Read Ninia Yali 1 SAMUEL 2 Bible Online

1 SAMUEL 2 - Ninia Yali bible

1 SAMUEL 2

¹ Airoho mot-duruk kwit, at hwe Hana en somban diroho ebag, “TUHAN en nendama nahayeg nobahakeik; Aren duruk on aire mundoho nenda nahayeg boruk ale neg duruk. At nakni Allah en let-napsimu, nenda nahayeg fam it naselei on etmano bilip-enepuk katmin.

²At TUHAN amu eneg wereg hagdoho eke mun amu eneg on eke wereg fug! We Aren neg nit mapnuroho fahat-nenusug.

³Nenakni TUHAN aire At Allah mun di ale su ale fahet fik-fu deberuk on deg lit, Aren neg ap homi en duruk ale higitdoho enawene bilinggoho ayo wit-enepuk on deg ma, haren hele seiale uruk kahen on aire bale fein! Hawonog fam ebe eleg kweleg hele en neg uruk kahen on ai hwili en bale fein!

⁴Ap naselei on enasehen owag de somboruruk kweleg, famen de ap homi enomamne elegdoho maben deg on enomamne atuk.

⁵Ap homi atam enangge nauk on humdoho wereg ma enahummu homoreg latswa on omano, ketia re we nauk on fahet heraruruk kwit ap yabuk onggo hwelaul-en ulug duruk on atswa. Ap homi atam obokdoho welatswa on omano ketia re enobam homo urukmu, enangge nauk on oho wereg neg. Hwe ibili on anyo re omaliki enebe sabiren mundoho endag-enepsireg de ketia ahayeg atuk! Famen de hwe omaliki humdoho welatsi on anyo re horoho embeseswa ma koloma yaroho wereg

⁶At TUHAN en neg ware-feheg, Aren neg olukap debeheg, duruk. Ap homi waratlug kwenang apma wambik laukmu etma Aren neg belabe feselug, etman oho re Aren neg lahabe feseik waharuk.

⁷Aren ap homi foma enenggik elegdoho feseruk, Aren neg foma enenggik werehapdoho feseruk, Aren neg ap homi foma sebele feseruk, eke Aren neg ap homi foma leho feseruk.

⁸Anggilik-anggolo hauk men neg, ap enenggik eleg on etmano leko feseruk, ne Aren ap homi ouk-bouk hauk kwit weregman ap homi enunuk eleg sebeleg on etmano loloho feseruk. Airoho debeselug Aren neg it enowesi enunggul unuk wereg on enoriap debeseruk. Airoho debeselug, Aren eneyabuk leho on fam duruk kamag ulug debeseruk. Kwenang apma doaleg on erahamu re At TUHAN angge neg, ne ai emberimmu re kwenang unduhuk wereg.

⁹Ap homi holoho neg duruk on halug de enakol eleg angge TUHAN apma welamuhup lit deg. Famen de it enobabut enolok on halug de o mun heik kuruag deg ma etma en eleg-atuk kamuhup. Ap homi enomamne fam enalong-atuk fug mu, ap homi enomamne fahet de an nomamne deg lahi ulug obam dip-debouk fug alereg.

¹⁰At TUHAN en bohol famen sipuk-delelang durukmu, ap homi TUHAN aselei on enakol atlug luluhun-lalahandoho amuhup. At TUHAN en kwenangma suma ap homi enawene bilinggoho katukdoho balduk kwit, along mun finik-fano on aire raja Aren momalsi on fam og-uruhu,” ulug airoho somban ebag.

¹¹Airoho somban ebag ma at hun Elkana anyo inim, at eyog indip kwe on inim, enobam Rama etmano watfag, famen de omalik nimi Samuel anyore o Silo bok atfagdeg wereg lit at Imam Eli anyo apma wereg lit TUHAN obahet yabuk duruk katfag.

¹²At hun Eli omaliki etma re enobabut mun kwasik deg lit TUHAN ele holoho duk eleg angge duruk katfag.

