Read Ninia Yali 1 SAMUEL 14 Bible Online

1 SAMUEL 14 - Ninia Yali bible

1 SAMUEL 14

¹Nukoho misig salim de Yonatan en nimi asehen walug noruk katfag on anyo fam hweag-utuk kwit de, “Ahwi, nit o Filistin en ap kahaleg wereg ma wirig on fam etlema nindig-amukohon!” ulug hweag-etfag. Famen aren akni fam airoho lamin en ulug oluge febag fug.

²Ai salim de Saul de o Gibea en horogma o Migron e delima indipmu etma weregman. Ne, it ap homi at inim lebag on de enebe 600 en hagdoho lebag. (

³Ne, it imam en enamigmu wan-duruk katfag angge unuk efod anyo walug lebag on de imam hun Ahitub amloho nimi Ahia at are re hun Pinehas amloho Ikabod anyo, ne at Pinehas aire hun Eli imam o Silo etmano TUHAN obahet duruk katfag ahun anyo amloho.) Ne, it ap homi holduk on ohore at Yonatan etman laha ulug aire enapeleg deg welatfag.

⁴Filistin enap en kahaleg wereg o ai fam lakohore at Yonatan de dom fene helep sili biren angge foma-foma nganik-nganog urukmu honggoleg kwe lebag. Ne, helep sili eta enunuk de eke Bozes ne Sene uruk katfag.

⁵Ne, helep sili eta emberim fil wereg on de alukwe o Mikhmas fil hwaleg latfag, ne il apma fil wereg on de orohole o Geba fil hwaleg latfag.

⁶Airoho deg latfag ma Yonatan en ap sauwe on anyo hweag-utuk kwit de, “Nit de ap homi Filistin enap TUHAN enapeleg on en kahaleg wereg ma etma lakohon. Laulmu TUHAN en nit let-nenebuk alereg anggere. TUHAN de ap humdoho nim halug oho, ne dorangge nim halug oho enalongap debesouk alereg,” ulug hweag-etfag.

⁷Airoho hweag-etfag ma ap sauwe on anyo en onggo uruk kwit de, “Nakni haren nangginig ale dimihin on[35] etma re an hamingming anggere we yuo imin neg,” ulug hweag-etfag.

⁸Airoho hweag-etfag ma, Yonatan en uruk kwit de, “Fano,” ulug ebagdeg aren uruk kwit, “Nit etlema nindig-amuldeg de it ap homi Filistin on fam nenebe enam aik lakoho lahe.

⁹Enam aik laulmen iren uruk kwit, Bok lamek, ulusama niren it nangno enusugmen it nit nenakit waharuk halug de, nit etma en nindig-aik la fug angge etma neg welamul.

¹⁰Famen de iren hweag-nesauk kwit, Nit nenakit manik, uruk halug de it enakit laul. Ai fam de TUHAN en it ai nit nenenggikmu og-neseheik ulug eneg alere ai anggere,” ulug hweag-etfag.

¹¹Airoho hweag-etfagdeg it biren etano lebagdeg ap homi Filistin on en kahaleg wereg ma etmano enebe enam aik lauk men de, it ap homi Filistin on etmano en uruk kwit de, “Esakiek ahi, ap Ibrani enap etma helep elma heraho latswa angge wilibik waharuk ai!” ulug ebag.

¹²Airoho ebagdeg iren Yonatan inim at amingming angge anyo inim hweag-esauk kwit, “Niren amu angge eke unug-hesaul[36] anggere lahaik manik!” ulug hweag-esebag. Airoho hweag-esebag ma Yonatan en amingming angge anyo fam uruk kwit, “It enebe TUHAN en Israel on enenggikmu og-neseheik anggere, an nombolim manu,” ulug hweag-etfag.

¹³At Yonatan en nimi sauwe on anyo ombolimu roho re konu-konu angge lahabag. Airoho lahabagdeg Yonatan anyo enam atuk kwit it ap homi Filistin on etmano enowatuk mu wat-heheg wamburuk katfag. Ne, ambol fil de at amingming angge anyo en it oho enowatfag.

¹⁴Il misiham kwik lebag on ai fam de Yonatan inim nimi sauwe on anyo inim en de ap enebe 20 en hagdoho o unggut seperempat [37] hwili wiriligmu etman enowatfag.

