Read Ninia Yali 1 SAMUEL 15 Bible Online

1 SAMUEL 15 - Ninia Yali bible

1 SAMUEL 15

¹ Nukoho misig salim de Samuel en Saul hweag-utuk kwit, “At TUHAN en neg an hweag-nitsi mu hun hat ap homi Israel on At omaliki enobahet raja welamag ulug unduhuk hobaharihik. Aireg ma hun haren de At TUHAN Omamne Humon anyo en diroho diyug airoho diyug ulug uruk ale anyo holoho duruk kamuk.

² Aren ap homi Amalek on unggum enobam fohu aire, atam it enombasi en it ap homi Israel en on o Mesir en wilibik waharuk men iren weim yabik lausa ai fam debesehu.

³Anggere, hebe lalug de it ap homi Amalek on etma enobam heroho kuruk kwit de enebe mundoho enowatuk kwit de enangge luluhun-lalahandoho enowariyug. Haren de ap mel, homi mel, omalik doron mel, omalik fou on mel, enowam sapi mel, domba mel, unta mel, keledai mel, etman misig ulug oho eke embesouk fug angge abirangge mundoho enowariyug,” ulug hweag-etfag.

⁴Airoho hweag-etfag ma, Saul en autsi tentara etmano o Telaim en wenako fik-fouk debesebag; It wenaho fesebag on aire it Israel on en sehen foroho lit dog yabuk alereg latfag on de enebe 200.000 en, ne it Yehuda on en de 10.000 en deg latfag.

⁵Airoho wenaho fesebagdeg de at Saul inim, at autsi etmano inim de o kota Amalek etmano lebagdeg de, iren ik wirig atuk on obale iringgig kwe etma we kwe bal-enepfag.

⁶Airoho enepfagdeg aren nikale it ap homi Keni on fam enenda eberoho ulug ele mondotuk kwit de, “Atam it ap homi Israel on o Mesir en wilibik waharuk li hit henombasi en ininim seberusareg dusama re, it ap homi Amalek on ai an den mun enowaroho elehap enepuk kwit hit hinim airoho ahep hanore, it ap homi Amalek on ai embeselug lakiek,” ulug hweag-esebag ma, it ap homi Keni on etmano etman lebag.

⁷Airoho hweag-esebagdeg de at Saul anyo it ap homi Amalek on inim dog yapuk men de o Hawila en de o Syur Mesir en mo lahaik waharuk fil huli etma kobokwe kwe hunduko enalong elehapdoho fesebag.

⁸Airoho enowatuk kwit, it ap homi Amalek on inim, it enasahen wereg enap inim, at Saul en mundoho enowatfag. Famen de hun Agag it ap homi Amalek on enowe raja anyore at Saul mel, autsi sehen foroho on mel, en senetfagdeg oluk febag. Airoho duruk kwit, iren wam sapi, domba fano on mel, sapi, domba omalik ebe asei wereg[46] on mel, di angge su angge onggo hum angge mel, de oluk foruk kwit de wam siag hag on mel, di angge su angge onggo[47] maben hag on mel neg mundoho elehap debebag.

¹⁰Airoho debebagman TUHAN en Samuel hweag-utuk kwit,

¹¹“An den Saul raja welamag ulug unduhuk ferihik famen de, aren An nobam ambol yig-nutlug lauk kwit, An den diroho diyug airoho diyug ulug hweag-itihik on anyo disi fug mu, An den, Nambik en ahi, boruk kahi,” ulug hweag-etfag ma, Samuel anyo enda hesilduk kwit, hup hundig TUHAN fam ngururuk katfag.

¹²Airoho debagdeg sekandoho hubet-habet Samuel anyo Saul inim ambi amul ulug akit lebag. Lebagdeg duruk men Samuel hweag-utuk kwit de, Saul de o Karmel helep at onggwareg fahet enenda ebereg welamuhup on unduhuk femin ulug lahareg, bekit o Gilgal laha ebag.

¹³Ai ebag ma duruk men Samuel anyo Saul inim ambi atfagdeg, Saul en Samuel fam uruk kwit, “TUHAN en nakni hat hobam fanoap hobaharuk kamag! An den TUHAN en diroho diyug suroho diyug ulug hweag-nitsi ale anyo mundoho deberihik,” ulug hweag-etfag.

¹⁴Airoho hweag-etfag famen de Samuel en hein og-hauk kwit, “Airoho ehen famen de nunggwelug wam sapi ele ngwereheg, wam domba ele nguk deheg durukmu hol-hauk kahi?” ulug hweag-etfag.

¹⁵Airoho hweag-etfag ma Saul en onggo uruk kwit, “Wam etma re ap homi Amalek en on deldihik angge domba, sapi mun fano on de it ap homi hakni TUHAN Allah fahet waroho yaldukmu ohomag ulug oko fousa. Famen de mun humdohore niren abirangge mun elehapdoho foruhuk,”[48] ulug hweag-etfag.

¹⁶Airoho hweag-etfag ma Samuel esanggo holfagdeg, aren uruk kwit, “Il misig bok lamin, TUHAN en hup anggo an hweag-nereheik ale etma an den hweag-hirikoho lahi,” ulug hweag-etfag. Airoho hweag-etfag ma Saul en uruk kwit, “In o,” ulug hweag-etfag.

¹⁷Airoho hweag-etfag ma Samuel en uruk kwit de, “Nakni hun haren boruk kwit de an hag on su en eke dihi halereg fug berihin famen de, nakni hun hat ap homi Israel on melal-enepuk kamag ulug unduhuk lahen aire fug a? TUHAN en nakni hun hat ap homi Israel on enobahet raja welamag ulug unduhuk hobahasi.

