Read Ninia Yali 1 SAMUEL 23 Bible Online

1 SAMUEL 23 - Ninia Yali bible

1 SAMUEL 23

¹Nukoho misig salim de ap en at Daud hweag-utuk kwit de, “Ap homi Filistin enap en de o kota Kehila bin kuruk kwit de enangge gandum anggen ket baleg on mundoho del dehesa,” urukmu holfagdeg,

²aren TUHAN hein og-hauk kwit de, “An den it ap homi Filistin on ai enowarik lamin fano a, eleg a?” ulug hein og-hebag ma, At TUHAN en onggo hweag-utuk kwit de, “It enowarik kuruk kwit de ap homi Kehila on ai del-enebik lakin,” ulug hweag-etfag.

³Famen de it Daud autsi inim welatfag on etmano en uruk kwit de, “Nit o Yehuda suma fam famen ohore mundoho nenakol en duruk kahe, ne niren ap homi Filistin on en sehen foroho o Kehila etma enowarik laul ulug laulmu etma re ebenaheg,” ulug hweag-etfag.

⁴Ai fam de at Daud en eke inim TUHAN en diroho din ulug hweag-nomag ulug de heng ebag ma, at TUHAN en onggo hweag-utuk kwit de, “Henda firuk fug, it Filistin enap enesehen foroho on aire an den hat henggikmu og-hirikoho lahi angge re o kota Kehila ai kwik lalug enowarik lag,” ulug hweag-etfag.

⁵Airoho hweag-etfag ma re at Daud mel, autsi mel o Kehila lebagdeg de o anyo bin kuruk kwit de ap homi Filistin on humdoho enowatfagdeg it enowam endag-dauk on mundoho del debag. Airoho at Daud o kota ai ap homi wereg on loloho fesebag.

⁶Ne, at Abyatar wilipfagdeg Daud akit waharuk kwit etmanore aren it imam enamigmu walimu hag angge boruruk katfag angge unuk efod anyo walug watfagdeg at Daud o Kehila laukmu etmano re walug lebag.

⁷Ap homi at Saul hweag-utuk kwit de at Daud anyore o Kehila wereg ulug oluge febag ma, at Saul en wenggel-hauk kwit de, “Daud de Allah an nenggikmu og-nereheik. At de o kota fak lehet fam inim sok inim lareg fam kwik laha anggere nong-hong ikohoreg,” ulug bebag.

⁸Airoho bebagdeg de at Saul en de autsi sehen foroho on ligil lohwal esebagdeg de at Daud inim autsi inim hukdoho kwelabe fesoul ulug o Kehila lebag.

⁹Famen de at Saul en Daud fam olok bebagdeg dimin ulug wenggelfag ale anyo at Daud mundoho oluk atfag. Ai fam de at Daud en ap Imam Abyatar anyo fam uruk kwit de,

¹⁰“Walimu hag boruruk katfag angge unuk efod ai walug ma,” ulug hweag-etfagdeg, at Daud en somban uruk kwit de, “Nakni TUHAN Allah ap homi Israel on enakni, an hamingming angge suma wereg wereg en an nesanggo holduk kwit de at Saul anyo o Kehila siahap-biahapdoho feik watmisi en duruk urukmu nesanggo holihi.

¹¹Anggere airoho urukmu holihi on aire demdoho ane? Nakni, TUHAN Allah ap homi Israel enakni en an hweag-nimin o,” ulug somban ebag. Airoho somban ebag ma TUHAN en onggo hweag-utuk kwit de, “Yu, at Saul de demdoho watmisi,” ulug hweag-etfag. Airoho hweag-etfag ma at Daud en ekenim hein og-hauk kwit de, “It ap homi o kota Kehila suma on en de an inim, an nautsi inim de at Saul enggikmu og-umulsa a, eleg a?” ulug hein og-hebag ma, At TUHAN en onggo uruk kwit de, “Yuo,” ulug hweag-etfag.

¹³Airoho hweag-etfag ma re at Daud mel, autsi enebe 600 hag inim de, o Kehila anyo embeselug de wilibik lebagdeg o ekeman ekema lil dag watil lebag. At Saul esanggo hol-hauk men de at Daud de o Kehila en mundoho wilibik laha urukmu esanggo holfagdeg de aren bin kwik lamin bebag ale anyo sebel hebag.