¹⁵Airoho enowatfag ma, atfag ale anyo fahet de it ap homi Filistin on o sabo saloho wereg ma inim, lei kwe wereg on inim, en saharil lebag. Ap homi Filistin on abirangge inim, it enaselei on fahet kahaleg welatfag kwe etmano inim, ap foma enengge deldul ulug lohwalfagdeg duruk katfag on etmano inim, mun enakol neg atfag. It neg fug famen de kwenang inim mundoho elek debag ma, enele ya nga hum ale ebag.

¹⁶Airoho atuk kweleg Saul inim orohole baloho ulug it sehen foroho on o it ap homi Benyamin on enanggwenang fam o Gibea welatfag ma etmano wereg lit esauk men de, it ap homi Filistin on etmano enenda nong-hong ebag ma lag-wag uruk bu-ba urukmu esebag.

¹⁷Airoho durukmu esebagdeg, Saul en autsi etmano hweag-esauk kwit de, “Ap sehen foroho on dog yapuk on etmano wenag-enebiek, ne sa eke eleg latmisi, ulug de furoho kumu esakiyug,” ulug hweag-esebag. Airoho hweag-esebag ma iren wene melal-enepfag ale anyo higitdoho duruk men de Yonatan inim, nimi sauwe on asehen walug lauk on anyo inim enebe eleg latfag.

¹⁸Eleg latfag ma Saul en ap imam unuk Ahia anyo fam uruk kwit, “Ap imam en enamigmu boruruk angge unuk efod [38] ai walug ma,” ulug hweag-etfag ma, (Nukoho ai salim de at Ahia anyo en enamigmu boruruk katfag angge unuk efod anyo it ap homi Israel on[39] inil hanim feik watfag.)

¹⁹At Saul en ap imam anyo fam ele airoho hweag-utuk kweleg de, it ap homi Filistin on enobam sabo salegma etmano enele sep hun-hun lauk kwit enakol neg atfag. Airoho atuk ale en at Saul en imam anyo fam uruk kwit, “Nit de TUHAN fam, diroho diek ulug hweag-nesowag ulug heng duk fug ale aha ai!” ulug hweag-etfag.

²⁰Airoho hweag-etfagdeg Saul mel, ap autsi etmano mel, misiham yehegdoho ap dog yapukmu etmano kwik lebag. Kwik lebagdeg esauk men de etmano en it ap homi Israel on enesahalimu nong-hong uruk kwit, eke en eke fam sahaliroho bop-uruk men, eke en eke binggi ware foruk men, duruk kwit welatfag.

²¹Ne, it ap homi Ibrani on it Filistin on enesahali kwe wereg lit enasehen foroho on ininim dog yabik watfag on etmano, enebe iendenale[40] it Saul mel, Yonatan mel inibil atfag.

²²Ai en it ap homi Israel on Efraim duk kwe heraho latfag on etmano enesanggo holduk men it ap Filistin on etmano enakol en wilibihesa urukmu holfagdeg de it enori inim sebe ulug ap homi Filistin on enowarik lebag.

²³It anyo kobokwe kwe hunduko dog yapuk men neg de o Bet-Awen sohwandoho lebag. Ne, ai salim de TUHAN en it ap homi Israel on enahap wendat-enepfag.

²⁴Nukoho ai salim de Saul en hombuk balduk kwit de diroho ebag: “An it naselei on fam mun nolok en nendama sebeleg lit welahi on su obalma onggo enowaruk elegman ap en amu angge eke namisi halug de ap ai wipdeg on welamag,” ulug hombuk balfag ma, nukoho ai salim hundukore ap homi Israel on misig eke en nauk angge nebag fug mu, siburu obok en de enebe mundoho lilipna angge neg welatfag.

²⁵Airoho welatfagdeg it enebe mundoho[41] lebagdeg de enggelama misig eke fam aik lebagdeg duruk men de kin anggen humdoho yihig latfag,

²⁶Airoho yihig latfag famen de Saul en hombuk balfag ale anyo fahet enakol en de ap misig en oho eke nebag fug.

²⁷Famen de Yonatan de it ap homi Israel on etmano fam akni en enakolap kwelaboho hombuk balfag ale anyo apeleg deg latfag ma; ai fam aren andomuk seneko waharuk katfag angge anyo okore kin a wirig angge anyo fam sogdoho kwelabe febagdeg, aren kin ahalue anyo oko nebag. At airoho nebagman de at ebe obam hambuk debagdeg omamne atfag.