¹⁸Airoho unduhuk hobahalug hun haren ap homi Amalek on mun enolok ligireg on ai elehapdoho feseik lowag ulug mingming hapsi. Hun haren de it ai hinim weim yapuk men it enebe mundoho eleg amag ulug hweag-hitsi anyo.

¹⁹Nunggwelug hun haren TUHAN awene melaloho hweag-hitsi ale anyo dipdoho dirihin fug? Nunggwelug hun haren hinim anggilukdoho di angge su angge del duhup on etma hwelauihin mu, haren airoho dirihin ai fam TUHAN enda siahapdoho ferihin?” ulug hweag-etfag.

²⁰Airoho hweag-etfag ma Saul en onggo uruk kwit de, “An den TUHAN en mingming napuk kwit diroho diyug airoho diyug ulug melale nobahasi ale higitdoho holoho dirihik. Hun Agag ap homi Amalek on enowe raja anyore an den senetihikdeg walug waharuk kwit ap homi Amalek on de mundoho enowatihik.

²¹Famen de an nautsi en de wam de mundoho watswa fug; iren de wam huhul wauhuk on etmano domba, sapi mel mun fano on etmanore eneko o Gilgal en hakni TUHAN Allah fahet waroho yaluhuk on ulug fousa,” ulug hweag-etfag.

²²Airoho hweag-etfag famen de Samuel en uruk kwit, “At TUHAN enda ambono anggere ke behen, wam waroho yal-utuk on ai a, ite At ele hole folug higitdoho duruk on ai a? Wam waroho yal-utuk on aire maben hag famen de At ele holoho higitdoho duruk on ai neg de mun fano. Wam sei aire maben hag famen de diroho diyug uruk on ai holoho duruk on neg de mun fano.

²³TUHAN ele sahaloho folug duruk on aire ap hwal ale duruk on inim higitdeg, ne ap enendama winik-wonog uruk on aire ap kembu unuk dewa mot-duruk on inim higitdeg. Nakni hun haren TUHAN ele sahaloho fehenma, TUHAN en oho hun hat raja welahen fug ulug fag-deheik,” ulug hweag-etfag.

²⁴Airoho hweag-utuk mu Saul esanggo holfagdeg, aren fagdoho Samuel hweag-utuk kwit, “Demdoho an siag dirihik. An den it nautsi fam nakol boruk kwit iren heng uswa ale enele holoho dirihik fam, TUHAN en diroho diyug suroho diyug ulug hweag-nitsi on anyo sahaloho feheg, nakni haren diroho diyug ulug irihin ale anyo mel wenggelha fug angge napelehap debeheg, dirihik.

²⁵Airoho dirihik famen de ketia nakni haren an nasiag elehapdoho nobahalug, an ninim o Gilgal sombandoho lauldeg an den TUHAN fahet dimin en laul ulug hweag-hutuk kahi,” ulug hweag-etfag.

²⁶Airoho hweag-etfag man Samuel en onggo uruk kwit de, “Hun nakni hat de TUHAN ele sahaloho dirihin mu, ketiare hun hat ap homi Israel on fahet raja welahen fug ulug eheikma re, an de hun nakni hat hinim sombandoho laul fug,” ulug hweag-etfag.

²⁷Airoho hweag-etfagdeg Samuel anyo ebe endenoho lamin ulug lauk men de, Saul en asum jubah wandeg on anyo sene febagman de, sum anyo denelfag.

²⁸Airoho denelfag ma Samuel en Saul fam uruk kwit, “Yoho su salim it ap homi Israel on enowe raja unduhuk wereg lit melal-enepuk kahenma kerajaan anyo nakni hun hat famen deneloho re TUHAN en hun hat horog hareg kweleg ap amu on mun fano on fam og-eseheik.

²⁹Ap homi Israel on enakni Allah Mun Ombagbag neg deg wereg ahun aire At ebe ap homi on deg fug mu ele seyale eheg, endama en diroho duhuk ulug wenggelduk anyo aham deheg, duruk fug,” ulug hweag-etfag.

³⁰Airoho hweag-etfag ma Saul en onggo uruk kwit de, “An siag demdoho dihi, famen de, nakni let-nabin, we an den At hakni TUHAN Allah obahet dimin en de ninim sombandoho lakohon. Airoho dul ai fam de it ap homi enunggul unuk su enowesi wereg on inil hanim mel, ne it ap homi Israel on inil hanim mel, de haren an leho nobahamihin,” ulug hweag-etfag.

³¹Airoho hweag-etfag ma, Samuel anyo Saul inim sombandoho o Gilgal lebagdeg, Saul en TUHAN obahet debag.

³²Airoho debagdeg Samuel en Saul hweag-utuk kwit, “Hun Raja Agag ai walug manik,” ulug mingming enepfag ma, at Agag anyo Samuel akit waharuk kwit de, endaman de, “An binggi nowatlep li etanore mundoho ohwal atsi[49] ulug enda beg-beg waharuk katfag.”

³³Airoho waharukmu Samuel en uruk kwit de, “Hat henggarog ambiangman homi humdoho enomalik longgo uswa hagdohore, hat hisinga oho omalik eleg amag,” ulug ebagdeg, Samuel en de wam TUHAN obahet waroho yalduk angge mezbah o Gilgal etano en hun anyo ebe seng dil wambebag.

³⁴Airoho debagdeg de Samuel anyo o Rama lauk kweleg de Saul anyore obam o Gibea watfag.

³⁵Airoho debag huli ai en Samuel oluk welatfag huli en de Samuel en Saul inim eke ambi atfag fug. Famen de TUHAN en nambiken Saul raja unduhuk ferihik aho ulug bebag ai fam de Samuel enda hesilduk katfag.