Read Ninia Yali 1 SAMUEL 22 Bible Online

1 SAMUEL 22 - Ninia Yali bible

1 SAMUEL 22

¹ Ai en at Daud anyo o Gat etmano embeselug o Adulam horogma owikmu etma heraho latfag. Airoho wereg ma it owesi mel, at ahain elekwe on mel enesanggo holfagdeg de, it enebe mundoho at akit watfag.

²Ne, it foma anggin-fanggin enobam feseruk on mel, enengge baleg angge wereg on mel, it foma duruk ale fahet nenenda boruk fug ale duruk ulug boruk katfag on mel, at Daud akit seberik watfagdeg, at Daud it fahet enowe melal-enepuk on wereg kweleg welatfag. Ne, it Daud inim noruk katfag on de enebe seberoho re 400 en hagdoho welatfag.

³Owikmu etmano en de o Mizpa o Moab fam etma at raja Moab ahun akit lebagdeg de, at raja anyo fam uruk kwit de, “An hamingming angge nakni mel, nisinga mel nakni hat hinim weregman de at Allah en an hamingming angge fahet keroho besi anyo, an hamingming angge noluk aruhu huli welamuhup en fano welamag bein,” ulug hweag-etfag.

⁴Airoho hweag-etfagdeg de aren isinga akni mel anyo hondog-eneplug de at unuk bogdeg o Moab ahun anyo wereg ma feseik lebag ma, at ebe owikmu heraho li em etmanore it isinga akni etma welatfag.

⁵Nukoho misig salim de ap Allah ele hweag-esauk on nabi eke unuk Gat ai Daud akit watfagdeg ele uruk kwit de, “Hat owikmu su wereg lam fug, folo-folo o Yehuda kwenang fam etma lakin,” ulug hweag-etfag ma, at Daud anyo lebagdeg de o Keret anggenma etma kwik lebag.

⁶Nukoho misig salim de at Saul anyo e tamariska apma o Gibea etma anggisim enggikmu seneko hwerieg wereg ma, it autsi sehen foroho on etmanore at ebe walinggoho unduhuk latfag. Airoho wereg lit at hol-hauk men de at Daud inim autsi inim wereg ma re mundoho enoluk aha urukmu holfagdeg,

⁷aren it austi sehen foroho on etmano fam uruk kwit de, “Hit ap homi Benyamin on suma henesanggo hol-dakiek! At Daud uruk kahep on ai en de hit heneyabuk mel, anggur mel, og-hesahu a? Aren de hit sehen foroho on enowesi leho on unduhuk henobahakeg, hit ap dog yapuk on welamag ulug henobahakeg duhu a?

⁸Ai fam de hit henebe at nim sebe ulug de an fam nele sahaloho folug ap misig eke en oho an namloho anyo famen oho at Daud uruk kahep on ai ibil atsi ulug hweag-nutuk kahep fug ai a? Hit dia welahep on eiya ap misig eke on oho an nobahet wenggel-neauk kahep fug, ne ite at napma on Daud anyo en ketia an nangginigmen ware fohuk ulug kahal-napuk on mel, at an namloho Yonatan anyo en at Daud fam diroho diyug ulug endama kwelapuk ale mel, oho eke hweag-nutuk kahep fug!” ulug hweag-esebag.

⁹ Airoho uruk li at Doeg hun Saul owam hwal-enepuk on enowe kepala anyo oho at Saul autsi sehen foroho on enowesi leho on inim eta welatfag. Wereg lit de at Doeg anyo en uruk kwit de, “An hamingming angge en de at Daud anyo hun Ahimelekh hun Ahitub amloho o Nob ahun anyo akit waharukmu hauihik.

¹⁰Wahasimu re at Allah en de at Daud ebe fahet diroho diyug suroho diyug ulug hweag-nomag ulug heng-durukmu hauihik. Ne, foma re at Daud ebe nauk angge og-ereheg, hun Goliat o Filistin ahun en karog anyo og-ereheg, disi,” ulug hweag-etfag.

¹¹Airoho hweag-etfag ma at raja anyo en de at Ahimelekh imam Allah il hanim duruk katfag on anyo inim, owesi autsi it o Nob etma Allah il hanim duruk kwit wereg on inim, wol-enebik lowag ulug mingming enepfag. Wol-enebik lebag ma watfagdeg de at raja anyo alukwema inaik watfag.

