de aren baloho mun balu humdoho lenggare febag. Airoho lenggare febagdeg de wam lenggareg etma ap homi Israel on wereg kwe etmano mundoho mondotuk kwit de wene melaleg diroho ulug inim mondotfag, “Ap eke en it Samuel inim, Saul inim dog yabik laukmu inim lahu fug halug de ap ai en owam sapi ohore airoho at baluhuk!” ulug wene mondotfag. Airoho mondotfag ma it ap homi Israel on en mun enakol atfagdeg At nenakni TUHAN en airoho nenebuk ane, ulug ap eke bok-am fug angge ninim seberoho dog yabik kuhuk ulug ebag.

⁸Airoho ebag ma it enebe kabog-debesebagdeg o Besek en wenag-enepuk men de ap Israel on enebere 300.000 en welatfag ne it Yehuda on de enebe 30.000 en welatfag.

⁹Airoho deg latfag ma wenaho febagdeg de it o Yabesh en mon-enebik watfag on anyo hweag-esauk kwit de diroho hweag-esebag, “Sono hubet o nukoho am fug men de it let-enebuhuk ehesa iyug ulug de ap homi Yabesh on hweag-esakiyug,” ulug hweag-esebag. Wene airoho ebag ale anyo ap homi Yabesh on etmano enesanggo holfagdeg de, enahayeg hum atfag.

¹⁰Enahayeg hum atfagdeg iren hun Nahas anyo fam uruk kwit de, “Sono neg de nit hat hobam amuhuk anggere, haren henda bohun ale higitdoho nenobahakun,” ulug hweag-etfag.

¹¹Airoho hweag-etfagdeg wereg ma likia hubet de at Saul en autsi etmano esan henahan fam yohwan debesebagdeg, o il hil yingguruk kweleg etano, etano it Saul autsi inim anyo ap homi Amon on enobam sabo wiroho nohorukmu etmano heroho louk uruk kwit de bin kwebag. Airoho kwebagdeg de o nukoho-am fugmen neg de ap homi it Saul autsi mel anyo en de it eneselei on mundoho enalong elehapdoho fesebag. Airoho duruk ale en it ap Amon on koloroho wilipfag on de del-fol uruk kwit de it biren enebe seberoho la fug alereg latfag.

¹²Airoho debag ma it ap homi Israel on en at Samuel hein og-hauk kwit de, “Ap atam uruk kwit at Saul de raja welam fug alereg, ulug enambong si seroho uswa enap omanore enebe kema ahi? Niren it enebe binggi enowarukwag ulug nenakni haren og-nesa angge dirihin abi,” ulug ebag.

¹³Airoho ebag famen de at Saul en uruk kwit de, “Yoho su salim de At TUHAN ap homi Israel on enahap wendat-henepsi salim anggere, ap misig ulug oho eke watluhup fug,” ulug hweag-esebag.

¹⁴Airoho hweag-esebag ma at Samuel en ap homi etmano fam uruk kwit de, “Nit nenebe mundoho o Gilgal lauldeg de at Saul unuk bogdeg mundoho inaha ulug unduhuk feik lakohon,” ulug hweag-esebag.

¹⁵Airoho hweag-esebag ma it enebe mundoho o Gilgal lebagdeg de at Saul anyo raja demdoho inaha ulug enamegman fag-dik lebag. O etman iren am anggerang owam seberoho ulug waroho yalfagdeg at Saul inim, it ap homi mundoho inim en airoho debag ai.