Read Ninia Yali 1 SAMUEL 17 Bible Online

1 SAMUEL 17 - Ninia Yali bible

1 SAMUEL 17

¹Nukoho misig salim de it Filistin enap dog yabik laul ulug it enesehen foroho on andog-esebagdeg de, o Yehuda kwenang fam o Efes-Damim horogma, o kota Sokho dulug Aseka dulug bul etma enobam sabo saloho nohoruk kwit de, enautsi erat-enepfag.

²It airoho eratuk mu, Saul mel, ap homi Israel on mel ohore o Ela donggoma etma kabog-debagdeg enobam sabo witfag. Etma witfagdeg de iren ap homi Filistin enap en enowarik kwik waharuk on inim abuhuk ulug fik-fouk duruk katfag.

³Airoho duruk kwit de, it Filistin enap de duk foma fil eraroho unduhukmu, it Israel enap de duk eke foma fil on fam eraroho unduhuk latfag. Ne, it foma-foma unduhukmu bul etma re donggo misig eke welatfag.

⁴Airoho deg kweleg ap misig weim sehen anggen on misig eke unuk de Goliat, obam kota Gat ahun, it ap homi Filistin on enobam sabo salegma etmano en wilipfagdeg mum-enepuk kwit enolokap kwelap-enepuk katfag. Hun ebe owag hweise yatdeg alere 3 meter [50] deg latfag,

⁵ne unggul asum mel, asing sum hagdoho wandeg latfag on mel de no tembaga on en anggin de 50 kilogram hag on wandeg latfag.

⁶Eyog de, eneyog hwililip angge tembaga on fam hwililip deg latfag ne at um fam de inggisim tembaga on hwik dik lauk angge hareg latfag.

⁷Inggisim ai ombo senetuk anggere e sum yihiruk angge fam deg on anyo obahare hag deg latfag, ne inggisim ai enggat werelegma etano anggin de 7 kilogram hagdoho deg latfag. Airoho deg ma ap sehen foroho on misig de dog en warik wam no ulug mapnuroho hulireg latfag angge anyo alukwema walug lauk katfag.

⁸Airoho deg ahun wilibik watfagdeg, inatlug it ap Israel on en sehen foroho on etmano fam hwiroho hweag-esauk kwit de, “Etma hit de nunggwe ale duruk kahep? Dog yapuk kahep a? Yaho hit hun Saul amingming angge, an de ap Filistin nahun! Ap misig eke ambong seroho wambik watlug an ninim lang-lang amul en eneko mondorik manik.

⁹Nit airoho dog yapuk kwit ai lang-lang atuk men an nowatmisi halug de nit nenenda fano fam hit henamingming angge amul, famen de an nalong atlug an den watmin halug de, hit nit nenamingming angge amluhup.

¹⁰Ketia neg hit ap Israel on en sehen foroho lahep henap henolok kwelap-henepuk kahi ai. An ninim wal-wal amukohon ap misig eke momaliek ahi!” ulug hweag-esebag.

¹¹Airoho enolok kwelap-enepukmu at Saul inim ap at inim welatfag on etmano inim en enesanggo holfagdeg de, youk lauk kwit enakol neg atfag.

¹²Daud aire hun Isai it ap homi Yehuda on famen o Betlehem en de obam Efrat ahun welatfag. Aren de omaliki ap angge neg enebe ligin en welatfag, ne at Saul en ap homi melal-enepuk li etare at Isai ebere mundoho sobal[51] atfag.

¹³At Isai omaliki henahan etanore at Saul inim dog yabik lebag, amloho wandeba on de unuk Eliab, ombolim de unuk Abinadab, henahaneg on de unuk Syama.

¹⁴Ne, at Daud de omalik elabo on. At Daud owesi lohon henahan etano at Saul inim dog yabik laukmu re,

¹⁵At Daud de Saul anyo embeselug akni en owam domba etmano hwalduk katmin ulug o Betlehem lebag.

¹⁶Nukoho 40 en hunduko aire at hun Goliat anyo it ap homi Israel on erareg ma etmano horogdoho aik lalug de enolokap kwelap enepuk katfag.

¹⁷Airoho neg durukmu, nukoho misig salim at hun Isai en Daud hweag-utuk kwit, “Haren 10 kilogram soabuk weraho angge eiya mel, roti 10 en eiya mel wamihin deg de, it howesi ap enasehen foroho on en enobam sabo salegma etma og-eneplug lakin.

