Read Ninia Yali 1 SAMUEL 13 Bible Online

1 SAMUEL 13 - Ninia Yali bible

1 SAMUEL 13

¹Nukoho misig salim at Saul raja [30] mundoho inatfagdeg,

²aren ap homi Israel on enebe 3.000 en momal-enepfag. Airoho momal-enepfagdeg de it enebe 2.000 en de at onggwareg inim o Mikhmas mel, o Betel en dom fam etmano inim welatfag, ne it enebe 1.000 en de at amloho Yonatan anyo inim de it ap homi enunggul unuk Benyamin on enanggwenang fil en o Gibea etmano lebag. Ne, it foma alongdoho welatfag on etmanore henobam hundomog lakiek ulug monde-fesebag.

³Airoho monde-fesebagdeg duruk men de at Yonatan anyo en de tentara Filistin on[31] enowe panglima anyo o Gibea en watfag ma it ap homi Filistin on enesanggo holfag. Airoho holfag ma re at Saul en de it ap homi Ibrani on lohwalik watlug dog yabik lowag ulug de o it wereg kwe etma mundoho trompet ele furiek ulug hweag-esebag.

⁴Ne, it ap homi enunggul unuk Israel on mundoho fam hweag-esauk kwit de at Saul en de it sehen foroho on Filistin on enowe panglima anyo wareheikma re it ap homi Filistin on en Israel on fam enerim henebehesa ulug hweag-esa lakiek. Ai fahet de ap homi mundoho en wol-henebeheik on ai hole folug de at Saul inim o Gilgal seberik laluhup, ulug hweag-esebag.

⁵It airoho duruk kweleg de it ap Filistin on ohore it Israel on enowarik kul ulug de lohwalfag. Lohwalfag man de iron kereta hag angge emberimmu lahalug dog yapil lauk anggere 30.000[32] en welatfag, ne ap wam kuda emberimmu huratlug lauk on de enebe 6.000 en welatfag, ne dog yapuk on tentara re enebe ik laut yenggeleg on aegma ik inggi wereg etma hag deg latfag. Airoho deg ma it enebe o Bet-Awen en mo lahaik waharuk fil o Mikhmas etma o sabo salfagdeg nohobag.

⁶Airoho nohobagdeg iren ap homi Israel on fil dog fitik-fotog-esa kwik watfag ma it ap homi Israel on enebe nobong-hobong ebag. Airoho duruk kwit it ap Israel on foma re helep owik kwe herag-aheg, dom elma herag-aheg, helep sili honggolegma kelog aik kweheg, ite ik bohwe habuligmu herag-aheg, kwenang habulig on fam herag-aik kweheg, debag.

⁷It fomanere Ik Yordan bal-esalug de wilayah Gad mel, Gilead mel on en fam etma nindig-atfag. At Saul de ebe o Gilgal welatfag famen de it ap homi at inim lebag on etmanore enakol en enowag elek-elek angge duruk katfag.

⁸ At Saul de Samuel en hweag-utuk kwit, “An nukoho sabiren nangno neauk kamuk,” ulug hweag-etfag aleroho enggik nukoho sabiren nangno hauk kwit welatfag, famen de it ap homi Israel on etmano en at Saul anyo embeselug lauk kweleg, at Samuel anyo o Gilgal owan aik waharuk katfag fug.

⁹Ai fam aren it ap homi etmano hweag-esauk kwit, “Wam TUHAN enda ahayeg howag ulug waroho yalduk on ulug ai mel, TUHAN inim seberul mel yalduk on ai mel, walug manik,” ulug ebagdeg, at amu en wam anyo waroho yalfag.

¹⁰Famen de at horog ket yale febagdeg duruk men de at Samuel anyo watfag. Waharukmu at Saul anyo olohotma hondohweik lamin ulug lebagdeg dang dimin ulug duruk katfag,

¹¹famen de at Samuel en hein og-hauk kwit, “Nakni hun haren de nangginoho dehen?” ulug hein-og-hebag. Airoho hein og-hebag ma at Saul en onggo hweag-utuk kwit, “Nakni haren uruk kwit an deta li em waruhuk ulug irihin li etano higitdoho waharuk eleg kweleg, ap homi mundoho an nobahalug neg lauk kahesa. Ne, it ap Filistin enap ohore o Mikhmas lohwalehesa.