¹³Airoho wereg lit nit imam on welahe ulug de it ap homi Israel on fam de enendaman bolug neg debeseruk katfag. Iren duruk kwit de diroho duruk katfag ai: Ap misig eke en lahe wam waroho yalduk on ulug walug watlug, wam anyo osoho kweleg de, imam etmano let-enepuk on eke en aeg soap hag angge osohoma yalelduk angge walug watlug,

¹⁴aeg soap anyo fam waruk elma wam osoho angge anyo folog-esa kuruk men nangginig angge fologdoho lisulug wilibik waharuk eleg aire imam enengge uruk katfag. Airoho uruk kwit, ap homi Israel on en wam waroho yaldul on ulug o Silo walug waharuk on omanore airoho neg debeseruk katfag.

¹⁵Airoho duruk kwit, eke salim de wam baleg etmano sei yalduk on ulug, eneg elegman it let-enepuk on etmano waharuk katfag. Watlug iren it ap homi wam waroho yalduk on etmano hweag-esauk kwit, “At imam de wam osoho on erim deg anggere, wam ino oluk-oluk angge eta imam duruk on enobahet iring-enepul angge og-nemek,” ulug hweag-esauk katfag.

¹⁶Airoho hweag-esaukmu it ap homi etmano en onggo hweag-utuk kwit, “Nit wene melaleg wereg ale atam oroholeam de wam amug ai atam yaldul fano; ai mundoho halug neg de haren henda bemihin angge etma hwelamihin neg,” ulug hweag-utuk mu at let-enepuk on anyo en uruk kwit, “Eleg, ketia eiya neg og-nitmihin, ne haren airoho og-nitmihin fugmen de, an nabi angge lisikoho lahi,” ulug uruk katfag.

¹⁷Airoho neg duruk kwit at hun Eli omaliki biren etano en wam TUHAN obahet waroho feik waharuk on etmano along eleg boruk katfag ai fam iren TUHAN il hanim siag humon duruk katfag.

¹⁸It airoho duruk kweleg at Samuel ebe dorangge en de it imam on en sum TUHAN obahet duruk kwit wan-duruk katfag on etmano hag on aren sum hekel lenan il sako on fam seleben deg angge wan-debelug, TUHAN obahet yabuk duruk katfag.

¹⁹Tahun hindik-hundig etmano fam at Samuel isinga anyo ahun inim wam TUHAN obahet tahun waharuk halug waroho yalduk katfag on fahet, yalukoho lit waharuk kwit de sum jubah doron at isinga en seleben debelug og irik waharuk katfag.

²⁰Airoho neg durukmu at Hun Eli en hun Elkana inim ohwe inim enobam fanoap deberuk kwit, diroho hweag-esebag: “Hiren henomalik TUHAN obahet og irik waharuhup on su obalma, At TUHAN en omalik ekenim hat hohwe su fam og-utuk kamag,” ulug enobam fanoap debesebag. Airoho dulug de it etano enobam o Rama watfag.

²¹Airoho watfagdeg wereg ma at hwe Hana anyo TUHAN en obam fanoap deberukmu, aren ap angge henahan inim, hwelani angge biren inim endag-enepfag. Ne, at Samuel anyore ebe eke inim log atuk kwit TUHAN obahet duruk katfag.

²²At Eli ebe mundoho sobal-atfag man, it omaliki etmano en ap homi Israel on fam debeseruk ale etmano fahet hundig ik-wag waharukmu esanggo holduk katfag. Ne, it Eli omaliki en de homi O Sabo TUHAN ebe enam-aik waharukmu ulug wirig latfag on anyo sokolma yabuk duruk on etmano inim nohoruk katfag ale aire at Eli oluk deg latfag.

²³Airoho neg duruk katfag ma at Eli en omaliki etano hweag-esauk kwit, “It ap homi mundoho en an hweag-nirik waharuk kwit de, Iren enobabut siag airoho neg duruk, ulug hweag-nirik waharuk etma, nunggwelug hit airoho duruk kahep?

²⁴Nomaliki mun airoho duk fug. Hiren duruk kahep ale ai fahet de it TUHAN omaliki en dindilduk aire mun kwasik deg anggere!

²⁵Ap homi en enori amu on fam siag duruk halug aire At Allah en inibil-am alereg; famen de ap homi TUHAN fam siag duruk halug de ap sa en let-enebuk alereg?” ulug komo-enepfag. Famen de At TUHAN en enebe binggi enowarikoho angge atlug de enakni Eli en komo enepfag on anyo furebebag fug.