¹⁸Airoho og-eneplug lauk kwit de it sehen foroho on enowesi enelukwema unduhuk lit melal-enepuk on fahet de no keju 10 en eiya mel og-eneplug lakiyug. Lalug de it howesi enebe deg ale fahet hein og-esalug de hat demdoho ininim ambi ahesareg enebe mun ohwaloho neg wereg ma esalug waha ulug an noluk amag dohore eneg angge walug manu.

¹⁹It enebere at Raja Saul inim it ap homi Israel on mel o Ela donggoma it ap Filistin enap mel dog yapuk kwit wereg ai,” ulug hweag-etfag.

²⁰Airoho hweag-etfag ma, likia hubetdohore, at Daud inatfagdeg laroho fik-fouk debag. Aren wam domba hwalduk katfag on etmano ap foroho wereg on fam eke hobale folug, at ebere walug lamin angge ulug fouk debag angge etmano og-hebagdeg de at akni en airoho diyug ulug melale febag ale higitdoho lebag. At lebagdeg o sabo salegma etmano aik lebag hag de it ap homi Israel enap de dog yapukmu yabik kul ulug enap durukmu lebag.

²¹It Filistin enap sehen foroho on et, it Israel enap et de dog yabukoho lahe ulug fik-fouk duruk katfag.

²²Airoho durukmu lebagdeg de at Daud anyo en walug lebag angge etmano, it ap sehen foroho etmano enalili angge foroho on etmano fam folug de, at de buroho it owesi etmano inim ambi amul ulug de dog ebe yapukmu etmano lebag.

²³Airoho lebag famen de, at lebagdeg it inim ele matuk men de, at Goliat anyo enalukwema aik watfagdeg nin salim uruk hagdoho it Israel enap enolok ale uruk katfag. Airoho enolokap kwelapuk ale anyo ele urukmu at Daud anyo en oho esanggo holfag.

²⁴It ap homi Israel on en Goliat anyo folfolo hebagdeg de it enakol en wilipuk katfag.

²⁵Iren eke en eke fam uruk kwit de, “At ai hakiek ahi!” ulug uruk kwit de, “Ele en nenahummu nenolok kwelap-nenepuk ale holiek ahi! At nit nenowe Raja Saul anyo en abug uruk kwit de, ap sa en Goliat watuk halug de onggo hum angge og-uruhuk ulug isi anyo. Ai neg fug famen de at raja ai en de ap fam ahaloho og-uruhu, ne ap ai isinga akni fam de it pemerintah enobahet di angge su angge onggo foruk on anyo foruk kamuhup fug[52] ulug lole fesehu,” ulug uruk katfag.

²⁶Airoho urukmu holfagdeg at Daud anyo en uruk kwit de, “Ap Filistin on sing wereg on ai en ambong sisereg angge, ap homi Allah oluk mundoho wereg on omaliki enesehen foroho fam enolok kwelap-enepuk ai ambi!” ulug ebag. Airoho ebagdeg aren ap sehen foroho on misig eke fam hein og-hauk kwit de, “Ap homi Israel on enunuk siahapdoho foruk on ai furoho elehap debeheg, ap Filistin on ai ebe wareheg, duhu ahun aire nunggwangge og-umuhup?” ulug hein og-hebag.

²⁷Airoho hein og-hebag ma ap homi etmano en de raja en di angge og-uruhuk ulug abug ebag angge etmano hweag-etfag.

²⁸Airoho urukmu at Eliab Daud owe wandeba on anyo hol-hauk men de at Daud it ap sehen foroho on etmano inim enele matuk mu hol hebagdeg, aren Daud fam olokdoho bet-duruk kwit de diroho ebag, “Nunggwelug hat suma wahen abi? Domba nunggwe en hagdoho wereg on etanore ap san o leimu hwal-napuk kamag ulug mingming debelug wahen abi? An nambong se nomalik ulug dil wahen ale aire an noluk; hat wahen aire we ap dog yapukmu hil esamin ulug wahen,” ulug bet debag.

²⁹Airoho bet debag ma at Daud en onggo uruk kwit de, “An de we hein og-isihi! An den siag dihi ale eke wereg a?” ulug ebag.

