Read Ninia Yali 1 SAMUEL 20 Bible Online

1 SAMUEL 20 - Ninia Yali bible

1 SAMUEL 20

¹Airoho debag ma Daud anyo o Nayot Rama horogma etman buroho lebagdeg Yonatan inim ambi atmin ulug lebagdeg hein og-hauk kwit “An nasiag de ke? An den hat hakni fam de olok on de ke deberihik mu, ne ne siag de ke dirihik mu aren an nowarikoho neg duruk?” ulug hein og-hebag.

²Airoho hein og-hebag ma, at Yonatan en onggo uruk kwit de, “Airoho uruk eleg, nakni TUHAN owag angge re hat de howaruhu fug. An nakni en de aren endama fano on boruk ale oho, endama siag ale wenggelduk on oho an hundig noluge foruk. Anggere aren airoho duhuk ulug wenggelsi halug ohore herahalep fug. Ai halug de haren uruk kahen on etma re seiale uruk kahen!” ulug hweag-etfag.

³Airoho hweag-etfag ma at Daud en onggo uruk kwit[56] de, “Haren an nobam mun henda hundig nusug lahen ale aire at hakni mundoho oluk deg ma re, hat henda hesiluk no ulug de wene ai demdoho hat hweag-hutuk ale embesesi ai. Nangginoho ahi ulug famen ohore, nakni TUHAN oluk wereg on anyo owag, anggere dik-demdoho an nebere wararuhuk lit deg!” ulug hweag-etfag.

⁴Airoho ebag ma at Yonatan en uruk kwit, “Haren diroho nabin ulug heng imihin halug de an de dimin neg,” ulug hweag-etfag.

⁵ Ai ebag ma at Daud en uruk kwit de, “Diroho, ebere sono Soni Bigalem Keron deg ma soni esetuk salim deg ma an de hun log ai inim nahuk ulug deg salim. Famen de haren fano bemihin halug de an o leimu herag-aik lamin deg o hau hup huli welaruhuk.

⁶Ne, hat hakni en lahe at de nunggwelug waha fug ulug hein og-heauk halug de, haren hun ai fam hweag-utuk kwit de, “At de o Betlehem wam tahun hindik-hundig waharukmu waroho forukmu anyo it aknisi isingasi, ahain elekwe on mel fahet waroho femin en ulug de folo-folo lauk kahi ulug, an hweag-nutlug laha,” iuk.

⁷Airoho uruk men lahe at raja en Fano, uruk halug aire an nahap wendareg laruhu, famen de at hun ai olok atuk halug de, at anyo ebe alema re feikoho disi au beiyug.

⁸Nit hat ninim nenakni TUHAN il hanim nenele, Airoho duruk kamuhuk, ulug wene sali watuhukmu ulug an den hat hobam let-nabin ulug hweag-hutuk kahi. Famen an den siag duruk kahi halug de we haren neg binggi nowariyug, ne hakni en nowarukwag ulug at enggikmu re nobahauk fug,” ulug hweag-etfag.

⁹Airoho ebag ma at Yonatan en uruk kwit de, “Henda firuk fug! At nayon en lahe hat alema re hobahamin ulug duruk halug de an den hat hweag-huruhuk lit deg,” ulug hweag-etfag.

¹⁰Hweag-etfag ma at Daud en hein og-hauk kwit, “At hakni en hat onggo ele olok fam hweag-hutuk halug de, an de san nobam noluge fohu?” ulug hweag-etfag.

¹¹Hweag-etfag ma, at Yonatan en uruk kwit de, “Ahwi, nit de o leimu lakohon ma.” Ebagdeg it enebe birenet seberoho o leimu lebag.

¹²Lebagdeg at Yonatan en Daud fam uruk kwit de, “Sono hubet ane hau ane, o ketia eiya hag deg li an nakni en enda keroho wenggelduk ulug aire hweag-nomag ulug mingming duhuk deg de, aren lahe hat hobam obabut fano ale duruk halug de wene hobam mondorik waruhuk ai. We At it ap homi Israel enakni TUHAN Allah niren uruk kahe on su hat nim, an nim il kumu nenusug welamag.[57]

¹³Ne, at nayon en lahe hat hebe alema re hobahauk ale duruk halug ohore hat hebe ohwale fahat dowag ulug de hweag-huruhuk neg. An den ihi ale duhuk fug halug de At TUHAN en neg an binggi nowarukwag. At TUHAN en let duruk katsi hagdoho hat oho TUHAN en neg let hapuk kamag!