²⁶It airoho duruk katfag famen de, at Samuel neg de ebe eke inim log atuk mu, At TUHAN en oho ahayeg obam feheg, ap homi humdoho en oho enahayeg obam feheg, neg duruk katfag.

²⁷Nukoho eke salim de ap nabi misig eke hun Eli akit lebagdeg de At TUHAN en diroho eheik ulug, hweag-irik waharuk kwit de diroho ebag, “It hombasi Harun mel at eyog indip kwe on mel etmano ap raja Mesir ahun anyo amingming angge atlug wereg ma, An nebe Harun akit enam-atihik.

²⁸ Airoho enam-atihikdeg, ap homi enunggul unuk Israel on mundoho etmano en de at Harun eyog indip kwe on An nobahet duruk on welamag ulug momaldihik. Airoho wereg lit de wam waroho yaldukmu etmano fahet deheg, amben fano angge anyo yaleheg, An ninim nenele ukoho lit halug sum imam en wan-duruk katfag on amigmu yihig angge efod [7] anyo wandoho kwik waheg, duruk karuhu. Ne, it inim, iren ondohoma on inim, de wam An nobahet waroho yaldukmu mezbah wirig on emberimmu yalik waharuk on etma foma it neg hwelauk kamag ulug hweag-esauihik.

²⁹Aireg anggere, hat de nunggwelug An nomaliki enunggul unuk on etman wene melaleg higitdoho wam waroho An nobahet feik waharuk on hil mumiroho[8] kwelaboho neg lahen? Hat hun Eli nunggwelug An nalong bolug leho nobahauk fug angge homaliki enalong boruk kwit, it An nomaliki enunggul unuk enap en wam An nobahet waroho feik waharuk on etmano en fanoma etmano it hwelalug nauk kwit enebe endag-atuk kamag ulug embeseruk kahen?

³⁰An nebere it ap homi Israel on enakni TUHAN Allah en atam wene abug katukdoho uruk kwit, hat heyog indip kwe on inim ne hat hunggul unuk on inim imam wereg lit, mundoho-mundoho An nobahet neg duruk kamuhup ulug irihik anyo. Famen de airoho irihik on anyo An nerim atuk ai! Indip de it ap homi An nalong bolug leho nobaharuk on de An den inim leho fesehuk, ne ap homi An sebele nobahalug duruk on de An den oho sebele fesehuk.

³¹Hesanggo holin, An den hat heyog indip kwe on, ap hat hunggul unuk fam on en ap sauwe on mundoho enowaruhuk li enam aik waruhu mu mu, ap hat heyog indip kwe on misig eke oluk weregman sobaldoho kungguk uhu fug lit deg.

³²An den ap homi Israel on en amu on fam fanoap debeserukmu, di on su on debeseruk karuhuk on etmano hil halug henda hesileheg,[9] hahummu het-deheg duruk kwit kumu-esauk karuhun, ne honggwareg hat hahain elekwe on de enebe mun sauwe deg kweleg neg waratil lahup.

³³Famen de haren ondohoma on en ap misig eke oluk wereg lit An nobahet duruk kamag ulug ene fohukmu at ebe imam wereg lit An nobahet duruk karuhu. Famen de at[10] ebe mun il hupnig on aruhureg, inggilik-anggolo doho welaruhu. Ne, haren ondohoma on fomane mundoho waramuhup.

³⁴An den di on su on ihi eta demdoho eheik ulug eneg deg ma howag ulug ne ebe demdoho aruhu ulug de hat homaliki biren angge Hofni inim, Pinehas inim de nukoho misig on fam waramuhup.

³⁵It airoho waramuhup men neg de An den ap An nil hanim duruk kamag ulug An nele holoho An den diroho diyug airoho diyug ulug hweag-utuk ale holoho duruk on momaluhuk. Ne, at ai fam de it raja welamuhup on An den momaloho unduhuk fesehuk on etmano inil hanim wereg lit imam welamag ulug aren ondohoma on aire debesehuk.

³⁶Ne, it haren ondohoma on enoluk welamuhup on de at imam ai fam akit lalug uang mel, nauk angge mel, heng dik lauk kamuhup. Heng dik lauk kwit de diroho uruk kamuhup, Nasiburu we misham nauk on hwelamin en de imam etma let-enebin ulug fano beiyek,” ulug uruk karuhu, ulug abug hweag-etfag.