Read Ninia Yali 1 SAMUEL 19 Bible Online

1 SAMUEL 19 - Ninia Yali bible

1 SAMUEL 19

¹Saul en de amloho Yonatan anyo fam mel, it autsi pegawai etmano fam mel, hweag-esauk kwit de an den Daud waruhuk[54] en duruk kahi ulug hweag-esebag famen de Yonatan en de Daud fahet de mundoho enda hundig deg latfag.

²Aireg latfag ma Yonatan en Daud fam uruk kwit de, “Nayon en hat howatmin ulug duruk anggere henda wenggeloho! O sonore obale ling-longma herag atlug etma heraho lamuk.

³An de sono nayon mel leimu lahukdeg de an hat heraho fil etmano horogdoho unduhuk lit de, an den at hun nayon en hat hobam enda keroho boruk kwit duruk ulug de, inim nele uhukdeg, aren uhu ale aire hat hweag-huruhuk,” ulug hweag-etfag.

⁴Airoho ebagdeg Yonatan en Daud fam fano deg ale fahet akni Saul hweag-utuk kwit de, “Nayon, nakni hun haren nimi Daud ai ebe alema re fouk ale duruk kahen ale ai duk fug. Aren hat hobam siag on eke duk fug angge hun hat hobahet aren humale disi anggere.

⁵Aren hun Goliat anyo warikoho at ebe waruk hagdoho duruk kweleg famen de, TUHAN en at fene en ap homi Israel on enalong humon og-nesasi. Nakni haren de airoho disi ale aire mundoho hil hauihin, ne hauihin deg hat etano li em hahayeg dirihin. Famen de ketia nunggwelug hun nayon haren ap siag disi fug ahun ai siahap-biahapdoho femin ulug deheg, aren ebe su disi ulug mel indip eleg kweleg Daud ebe watmin ulug mel, duruk kahen?” ulug hweag-etfag.

⁶Airoho hweag-etfag ma Saul anyo en amloho Yonatan ele hweag-etfag on anyo furebebagdeg aren TUHAN unuk fam hombuk balduk kwit de, Daud waruhuk fug ulug hombuk balfag.

⁷Airoho ebag ma Yonatan en Daud wol-debagdeg aren akni inim enele matfag ale anyo mundoho Daud fam dindil-etfag. Dindil-etfagdeg Yonatan en Daud ebe hondoholug Saul akit feik lebag ma Daud en yabuk atam duruk katfag hagdoho Saul fahet duruk katfag.

⁸Airoho duruk kwit weregman weim it ap Filistin inim anyo nikangge silfagdeg yapuk ale indip debag. Indip debag ma at Daud en enowarik kuruk kwit mun felelengdoho enowatlug enalong elehapdoho fesebag ma, it etmano enakol en wilipfagdeg lebag.

⁹Nukoho misig salim de Saul anyo abit enggikmu seneko obam olma hwerieg latfag. Hwerieg weregman fetagdoho mungguat heime olok on TUHAN en mondorik watfag on anyo obam aik watfag. Ne, etali em de Daud de ambinggong kecapi anyo watuk kwit weregman.

¹⁰Airoho weregman de Saul en inggisim anyo fam de Daud ebe obahat luluk wereg on anyo fam fug-fug debemin ulug duruk katfag. Famen de Daud en ebe oho fahat-dauk kwit neg wereg ma, inggisim etmanore we obahat fam neg fug-fug deberuk katfag. Airoho duruk en de Daud anyo onggwareg en nahap wendaroho ulug wiliplug lebag.

¹¹ Airoho lebag ma hup anyo salim neg de Saul en ap enebe nunggwe en hagdoho Daud obam lalug at Daud ebe ben halug de hubetdoho binggi warukwag ulug mon-enepfag. Famen de hwe Mikhal Daud ohwe anyo en uruk kwit de, “Hat hup su salim wiliplug lamihin fug halug de, sono hubet de demdoho howaruhup,” ulug hweag-etfag.

¹²Airoho ebagdeg Mikhal en Daud ebe o jendela yendeg kwe en boroho belapfag ma Daud anyo koloroho wiliplug lebag.