¹²Airoho dehesama an den wenggel-hauk kwit de, an TUHAN fam henda neakin ulug owan hweag-om fugmen horog ketia it ap Filistin on en an o Gilgal dia en nowarik kwik wamukohoreg behireg, ai fam de an den wam waroho indok yalmin ulug behireg dihi,” ulug hweag-etfag.

¹³Airoho hweag-utuk mu holfagdeg de at Samuel en Saul hweag-utuk kwit, “Nakni hun haren dehen on aire mun morueroho dehen. Hakni TUHAN Allah en wene melaleg hweag-hitsi ale anyo hun haren dipdoho delenman de, TUHAN en dik-demdoho hat hebe inim it hat hambiangma en ondoho on inim it ap homi Israel on fahet raja mundoho-mundoho welamuhup ulug henobahalep.

¹⁴ Famen de, nakni hun haren melal-enepuk kahen on anyore anunuroho welaruhu fug. Nakni hun haren TUHAN awene melaleg anyo higitdoho dehen fug mu re, TUHAN en ap amu on At enda boruk on eke momaloho At omaliki enobahet raja welamag ulug unduhuk fesi,” ulug hweag-etfag.

¹⁵Airoho hweag-etfagdeg at Samuel anyo o Gilgal embeselug de bekit o it ap homi Benyamin on enanggwenangma o Gibea etmano lebag. At airoho lauk kweleg de at Saul anyore autsi dog yapuk on enebe nunggwe en deg ulug kumu esauk men de enebe 600 en hagdoho welatfag.

¹⁶Airoho welatfag ma Saul mel, at amloho Yonatan anyo mel, it enautsi mel, de o it ap homi Benyamin on enanggwenangma Gibea etmano o sabo witfag; ne it Filistin enap de o Mikhmas etmano sabo witfag.

¹⁷Etano li em it ap Filistin enap esan henahan di angge su angge delduk on de o sabo it Filistin on en witfag ma etmano en de di angge su angge delik laul ulug de wilipfag; wilipfagdeg de esan ekere o Ofra o Syual kwenang fil etma lebag,

¹⁸esan bireneg on de o Bet-Horon lebag, ne esan misig ekere o Zeboim donggoma fil dulug leimu wereg on dulug huli-hulimu etma lebag.

¹⁹It ap homi Filistin on en it Israel on en karog mel, inggisim mel, kabeluhup fug ulug alele ohoma re, it ap homi Ibrani on wereg ma etma re ap bosiemanggen lalduk on eke welatfag fug.

²⁰Airoho deg ma it ap homi Israel on en enanggwenang moholduk angge aeg marukwag ulug mel, sekop aeg matul ulug mel, yaha bosie matul ulug mel, karog unuk sabit [33] marukwag ulug mel, de ap homi Filistin on enekit lauk katfag.

²¹Airoho lalug iren eneyaha aeg mag-nesowag ulug mel, wam sapi en lisulug laukmu kwenang habuldil lauk angge[34] aeg mag-nesowag ulug mel, de uang anggen owag doron misig neg foruk katfag, ne kwenang moholduk angge aeg mel, ena sekop aeg mag-nesaog ulug de onggo uang owag anggen doron biren foruk katfag.

²²Airoho duruk katfag ai fam de it o Mikhmas kwe dog yapfag salim aire it ap homi Israel on ap misig eke en inggisim oho, karog oho eke enenggikmu fahat dalug latfag fug, we it Saul mel, amloho Yonatan anyo mel, neg en seneg latfag.

²³It ap homi Filistin on en de o Mikhmas en dom fam hug-ele deg ma misig fahet, niroho bug haul ulug de ap o misig kahaleg wereg ma wiroho febag.