Read Ninia Yali 1 SAMUEL 12 Bible Online

1 SAMUEL 12 - Ninia Yali bible

1 SAMUEL 12

¹Airoho debagdeg at Samuel en it ap homi enunggul unuk Israel on fam hweag-esauk kwit, “Hiren nenowe raja eke nenenda ulug uruhup ale anyoroho an den ap raja misig in-hisihi ai.

²Hinil neakiek, an de mundoho sobal ahireg konurebehi su. An de mun anunuroho nebe sauweman angge ketia huli hit henolohotma wereg lit melale henobaharuk katihik. Eneg alere nomaliki enebe mundoho log atswa ai. Ne, ketia hwili en de at raja unduhuk fehep on ai en melal-henepuk karuhu.

³Ketiare hit henolohotma unduhuk lahi su! Anggere an den eke siag dirihik halug de TUHAN il hanim inim, at raja Aren momalsi on il hanim nim, diroho disi ulug nobam feiyek. An den lahe aben enowam sapi oho keledai oho eke wauihik a? An den ap homi lal-enebeheg, nenggik omamne fam sebel-enusug lit welaheg, enangge nenggik apmane on hweleheg, dirihik on eke wereg a? Wereg halug de an den nangginig angge wauihik on ohore mundoho obalma femin en de iek,” ulug hweag-esebag.

⁴Airoho hweag-esebag ma it ap homi etmano en onggo hweag-utuk kwit de, “Eleg, mun eleg, nenakni haren de nit lal-nenebeheg, henggik omamne fam sebel-nenusug laheg, ap misig angge eke ulug oho eke hweleheg, mun dirihin fug,” ulug hweag-etfag.

⁵Airoho hweag-etfag ma Samuel en uruk kwit de, “An siag dirihik fug ale fahet enameg wereg halug de TUHAN oho, at raja Aren momalsi on oho inil wereg ai. An den dorangge ulug oho siag dirihik fug,” ulug hweag-esebag. Airoho ebag ma iren onggo uruk kwit de, “Yu, Demdoho TUHAN il wereg ai,” ulug ebag.

⁶ Airoho ebag ma at Samuel en eke uruk kwit de, “TUHAN en neg Musa mel, Harun mel, momal-enepsireg, Aren neg hit henombasi o Mesir en og-eneplug wilibik wahasi.

⁷Ketiare eke laluhup fug. Hit henobam TUHAN il hanim eiyan wene feikoho lahi. TUHAN endaleg ahun anyo en hit henombasi inim, hit inim fam henepuk katsi ale anyo ebet hakiek.[26]

⁸ At Yakub ahain elekwe on mel o Mesir wahausareg durukmu, it ap homi Mesir on en anggin-fanggindoho enobam foruk ale en[27] de it henombasi en TUHAN en let-nenebukwag ulug ayonggo fousa. Airoho fousama At TUHAN en hun Musa mel, Harun mel, mon-enebik wahasi. Ap biren etan de it henombasi o Mesir en og-eneplug wilibik wahausareg o suma femdoho welamag ulug hwaloho fousa.

⁹ Famen de iren enakni TUHAN Allah anyo enapelehapdoho embeseswa fam Aren it sehen foroho on enowe panglima unuk Sisera o Hazor ahun anyo en enowarik kwik watlug enalong elehapdoho feseheg, it ap homi Filistin on en mel, raja Moab on en mel enalong elehapdoho fesoukwag ulug debeheg, disi.

¹⁰ Airoho duruk ale en iren TUHAN fam somban eheg, enesiag fag-deheg, duruk kwit de diroho uswa, TUHAN nenakni, nit hat famen kwaniroho wilibik lalug, kembu unuk Dewa Baal mel, Asytoret mel, apne wauk katuhuk ai fam siag duruhuk. Famen de ketiare nenakni Haren it neneselei on famen nenahap wendat-nenebin, ne airoho wendat-nenepuk halug niren Hat hobam neg hobahet duruk kamuhuk! ulug somban uswa.