¹³Daud anyo lebag ma re hwe Mikhal anyo en de it enobam olma on enanggembu wirig dewa anyo webagdeg de Daud ebe nohorukmu etano febag. Ai debebagdeg unggul fil de selimut mel, enunggul leko nohoruk angge wam kambing oruk fam wirig angge anyo febag. Airoho febagdeg de kembu wirig anyo aren selimut fam sebeloho febag.

¹⁴At airoho debebagdeg weregman de it ap Daud senerukwag ulug Saul en mon-enepfag on etmano watfag ma, hwe Mikhal en uruk kwit de, “Daud ebe ouk wauk,” ulug hweag-esebag.

¹⁵Famen de Saul en de, “Nikangge laluhupdeg Daud ebe deg ale aire hit hinil en neg ha lakiek. Ha lalug de, at ebe an den watmin en de, angge nohoruk angge etmat walug manu,” ulug mingming-enepfag.

¹⁶Airoho mingming enepfag ma re it anyo o ilonggoma kwik lebagdeg duruk men de kembu ilitdeg anyo enunggul leko nohoruk angge kambing oruk fam wirig angge anyo inim unggul fil wereg ma hebag.

¹⁷Airoho deg ma hebagdeg Saul en hwe Mikhal anyo fam uruk kwit de, “Nelaheg nea fug angge airoho lal-nabehen ai abi! An naselei on anyo at wiliplug lowag ulug let dehenma laha o!” ulug ebag. Airoho ebag ma Mikhal en onggo uruk kwit de, “Haren an lowag ulug wilibi-nobahamihin fug halug de hat hebe at howatmin ulug neg uruk en dihi,” ulug hweag-etfag.

¹⁸Daud koloroho wiliplug lebagdeg anyore hun Samuel akit o Rama lebagdeg, Saul en Daud obam duruk katfag ale etmano mundoho dindiloho hweag-etfag. Ai en Daud inim Samuel inim seberoho o Nayot lebagdeg etma welatfag.

¹⁹Famen de Daud anyo o Nayot Rama horogma etma wereg ulug Saul oluge febag.

²⁰Ai fam de Daud anyo senerik lowag ulug ap enebe nunggwe en hagdoho mon-enepfag. Famen de it mon-enepfag on etmano en esauk men de[55] ap nabi etmano esan misig lohwaleg angge Samuel anyo en melal-enepuk kweleg de enele ngai-wai angge dil, enebe si-mulug duruk katfag. Airoho durukmu it ap hun Saul en mon-enepfag on etmano oho Allah Aheime enobam atfag ma it oho enele ngai-wai angge duruk kwit siruruk katfag.

²¹Airoho duruk ulug wene anyo Saul fam hweag-irik lebag ma re aren ap foma amu on mon-enebik watfag famen de it anyo oho enele ngai-wai angge duruk kwit siruruk katfag. Airoho duruk neg katfag ma enggik henahaneg angge Saul en ap mon-enebik watfag famen de, it etmano oho nikale neg duruk katfag.

²²Ai fam de Saul anyo o Rama lebag. At lebagdeg o Sekhu en ik bohwe humon wereg ma etano aik lebagdeg aren, “It Samuel mel, Daud mel wereg ma re kema?” ulug hein og-esebag ma, it ap homi etma welatfag on etmano en hweag-utuk kwit de, “It de o Nayot wereg,” ulug hweag-etfag.

²³Airoho hweag-etfag ma re at anyo bekit o etma lebag, famen de at anyo oho Allah aheime obam atfag ma at oho ele ngai-wai angge duruk kwit siril o Nayot laukmu etma kwe hunduko dil lebag.

²⁴ Airoho dil lebagdeg at anyo o etma aik lebagdeg de aren asum horoho embeselug de Samuel olohotma siroho ngai-wai angge debagdeg at anyo waroho ying-atfagdeg hup hundig nukoho hundig abuluke kohouk yinggig latfag. (Ap homi en kelem uruk kwit, “At Saul oho nabi on aha a?” ulug uruk ale indip debag alere ai.)