²⁸Airoho debagman it ap sehen foroho on etmano on misig eke en Yonatan hweag-utuk kwit, “Nit mundoho nenasiburu obok en de nenebe lilipnaroho duk fug ale neg aha. Famen de hat nenakni hakni en hombuk baloho nit nenakolap kwelap nenepuk kwit de diroho eheik, Yoho su ap eke siburu namisi on aire wipdeg welamag, ulug eheik,” ulug hweag-etfag.

²⁹Airoho hweag-etfag ma, Yonatan en onggo uruk kwit, “An nakni en ap homi nit nenunggul unuk su on fam deheik ale aire mun duk fug alereg on deheik angge anyo i! Fu neakiek, an den kin anggen ai dorangge lohon ninggimu re nebe ketia mun fano aha angge.

³⁰Yoho su salim ap homi nauk angge it neneselei on enalong elehapdoho foruk kwit delehe on oma naluhup fano elepman de, ap Filistin on etmanore dik-demdoho enebe humdoho enowatla lit deg!” ulug hweag-esebag.

³¹Nukoho anyo salim de it ap homi Israel on de kobokwe fene o Mikhmas en de o Ayalon huli etman it ap homi Filistin on enalong elehapdoho fesebag famen de, it enebe mundoho lilipna enepfag,

³²ai fam de di angge su angge it enaselei on fam en delfag angge etmano yeik-belaluk hwelauk kwit de, iren domba mel, sapi mel hwelalug de etano en wam omano waroho ino mep susu angge nauk katfag.

³³ Airoho nauk katfag ma ap en Saul fam hweag-utuk kwit de, “It ap en wam mep et angge nenggesa on aire nenakni TUHAN il hanim siag dehesa,” ulug hweag-etfag. Hweag-etfag ma Saul en uruk kwit de, “Allah ele isi on foroho welam fug angge suma re!” ulug ele hum fam ebagdeg hweag-esauk kwit, “Helep humon ai imbiloho dia feik manik,”[42] ulug hweag-esebag ma feik watfag.

³⁴Airoho feik watfag ma it ap wene walug watfag on anyo fam uruk kwit, “Hit de it ap homi enesahali kwe etma kwil laluhupdeg de iren wam domba mel, sapi mel helep su emberimmu en ware folug nalusa en walug wamagdoho hweag-esakiyug. Iren airoho dulusa ai fam de iren wam amep et angge nauk ale ai embeseheg, TUHAN fam inim siag duk eleg angge embeselusa,” ulug hweag-esebag. Airoho hweag-esebag ma hup anyo salim neg ap homi etmano en wam sapi, domba huhul hwelebag on etmano walug watfagdeg waroho senggelfag.

³⁵Airoho debagdeg Saul en TUHAN obahet mezbah obale witfag. Ne, mezbah keram witfag on de ai.

³⁶Airoho witfagdeg Saul en autsi fam uruk kwit de, “Yoho hup su fam de niren ap homi Filistin on enowarik kuldeg de enangge nenomamne fam delduk men neg hubet aruhu mu, ne enebe mundoho binggi enowaruhuk,” ulug hweag-esebag. Airoho hweag-esebag ma at ap imam anyo en uruk kwit de, “Allah en diroho diek ulug hweag-nesamisi on atam heng dukohon,” ulug hweag-etfag.

³⁷Airoho hweag-etfag ma at Saul en Allah fam hein og-hauk kwit, “An den ap homi Filistin on ai enowarik lamin fano a? Ne, it enebere Haren ap homi Israel on enenggikmu og-nesamihin a?” ulug hein webag. Famen de nukoho ai salim de Allah en onggo hweag-esebag fug.

³⁸Ai fam de Saul en ap homi melal-enepuk katfag on omano hweag-esauk kwit de, “Henebe dia watlug de yoho su salim siag ke on dehesa ulug herariek.

³⁹An de nakni TUHAN mun oluk wereg lit ap homi Israel on enalong amag ulug debesesi ahun anyo unuk fam nele yinggi foruk kahi ai anggere ap eke siag disi halug, at siag disi on ai oho an namloho Yonatan deg kweleg ohore unggum de ebe watluhup,” ulug hweag-esebag. Famen de ap misig eke ambong seroho onggo ebag fug.