³⁰Airoho ebagdeg de at anyo it ap sehen foroho on amu on etmano fam inim hein og-enebik lebagman, iren onggo higit ale neg hweag-etfag.

³¹Airoho ebag famen de ap foma Daud ele urukmu holfag on en de walug at Saul hweag-irik lebag ma, at Saul en Daud an nolohotma inaik wamag ulug wol debag.

³²Wol debag ma at Daud en Saul fam uruk kwit, “Nakni, nit ap Filistin ai fam de nenakol dul fug! An hamingming angge at inim yapmin,” ulug hweag-etfag.

³³Airoho hweag-etfag man de at Saul en uruk kwit de, “Airoho dimihin fug,” Hat hebe mun dit-dot deg lahen, ne at de ebe mun dotman angge dog yapuk katsi ahun. “Anggere haren de keroho hinim wal-wal ahep halereg?” ulug hweag-etfag.

³⁴Airoho hweag-etfag famen de at Daud en uruk kwit de, “Nakni hun log, an hamingming anggere neitogdoho an hamingming angge nakni en andomba hwalduk kahi. Airoho hwalduk men olomene olok on singa oho, beruang oho, domba senggelmin ulug waharuk halug de,

³⁵an hamingming angge en olomene hag on anyo mitlik-mutlug lalug de ebe ware folug domba anyo delduk kahi. Ne, singa olomene hag on anyo en mel, beruang anyo en mel, an hamingming angge senggel napmin ulug duruk halug de, an hamingming angge en anggolobag sene fulug de, binggi ware foruk kahimu waratuk.

³⁶An hamingming angge en de singa oho beruang oho watihik neg, ne ap Allah apeleg on ai en ap Allah oluk wereg on omaliki sehen foroho on fam ambong siseroho enunuk sebeloho foruk aire olomene etma hagdoho aruhu angge en uruk.

³⁷Nakni TUHAN en an hamingming angge singa famen mel, beruang fam en mel, del napsi. At ai en neg ap Filistin on ai fam en del napmisi,” ulug hweag-etfag. Airoho ebag ma, Saul en uruk kwit de, “Fano anggere, TUHAN en neg hat let-hapuk kamag,” ulug hweag-etfag.

³⁸Airoho hweag-etfagdeg de, Saul en de sum dog yapuk kwit wan-duruk on, sum ebe besi fam wirig angge anyo misig Daud fam wan-debebag. Ai en unggul asum tembaga on anyo Daud unggulmu bug debebag.

³⁹Airoho debebagdeg fotogdohore Saul en enggarog anyo sum besi on anyo fam Daud en bug debebagdeg, aren lauk ale wal-hebag, famen de Daud en airoho on etma wan-duruk ale apeleg deg ma nong-hong ebag. Airoho nong-hong ebag ma Daud en Saul fam uruk kwit de, “An hamingming anggere sum su et anggere lahi ha fug halereg,” ulug hweag-etfag. Eke uruk kwit de, “An de airoho wan-duruk kahi fug,” ulug hweag-etfag ma, sum dog yapuk kwit wan-duruk katfag on abirangge anyo nonggoloho febag.

⁴⁰Airoho nonggole febagdeg de, aren andomuk domba hwalduk angge anyo og-halug de, aren helep sap-sabel on neg ikman foaben angge memeroho webagdeg de, asum yohwatuk angge elma yohwatfag. Airoho yohwat halug enggikmu leheik lamin on ulug wepdohore hun Goliat wereg ma etmano ambi amul ulug lebag.

⁴¹At airoho lebagdeg anunuroho welam fugmen de Goliat anyo ebe mapnu angge atam walug waharukmu at ebe ombolim waharuk kwit de Daud wereg ma horog aik waharuk katfag.

⁴²Famen de Goliat en Daud il hebagdeg ebe fubi deberuk kwit de, at Daud ebe buhundeg lit mun dit-dotdeg latfag ma unda yatuk kwit horogap duruk katfag.

⁴³Airoho duruk kwit de, Goliat en Daud fam de diroho ebag, “Domuk aire nunggwangge fahet? Haren de an mene behen a?” ulug uruk kwit de, aren kembu dewa enunuk yiko Daud hururung duruk katfag.

⁴⁴Ai en eke Daud ahummu olokap kwelapuk kwit de, “Daud, yoho oroholeam aik ma! hat hebe aire suwe mel, mene hag angge mel en nowag ulug og-esamin,” ulug uruk katfag.

