Read Ninia Yali 1 SAMUEL 18 Bible Online

1 SAMUEL 18 - Ninia Yali bible

1 SAMUEL 18

¹Airoho hweag-etfag ma Saul inim Daud inim enele nebagdeg de, Saul en Daud anyo pegawai Saul fahet welamag ulug unduhuk febagdeg, nukoho anyo huli en de hakni hisinga enobam lamihin fug ulug hweag-etfag fug mu etma welatfag. Nimi Yonatan hun Saul amloho anyo it enele matuk on esanggo holfagdeg de, aren Daud fam enda lit haukmu at ebe onggwareg enda hundig dauk hag, Daud fam oho airoho enda hundig debag.

³Airoho debagdeg Yonatan en hombuk balduk kwit de, “An Daud ninim hundig lit neg mundoho-mundoho welamuhuk,” ulug hombuk balfag.

⁴Airoho duruk kwit Yonatan en asum jubah wandeg latfag angge anyo nonggoloho Daud og-ereheg, asum dog yapuk kwit wan-duruk on mel, enggarog mel, asehen owag mel, ombahaluk hagdoho bug duruk angge mel, mundoho og-etfag.

⁵Airoho og-etfag ma wereg lit Daud de Saul en yabuk og-etfag on anyo fik-furoho neg duruk katfag. Ai fam Saul en at autsi tentara etmano enowe leho on perwira welamag ulug unduhuk febag, Daud ebere it ap sehen foroho on en mel, at Saul amingming angge en mel, obam enahayeg deg latfag.

⁶Daud anyo hun Goliat ap Filistin ahun anyo warik lebagdeg waharukmu re ap sehen foroho enap omano enebe eraroho o kota kwik waharukmu re, it hwelani o ap homi Israel on wereg kwe etmano abirangge at Raja Saul anyo waharukmu orohole baldul ulug wilibik watfag. Wilibik watfagdeg de iren suni enahayeg fam uruk kwit de, no rebana mel, kecapi mel etmano deldil waharuk kwit siril-mulug dil waharuk katfag.

⁷ Iren airoho siril waharuk kwit de, hwelani etmano en de suni diroho uruk katfag, “At Saul en nenaselei on de we beribu-ribu neg enowatsi, famen de Daud en neg de, berpuluh-puluh ribu en enowatsi,” ulug il wilibik waharuk katfag.

⁸Airoho il waharukmu Saul en esanggo holfagdeg aren boruk kwit de, “Daud en de ap berpuluh-puluh ribu watsi behesareg uruk ne, an den we beribu-ribu watsi ulug uruk, anggere we horog ketia at ai raja unduhuk fouk kohoreg ai!” ulug de Saul ahummu olok hum atfag.

⁹O anyo salim en anggere Saul en Daud fam ahummu het-boruk katfag.

¹⁰Anyo salim en likiare Saul anyo obam olma aren anggisim enggikmu seneko weregman de fetagdoho etano Allah en mungguat heime olok on obam mondorik watfag ma, aren ap wenenebo on en duruk hagdoho nenek-fenek hauk katfag. At airoho duruk li etare Daud de eitogdoho ambinggong unuk kecapi anyo kong-duruk men.

¹¹Airoho durukmu Saul en enda wenggelduk kwit de, “An den fit au fam de Daud au obam fug-fug debeminmu, obahat inim fug-fug deg latmisi,” ulug wenggelfagdeg de, Saul en inggisim anyo enggik birenam Daud fam hwik-ha lebag, famen de Daud en fanoroho ohwal debag.

¹²Airoho debag famen de atuk katfag fug mu, Daud de akni TUHAN en mapnuroho foroho, ne an de TUHAN en fotog neheik ulug wenggel hebagdeg, ai fam de Saul en Daud fam akol neg atfag.

¹³Airoho atfagdeg de Saul en Daud anyo at obam bumbuk ap raja wereg ma etmano en okore tentara enebe 1.000 en enowe melal-enepuk on komandan welamag ulug feik lebag. Airoho feik lebag ma re Daud en de autsi at inim lohwaleg welatfag on anyo dog yapuk kwit de, melal-enepuk katfag.

¹⁴TUHAN en Daud let durukmu, yabuk aren duruk kamag ulug obam febag on etmano ambiangma fano neg duruk katfag.

¹⁵Saul en hauk men di ale su ale Daud en duruk on etmano ambiangma fano neg atuk mu hauk kwit de Saul anyo ekenim obam akol duruk katfag.

¹⁶Famen de it ap homi Israel on mel, Yehuda on mel, enebe abirangge en de at Daud en melal-enepuk kwit hum ale it fahet along ale disimu ulug de iren at obam enenda hundig on deg latfag.