¹⁴Ne, an nebe noluk wereg halug de At TUHAN il hanim nenele seberoho abug wene marehe on ai ebereg lit an nobam de higitdoho neg diyug. Famen de an nebe mundoho eleg-aruhukmu halug de,[58]

¹⁵ an nomaliki nambiangma on fam haren higitdoho debeseruk kwit neg welamuk. Ne, At TUHAN en it haselei on mundoho elehapdoho feseruk halug ohore,

¹⁶nit hat ninim en nenele seberoho abug wene marehe on aire bal-aruhu hayog. Ne, bal aruhu halug de At TUHAN en neg hat unggum og-huruhu,” ulug hweag-etfag.[59]

¹⁷Airoho hweag-etfagdeg, at Yonatan en de Daud fahet de onggwareg ebe enda hundig dauk hag deg lit de enggik bireneg angge eke at Daud en nenda hundig hapuk karuhuk ulug sali watnimin ulug mingming debag.

¹⁸Airoho ebagdeg at Yonatan en Daud fam uruk kwit de, “Sono re Bigalem Keron fahet eseruhup salim. Anggere e siburu nakoho hweriatuk angge fam etano hat hobale koloreg ma ai fam enoluk aruhu lit deg.

¹⁹O hau oho nikale! Deg anggere lamihin deg de helep kabogdeg on[60] ambol fil hobale atam heraho latihin mu etano lakin.

²⁰Hau re an den dog henahan angge helep ai wereg fil etma ebe demdoho eta wereg ulug dog sipuk hahuk.

²¹Airoho debelug an den namingming angge fam de dog etma ondolik lakin ulug hweag-uruhukdeg en, an den uruk kwit lahe, Dog aire mun horogdoho suma fil wereg angge wakin, ulug uruk halug aire hat hebe hahap wendareg ulug uhuk anggere hat hebe wilibik manu. An den de hat hebe amu angge fam oho youkdoho welahen fug ulug, TUHAN oluk mundoho wereg ahun anyo unuk fam hombuk balduk kahi.

²²Famen de an den at namingming angge anyo fam uruk kwit lahe, Dog aire yatdoho dima fil laha, uruk halug aire TUHAN en hat yatma lowag ulug hweag-huruhu anggere hat hebe lakiyug.

²³Niren hat nim, an nim nenele sali wat-wat ahe on ai seneg welamag ulug At TUHAN en nit mundoho-mundoho hwal-nenepuk karuhu,” ebag.

²⁴Airoho ebag ma at Daud anyo o leimu etmano herag-aik lebag. Ne, at airoho herag-aik lauk kweleg de, Bigalem Keron fam soni esetuk kwit Raja Saul anyo it siburu naukmu etmano watfag.

²⁵Watfagdeg de aren nin salim oho obahat horogma hweria-atuk aleroho hweria-atfag. Ne, at Yonatan de at alukwe fil hweria-atfag,[61] ne at Abner de hun Saul anyo aluluk hweria-atfag, famen de at Daud obale hweria-atuk mu anyo neg de koloreg latfag.

²⁶Famen de at Saul en de obale airoho deg latfag ale anyo fahet de nukoho anyo salim ka bal-hebag fug. Aren wenggel-hauk kwit de, “At Daud anyore wene amu on ap misig eke apne wauk kwit duruk ale on omano famen eke siag ale disireg deheik,” ulug bebagdeg airoho debag.

²⁷Nukoho ombolim on Bigalem Keron anyo famen nukoho bireneg anggere at Daud hweria-atuk angge anyo obale koloreg latfag ma at Saul en Yonatan hein og-hauk kwit de, “At Daud de o sono et angge yoho et anggere nit siburu naukmu nunggwelug waha fug?” ulug hein og-hebag.

²⁸Hein og-hebag ma at Yonatan en onggo uruk kwit de, “At de o Betlehem lamin en ulug an nobam hweag-nutlug lasi.