¹¹ Ai en At TUHAN en Gideon mondorik watfag, ne ombolim Barak[28] mondorik watfag, ne ai ombolim de Yefta ne fotogdoho re an. Nit nenebe domog en de hit fiselaroho henobaharuhukmu hit henebe henakol eleg angge welahep ai.

¹² Famen de hit hinil hauk men at raja Amon ahun Nahas anyo en henowarik kwik waharuk ale en de hiren TUHAN anyo raja nit fahet wereg nenerim ulug embeseruhupdeg, an hweag-nutuk kwit, Nit de ap raja en melal-nenepuk wereg ale nenenda, ulug hweag-nutuhup.

¹³Airoho hweag-nutuhup anggere ketia hinil hakiek! Hiren heng-uruhupmu TUHAN en og-hesasi on, at raja hiren momal dauhup on anyo re su.

¹⁴Hiren henakni TUHAN leho feheg, At obahet neg deheg, At ele holeheg, Aren wene melaleg hweag-hesauk on omano dipdoho neg deheg, duruk kwit hit neg fug famen ite hit et angge at raja ai et angge henakni TUHAN Allah fam ele holoho neg duruk kamuhup halug de, hit henebe henahayegdoho welamuhup.

¹⁵Famen de, hiren TUHAN ele holuk fug angge, At ele sahaloho foruk halug de, dik-demdoho TUHAN en hit nim, hit henowe raja [29] nim inim henaselei on hag deg laruhu.

¹⁶Ketia eke nim holiek! Henakni TUHAN en hit henalukweman along humon duruk karuhu ale ai furebeiyug.

¹⁷Ketiare o hobi wereg famen de an den TUHAN hweag-uruhukmu, an somban uhuk on nele holoho re Aren ululureheg, osit belabik waheg, duhu. Airoho atuk li eta hiren raja nenenda ulug heng-uruhup ai fam, nit TUHAN fam siag humon duruhuk ulug wenggel aruhu,” ulug hweag-esebag.

¹⁸Airoho hweag-esebagdeg at Samuel en somban ebag ma nukoho anyo salim neg TUHAN en osit nim, ululu nim belabik watfag. Belabik watfag ma it ap homi enunggul unuk enap mundoho anyo en de TUHAN fam inim Samuel fam inim enakol neg atfag.

¹⁹Airoho enakol neg atfag ma iren Samuel hweag-utuk kwit, “Nenakni, nit let-nenebin, nit warahe ha nore haren hakni TUHAN Allah ai fam nenobahet somban in. Ketiare niren atam siag duruhuk on etmano wereg kweleg de, niren raja eke nenenda ulug heng uruhuk ai fam siag duruhukmu nenenda wenggel aha,” ulug hweag-etfag.

²⁰Airoho hweag-etfag ma at Samuel en onggo hweag-esauk kwit de, “Henakol duk fug, hiren siag ai duruhup famen de, TUHAN ohwal halug la fug, ite henenda mundoho abirangge At obahet neg duruk kamek.

²¹Hiren kembu dewa hit let-henebeheg, hinili og-henebeheg, duk fug alereg on etma re enebe mun eleg anggere mutlug la fug.

²²Henakni TUHAN en hit mundoho At omalikiap henebuhuk ulug isireg Aren hombuk balduk kwit, An den it fotog-esalug lahuk fug isi.

²³An nebe fahet de, an den hit henobahet somban uruk eleg fam an TUHAN il hanim siag dihi halereg ma, an den neg hit fano deheg, demdoho on neg deheg, duruk kamag ulug hweag neg hesauk karuhuk.

²⁴Henakni TUHAN fam neg along bolug leho feheg, At fahet neg dipdoho henenda abirangge en deheg, duruk kamuk. Aren hit henobahet along on humdoho duruk katsi ale etmano wenggel-hakiyug.

²⁵Famen de hiren siag neg duruk halug de hit henebe et, at raja et mundoho eleg amuhup,” ulug hweag-esebag.