¹⁷Airoho neg durukmu Saul en, Daud at enggik en watuk alere fug en ulug de ap Filistin enap en dog yapuk men warukwag ulug abug balfag. Airoho abug balfagdeg de, nukoho misig salim de Saul en Daud fam uruk kwit de, “An nahaloho wandeba on hwele Merab de hat hinim lombo henobahakuk, famen de haren hambong sereg lahen ale TUHAN obahet dog yapuk kwit duruk kahen ale unug-hahun halug,” ulug hweag-etfag.

¹⁸Airoho hweag-etfag ma Daud en onggo uruk kwit de, “An hamingming angge sure sa deg en, ne it ap homi Israel on fam en de an hamingming angge nakni mel de it famen en nunggwe ale eke deg en, an hamingming angge hun raja eyamal aruhuk no?” ulug hweag-etfag.

¹⁹Airoho hweag-etfag famen de, Merab anyo Daud inim lombo deberuk li horog aik watfag man, fetagdohore, hwele anyore nimi Adriel o Mehola on mel lombo debebag.

²⁰Ne, hwele Mikhal Saul ahaloho amu on eke en de Daud fahet enda nebag. Airoho debag ale fahet Saul hweag-etfag ma esanggo holfagdeg de Saul en de ai fano neg bebag.

²¹Aren wenggel-hauk kwit de, “Daud olohoream aruhummu it Filistin enap en warukwag dohore, an den nahaloho Mikhal ai hwelahun a, herim a, ulug hein og-hahuk,” ulug bebag. Airoho bebagdeg de Saul en Daud fam enggik bireneg angge hweag-utuk kwit, “Ketiare hat an neyamal aruhun,” ulug hweag-etfag.

²²Airoho bebagdeg, aren autsi pegawai fam de ling-long Daud hweag-irik lowag ulug mingming enepuk kwit de, diroho hweag-umuk ulug hweag-esebag, “Hun nenakni oho at autsi pegawai ohore hat hobahet enendama enahayeg deg, anggere haren ahaloho fahet helenggen kuk lire eiyaha lam, ulug hweag-irik lakiyug,” ulug hweag-esebag ma, at Daud hweag-irik lebag.

²³Airoho hweag-irik lebag ma iren, diroho ulug ebag on anyo esanggo holfagdeg de, at Daud en onggo uruk kwit de, “An de ap nenggik eleg on deg lit, an famen duk on eke wereg fug, hiren de ap raja eyamal atuk ale aire sereg ulug uruk kahep a!” ulug hweag-esebag.

²⁴Airoho ebag ma, pegawai etmano en Daud ele ebag on anyo raja anyo hweag-irik lebag.

²⁵Airoho hweag-irik lebag ma Saul en, Daud fam diroho hweag-umuk ulug hweag-esauk kwit de, diroho ebag, “At hun nenakni ai en hwe onggoma foruk on fahet de ap Filistin on enahap enenggalimu on ambelahap 100 en angge, at hun log ai aselei on etma onggo enowaruk hag de ap ai enowatlug enahap baloho og-nirik waruhu eheik iyug,” ulug hweag-esebag. (At Saul en Daud ap Filistin on fene en warukwag ulug abug balfagdeg duruk katfag on de ai.)

²⁶Airoho hweag-esebag ma it autsi pegawai etmano en at raja en ebag ale anyo Daud fam hweag-irik lebag ma, Daud en de hun raja en eheik on aire fano eheik bebagdeg, li di salim ulug momale febag on anyo aik lauk eleg kweleg at Daud anyo autsi inim o ap homi Filistin on wereg ma etmano lebagdeg, aren ap enebe 200 en enowatfag. Airoho enowatlug aren de enahap enenggalimu on etmano balfagdeg walug de, Saul en ebag on etano misig eke belabe fouk fug angge de at Saul og-irik watfag. Airoho og-irik watfag ma Saul en ahaloho Mikhal anyo Daud inim lombo debebag.

²⁸Airoho debebag ma, Daud anyo TUHAN let duruk ulug wenggel debag, ne at ahaloho Mikhal anyo en ohore Daud fam enda mun hundig deg latfag.

²⁹Airoho neg deg ma Saul en Daud fam akol neg atfagdeg, aren olok obam febagdeg Saul oluk wereg latfag huli aire mundoho erim duruk kwit neg welatfag.

³⁰It ap homi Filistin on en enowarukoho waharuk li etmanore ap tentara Saul en leho on etmanore horog ha hag deg latfag famen Daud neg de folo-folo enowaroho feseruk katfag. Airoho durukmu Daud unuk eke inim hum atuk katfag.