⁴⁰Ai en Saul en ap homi Israel on mundoho fam uruk kwit, “Hit henebe abirangge su fil neg inaik manik,” ulug hweag-esebag. Airoho hweag-esebag ma iren onggo uruk kwit de, “Hun nayon haren dimin ulug fano deg ma hehen ale ai dimihin neg,” ulug hweag-etfag.

⁴¹ Airoho hweag-etfag ma at Saul anyo en TUHAN fam somban de diroho ebag, “TUHAN Allah ap homi Israel on enakni, nunggwelug Haren yoho an onggo hweag-nerehen fug? TUHAN nakni, Haren helep eneg on dia fene en onggo hweag-nimin. Ne, siag ai lahe an nobam oho, at namloho Yonatan obam oho wereg halug de helep Urim fene en hweag-numuk, ne siag ai lahe it ap homi Hat homaliki Israel[43] on su fam wereg halug de, helep Tumim anyo fene en onggo hweag-numuk,”[44] ulug somban ebag. Airoho somban ebag ma At TUHAN en onggo hweag-esauk kwit de Saul inim, amloho Yonatan inim fam biloho hweag-esebag ma, ai fam it ap homi anyore siag dehesa fug ulug ebag.

⁴²Airoho ebag ma Saul anyo en uruk kwit, “TUHAN nakni, nit an ninim, Yonatan inim de at ebe su ulug dungdoho in,” ulug hweag-etfag ma, TUHAN en onggore at Yonatan fam aren siag disi, ulug ebag.

⁴³Airoho ebag ma Saul en Yonatan fam uruk kwit de, “Haren de nunggwe ale dirihin men?” ulug hein og-hebag ma, Yonatan en onggo uruk kwit de, “An de kin ahalue dorangge an nandomuk ambiang en wauihikdeg nauihikmen; ne waratuk alere an nenda neg,” ulug hweag-etfag.

⁴⁴Airoho hweag-etfag ma Saul en obam uruk kwit de, “Hat unggum hobam foruk men wararuhun fug halug de an Allah en unggum nobam foukwag!” ulug ebag.

⁴⁵Airoho ebagman de it ap homi en Saul fam uruk kwit de, “At Yonatan waratmisi aire nunggwelug no? Nit de aren neg nenalongap humon nenepsi anggere. Eleg! Nit de TUHAN oluk mundoho wereg on anyo unuk fam uruk kahe ai, at Yonatan de oruk anggen unggul famen misig oho eke longgo imisi fug. At de Allah en let duruk kweleg yoho su fam alongap debeheik ma re,” ulug ebag. Airoho ebag ai fam it ap homi anyo en Yonatan anyo ebe waratmisi ulug deg angge ahap wendare febag.

⁴⁶Airoho debagdeg de Saul en de it ap homi Filistin on anyo eke inim mug-eneplug lebag fug mu re iroho enobam lebag.

⁴⁷Saul raja ap homi Israel on fahet inatfagdeg wereg li em de, aren ap homi Israel on enaselei on inim di kwe su kwe weim yabik lauk katfag, ne it inim weim yapuk katfag on de su: Moab enap mel, Amon enap mel, Edom enap mel, it raja Zoba welatfag on mel, ap Filistin on mel, yapuk katfag. Ne, aren hundig weim ininim yabik lauk kwe etma re at neg along atuk[45] latfag.

⁴⁸At de ebe mun ambong sisereg lit de akol en ik debouk fug angge kwik lauk kwit, ap homi Amalek on sebeloho feseheg, it ap homi Israel on ap enomamne hasimeg enangge delduk on enenggikmen loloho feseheg duruk katfag.

⁴⁹Ne, Saul omalikire, Yonatan mel, Yiswi mel, Malkisua mel, ne at ahaloho wandeba on de unuk Merab ne ombolimu on de unuk Mikhal.

⁵⁰At ohwere unuk Ahinoam hun Ahimaas ahaloho; ne ap panglima wereg lit melal-enepuk katfag on de Abner hun Ner amloho at Saul akni aut anyo.

⁵¹Hun Kis de at Saul akni ne, Ner de Abner akni ne it enebere hun Abiel omaliki.

⁵²Saul oluk wereg latfag li etma re ap homi Filistin on nim de weim mun anggoloroho yapuk katfag. Ai fam de Saul en ap enambong se on mel, enomamne on mel, esalug de aren folo-folo at inim dog yapuk on tentara feseruk katfag.