⁴⁵Airoho uruk katfag famen de, at Daud en onggo uruk kwit de, “Haren an ninim yapmin ulug de henggarog mel, wol-dog mel, fit mel fam waharuk kahen, famen de an de TUHAN Omamne Mun hum wereg on, ap homi Israel on sehen foroho on haren enunuk sebeloho foruk kahen on enakni TUHAN Allah anyo unuk fam hinim yapul en waharuk kahi.

⁴⁶An den hat halong elehapdoho hobahamin deg hat hunggul kong dimin. Yoho su salim at hobahare inim it Filistin on en sehen foroho on enebe inim de suwe mel, olomene mel en nowag ulug og-esamin. Airoho atmisi ai fam ap homi Israel on en enakni Allah apne wauk on wereg ulug ap homi kwenangma on enoluk aruhu.

⁴⁷TUHAN en omaliki del-enebukwag ulug de karog mel, inggisim mel fam del-enebukwag ulug de karog mel fit mel fam del enebuk fug alereg anyo ulug ap homi suma wereg on enoluk atmisi. Aren neg dog su yabukwag ulug borukmu, Aren neg hit henebe nit nenenggikmu og-nesamisi,” ulug hweag-etfag.

⁴⁸Airoho hweag-etfag ma, Goliat anyo Daud horogdoho aik watfagdeg at olohotma aik laminen ulug buroho watfag ma re Daud ohore it ap Filistin on eraroho unduhuk fil etmano at dog yapmin ulug lebag.

⁴⁹At airoho lauk kweleg Daud anyo asum yohwatuk angge elma enggik kwelabe febagdeg, helep anggen misig eke okore Goliat fam hwik ha lebag. Hwik halauk men de helep anyo en de Goliat elaha sogdohore unggul owag erapdoho at ebe orohole belabeg kwenangma ying-atfag.

⁵⁰Airoho debag ma Daud anyo buroho Goliat wereg ma etano aluluk inaik lebagdeg, aren Goliat en enggarog asum yiko kwelabeg angge anyo famen lilisanalere, ap Filistin on unggul anyo kong-debag. Airoho we helep anggen kwelabe folug Daud en Goliat along eleho folug ebe binggi watfag ai! It ap Filistin on etmano hauk men enowe anyo mundoho waratfag ma hebagdeg de heiye wilipfag.

⁵¹

⁵²Airoho wilipukmu it ap Israel on mel, Yehuda on mel de enahayeg en amit-mit duruk kwit ap Filistin on etmano mug-eneplug de o Gat[53] mel o Ekron sokole kwik laukmu en hulimu etma feseik lebag. It ap Filistin on enahap bale fesebag on de o Saaraim lauk kwe kobokwe hunduko etma waroho dik-dak uruk katfag ai!

⁵³Airoho muko feseik lebagdeg de it Israel on etmano enambol somban watfagdeg de it Filistin enobam sabo salegma etmano huhul hwelebag.

⁵⁴Daud en de hun Goliat unggul baleg anyo webagdeg o Yerusalem walug lebag, famen de Goliat asehen andog angge neg de Daud obam sabo salegma febag.

⁵⁵Saul il hauk men de Daud anyo dog yabik laukmu hebagdeg, aren it panglima Abner anyo fam hein og-hauk kwit de, “Abner, nimi aire hun sa amloho?” ulug hweag-etfag ma, Abner en uruk kwit de, “Nakni hun log an hamingming anggere mun napeleg,” ulug hweag-etfag.

⁵⁶Airoho hweag-etfag ma Saul en mingming duruk kwit, “Wene ai fahet de furoho hein og-enebik lakin,” ulug mingming debag.

⁵⁷Airoho ebag ma re Daud anyo en Goliat ware febagdeg o sabo salegma etmano waharuk men de, Abner en de Saul akit aik lowag ulug hondoholug lebag. Ne, Daud de hun Goliat unggul baleg anyo senegma welatfag.

⁵⁸Airoho lebag ma Saul en Daud fam hein og-hauk kwit de, “Ahwi namloho! Hat de hebe sa amloho?” ulug hein og-hebag ma, Daud en onggo uruk kwit de, “An hamingming angge sure hun Isai o Betlehem on anyo amloho,” ulug hweag-etfag.