Read Ninia Yali 1 SAMUEL 21 Bible Online

1 SAMUEL 21 - Ninia Yali bible

1 SAMUEL 21

¹ Airoho lebagdeg de at Daud anyo imam unuk Ahimelekh akit o Nob wereg ma lebag. Lebag ma at Ahimelekh anyo youk lebagdeg Daud olohotma waharuk kwit de diroho hein og-hebag, “Hat de nunggwelug hamu neg suma wahen?” ulug hein og-hebag.

²Aroho hein og-hebag ma at Daud en onggo uruk kwit de, “An den hun log anyo en de yabuk misig eke nobam feheik deg de ap amu on oho eke hweag-esa fug eheikma wahi. Ai fam de it nautsire obale amumu eke nangno neauk kamuk ulug hweag-isihireg.

³Yehei nakni, an hein og-hea, hat hobam suma nauk on de nunggwangge on eke wereg? An roti foaben lohon oho ne amu angge suma wereg angge oho og-nimin,” ulug hweag-etfag.

⁴Airoho hweag-etfag ma at Allah il hanim duruk on anyo en uruk kwit de, “An de roti we hesangge on de wereg fug famen de Allah fahet ulug weraho on neg de wereg. Anggere haren wamihin fano famen de it hautsi etman homi inim horog ketia eiya eke duswa fug halug neg de fano,” ulug hweag-etfag.

⁵Airoho hweag-etfagma at Daud en onggo uruk kwit de, “It homi hesangge inim nohousa fug aire demdoho. Nit de yabuk duruk kwit halug de, nenewene melaleg duruk aleroho, it nautsi re enonggwareg en horeg welamag ulug ohwale fahat-dauk, aire we yabuk hundig duruk on en famen oho, ne yabuk ketia nenobam fesi on su halon fam de ebenaheg duk fug alereg ma!” ulug hweag-etfag.

⁶ Airoho ebag ma at imam on anyo en roti TUHAN fahet ulug werako foruk on etmano obalma keron werako foul en ulug, atam werako welatfag on etmano mezbah anyo emberimmu en hamboko og-etfag. (

⁷Airoho durukmu eta li em at hun Doeg obam Edom ahun it at Saul en owam hwalduk on enowe anyo aren ap homi en wene melaleg fam duruk kwit obahet duruk ale dimin ulug watfagdeg etma wereg kweleg airoho debag.)

⁸Ai en at Daud en hun Ahimelekh anyo hein og-hauk kwit de, “An de hun log anyo de we fetagdoho mingming nabeheikma di angge su angge hwaleg eleg angge nasehen mel, nenggarog mel hwela fug angge wahireg de, nakni haren inggisim oho, karog oho an walug lahi ha on eke foroho welahen a, eleg a?” ulug hein og-hebag.

⁹ Airoho hein og-hebag ma Ahimelekh anyo en onggo uruk kwit, “An de Goliat ap Filistin ahun haren o Ela donggoma en watihin on anyo enggarog anyo neg foroho lahi. Karog ebere efod it imam en enamigmu boruruk angge anyo ambol fil sum kain fam hwililipdoho wereg ai. Suma re we misig ai neg wereg anggere hat wauk henda halug de wakin,” ebag ma, Daud en uruk kwit, “Karog ai o abirangge suman mun fano on deg anggere ai an og nimin,” ulug ebag.

¹⁰Nukoho anyo salim de at Daud anyo hun Raja Saul anyo weregman de akol en de hun Akhis it ap homi o kota Gat on enowe raja anyo wereg ma akit lebag.

¹¹ Lebag ma it hun Akhis autsi pegawai etmano en hweag-utuk kwit de, “Hun sure hun Daud obam en raja unduhuk wereg ahun anyo oma re abi! Hun au fahet de it hwelani en suni wiliboho yunggul dil waharuk kwit de suni diroho uruk katfag, At Saul en de ap enebe we beribu-ribu neg enowatsi, famen de Daud en de berpuluh-puluh ribu enowatsi, ulug asuni yig-enepuk katswa ahun anyo oma re abi?” ulug hweag-etfag.

¹² Airoho hweag-utuk mu at Daud en esanggo holfagdeg, enele airoho ebag on anyo at Daud en endama ebet neg hauk kwit de at Raja Akhis ahun anyo fam akol humon debag.

¹³ Airoho debag ai fam de at Daud anyo anyo ap homi humdoho inil hanim etano wenenebo on en duruk hag apenendoho debag. Airoho debag ma iren ebe hambohoul ulug debag famen de at de ap enape eleg on en duruk hagdoho atfagdeg de sok o kota [64] kwik laukmu anyo kehebo duruk kwit de, elemahoe ombanisong fene durulug wamburuk kamag ulug embesebagdeg welatfag.

¹⁴Airoho deg latfag ma at Akhis en autsi pegawai omano hweag-esauk kwit, “Hit de ap su ebe wenenebo deg ulug de hinil hauk kahep fug a? Nunggwelug suma hondoholug wahep ahi?

¹⁵An nobam ap enobabe eleg on de dotdeg hag dehen, hiren ap wenenebo on su hondoholug wahep?” ulug hweag-esebag.