²⁹Aren uruk kwit de, An nakni nisinga mel nahain elekwe on mel wam soni fahet waroho yaldukmu Betlehem lamin en de haren fano lakin in. An nowe en ohore manu ulug ai isi anggere, haren lowag bemihin halug de an nowesi ninim ambi amulen larohon, isi anggere ai fam at siburu naukmu su waha fug ai nakni,” ulug hweag-etfag.

³⁰Airoho disi urukmu at Saul anyo esanggo holfagdeg at Yonatan fam olok humon atfagdeg uruk kwit, “Babi on hesangge omalik aure! Ketia haren Daud ibil atuk kwit honggwareg mel hisinga mel henanggaliap dobahat-dauk kahep ale anyo an noluk atuk su!

³¹At Daud ebe oluk wereg lire, an o suma fam enowe an raja welaruhuk fug anyore ulug wenggel-hauk kahen a, eleg a? At aire waratmisi anggere ketia at ebe herarik lalug walug wamag dohore ap mingming enebin!” ulug hweag-etfag.

³²Airoho hweag-etfag ma at Yonatan en onggo uruk kwit de, “Nunggwelug at waratmisi? At asiag de ke?” ulug ebag.

³³Ai ebag ma at Saul anyo esanggo holfagdeg at anggisim anyo Yonatan watmin ulug obam hwik-ha lebag. Ai fam de at Yonatan anyo, “Nakni en de endama demdoho Daud waruhuk besireg duruk au i” ulug oluk atfag.

³⁴Airoho debagdeg at Yonatan anyo ahummu olok debagdeg de nukoho bireneg on fam Bigalem Keron fahet ulug soni esetfag on anyo ambilik dorangge eke na fug angge e wirigmu siburu nauk katfag ma anyo embeselug wilibik lebag. Aren de akni en Daud fahet unuk siahap-biahapdoho febag ale fahet neg endama hundig wenggelduk katfag.

³⁵Airoho wenggelfagdeg de likiare at Yonatan anyo Daud inim ambi amul ulug it enele seberoho matfag ale higitdoho o leimu lebag. At de amingming angge ap angge eke hondog halug lebag.

³⁶Lebagdeg de at amingming angge anyo fam uruk kwit de, “Hat de an den dog leheik lamin etma ondolik lakiyug,” ulug hweag-etfag. Airoho ebag ma nimi anyo buroho lauk kweleg de at Yonatan en de dog misig eke nimi anyo unggul busan deg leheik lebag.

³⁷Leheik lebag ma re at nimi anyo dog lebag ma etano aik lebagdeg durukmu at Yonatan en hwiroho hweag-utuk kwit de, “Dog aire lohon dahandoho erahamu laha!

³⁸Folo-folo roho, duruk kwit meneni ebetuk eleg!” ulug ebag ma nimi anyo dog anyo andog halug akni akit watfag.

³⁹Airoho ebag on aire nimi anyo en diroho fahet uruk ulug fubi debebag fug famen de at Yonatan inim Daud inim en neg de enoluk deg latfag.

⁴⁰Airoho debagdeg de at Yonatan en de nimi anyo fam asehen owag anyo walug de o kota lakin ulug og-etfagdeg monde febag.

⁴¹Nimi anyo mundoho lebag ma re at Daud anyo obale helep kabog deg on[62] ambol fil welatfag ma etmano en wilibik watfagdeg aren enggik henahanam Yonatan fam elenggen dimi-debelug dang-debag. Airoho debagdeg at Daud et angge Yonatan et angge enerohole kwe dop-dop atuk kwit oba yatfag. Airoho oba yatuk kwit de at Yonatan endama we dorangge hagdoho hesilfag famen de at Daud endama neg de mun alongdoho hesilfag.[63]

⁴²Airoho oba yatfagdeg de at Yonatan en Daud fam uruk kwit de, “We At Allah en neg let-hapuk kamag. Nit nenebe inim niren ondohoma on inim de niren wene sali At TUHAN Allah il hanim nit nenebe biren en en wat-wat atuhuk on anyo ebereg welamuhuk en at TUHAN en neg nenobaharuk karuhu,” ulug ebagdeg de at Daud anyo oho lauk kweleg de Yonatan oho obam o kota watfag.