¹²Inaik watfag ma at Saul en Ahimelekh fam uruk kwit de, “Hun Ahitub amloho su, hesanggo holin!” ulug ebag ma, Aren onggo uruk kwit de, “Wui, nakni,” ulug ebag.

¹³Ai ebag ma at Saul en hein og-hauk kwit de, “Nunggwelug hat Daud inim henele seberoho matlug an nowatul ulug uruk kahep? Nunggwelug haren at asiburu nauk on og-ereheg, enggarog og-ereheg, at obahet Allah en diroho din hweag-nomag ulug heng eheg, dirihin? Ai fam de ketiare an ninim kahal ahareg de nangginigmen an nebe binggi nowaruhuk ulug duruk ai,” ulug ebag.

¹⁴Airoho ebag ma at Ahimelekh en onggo uruk kwit de, “Ai famen de at Daud aire hun hat hautsi sehen foroho on enowesi leho on etmano en mun dipdoho neg duruk on de at fug no a? At aire hun hat honggwareg heyamal, ne at de it hat honggwareg halong baloho haluluk unduhuk on etmano enowe[65] nakni hun hat hobam silimu wereg enap etmano en at neg de along boruk kwit leho foruk on.

¹⁵An hamingming angge en Allah diroho din ulug hweag-nomag ulug aire demdoho heng dirihik famen de, an hamingming angge ai salim neg keram[66] dirihik fug. Ne, at ninim nele misig maho folug hun hat nowatul ulug duruk kahep ehen on aire, an hamingming angge re wene ai fahet de mun napeleg anggere nakni hun haren de an hamingming angge oho, ite an nahain elekwe ap misig fam ulug oho hekip nesa fug!” ulug hweag-etfag.

¹⁶Airoho hweag-etfag famen de at raja en uruk kwit de, “Ahimelekh! Hat inim, it hautsi howesi inim de mundoho waramluhup,” ulug hweag-etfag.

¹⁷Airoho ebagdeg at raja en it autsi at along baloho aluluk unduhuk on etmano fam uruk kwit de, “It imam TUHAN obahet duruk on ai mundoho enowariek! It aire at Daud inim wene misig matswareg duruk anggere. At Daud wiliplug lasi ale it enoluk deg liren an nobam hweag-nutswa fug mu re,” ulug hweag-esebag. Famen de it autsi at onggwareg along baloho unduhuk on etmano en de it TUHAN obahet imam duruk on etmano enowatuk ale enerim en welatfag.

¹⁸Ai fam de at Saul en hun Doeg fam uruk kwit de, “Folo-folo haren it enowarin!” ulug hweag-etfag ma, at Doeg anyo inatlug lauk kwit de, it imam omano mundoho enowatfag. Nukoho ai salim de aren de it imam on enemigmu walimu hag angge unuk efod wanduk alereg on enebe seberoho 85 en enowatfag.

¹⁹Airoho enowatfagdeg at Saul en de ap homi o Nob on it imam on enobam bumbuk ai oho mundoho enowarukwag ulug mingming enepfag ma, ap mel, homi mel, omalik doron mel, omalik fou on mel, enowam sapi, keledai, domba mel, abirangge enoluk elehap debebag.

²⁰We at Abyatar at hun Ahimelekh amloho misig neg de oluk wilipfagdeg de at hun Daud akit lebag.

²¹Akit lebagdeg de at Saul en airoho it imam TUHAN fahet wereg on etmano mundoho enowatsi ulug hweag-irik lebag.

²²Airoho hweag-irik lebag ma at Daud en hweag-utuk kwit de, “An den nukoho anyo salim at Doeg wereg ma hauihik deg de, an nawene sure at Saul fam ik lahi ulug aire demdoho noluk atsi. Anggere it howesi haknisi mel mundoho waratswa on aire an at akni aruhuk.[67]

²³Hat hebe neg de an ninim welamin, henda hakol bouk fug. At Saul en hat howatmin ulug duruk famen de aren an oho nowatmin ulug duruk. Anggere an welahimu suma halug de hat hakol eleg angge welaruhun,” ulug hweag-etfag.