¹⁴Airoho lebagdeg anyore at Daud anyo o domma o Sif leimu etma owikmu welatfag. At ebere at Saul hindik-hundig mug hauk katfag famen de Allah en raja ai enggikmuap deberuk katfag fug.

¹⁵Aireg famen de at Saul en Daud watmin ulug neg duruk katfag ai fam de at Daud oho akol welatfag. Nukoho misig salim de at Daud anyo o Sif leimu etman o Hores etma welatfag.

¹⁶Airoho wereg ma re at Yonatan anyo lebagdeg de at Daud ebe Allah en mapnuroho fahat nusug wereg ulug enda demdoho boruk kamag ulug endama omamneap debeik lebag.

¹⁷At Yonatan en Daud fam uruk kwit de, “An nakni enggik fam de aruhun fug anggere hakol duk fug. Hat raja Israel enap fahet aruhunmu an hat hapma yabuk wahuk ale anyo at nayon de demdoho oluk deg lit duruk,” ulug hweag-etfag.

¹⁸ Airoho ebagdeg de at Yonatan inim, Daud inim ninim hundig lit nare-hare welamuhuk ulug TUHAN il hanim wene sali wat-wat atfag. Airoho debagdeg de at Yonatan anyo obam lauk kweleg de at Daud neg de o Hores etmano welatfag.

¹⁹ Airoho wereg ma it ap homi Sif enap etma foma at Saul o Gibea wereg ma oluge feik lauk kwit de, diroho hweag-etfag, “Daud anyore nit nenobam o Hores horogma owik elekwe etma fene Duk Hakhila emberimmu o Yehuda leimu en il apma fil etma heraho.

²⁰Nenakni hun haren at ebe senetle ulug duruk kahen ale aire nit mundoho nenoluk. Anggere hun log haren fetagdoho seneruk ale aire niren hauk kahema re duk alereg angge re nit, nenobam etma manu,” ulug hweag-etfag.

²¹Airoho hweag-etfag ma at Saul en onggo uruk kwit de, “Hiren an nobam fano ale dehep ai fam At TUHAN en neg fanoap henepuk kamag!

²²An nesanggo holduk kwit de, at ebere mun awenggeleg siag deg ulug holdihik anggere, hit de laluhup deg de ebe demdoho wereg ale fubi debeiyug. At Daud ebe wereg ma re kea, ne ap san il hasi ulug mel mundoho fubi debeiyug.

²³Aireg ma re aren owik heraho latsi kwe mel, furoho longo halug de nikangge an nobam diroho deg ulug hweag-nirik manu. Airoho hweag-nirik wamuhupmu re andet hit hinim seberoho lahukdeg at ebe lahe o kwenang ai fam wereg halug de o Yehuda fam etma abirangge meiyal-mayal esauk kwit en famen oho heraruhuk!” ulug hweag-esebag.

²⁴Airoho hweag-esebag ma re it ap watfag enap etmano Saul embeselug it dam enobam o Sif lebag. Eta li em de at Daud autsi mel de o Maon leimu o Yehuda en lei il apma fil wong donggoma etma wereg kweleg debag.

²⁵Airoho wereg ma at Saul autsi sehen foroho on inim en Daud herarik watfag famen de, ap homi at Daud oluge febag ma at Daud ebe o Maon leimu en helep ilmu etma lebagdeg wereg kweleg debag. At airoho debag ma Saul oluk atfagdeg de at Daud anyo folo-folo mutlug lebag.

²⁶Airoho mutlug laukmu re at Daud autsi tentara inim de dom alduk suma fil laukmu re at Daud autsi nim oho dom alduk atlumu fil lauk katfag. At Saul en de Daud senetmin ulug huk deberuk katfag famen de at Daud de folo-folo mun koloeg wilipuk katfag.

²⁷Ai famen de fetagdoho ap eke yonggo at Saul akit inaik watfagdeg hweag-utuk kwit de, “Ap homi Filistin on en de nit nenobam mundoho hukdoho kwelabe fehesa angge re, nakni hun hat de folo-folo sombandoho lamihin!” ulug hweag-etfag.

²⁸Airoho il lauk em de at Saul anyo en Daud mutlug lauk ale anyo embeselug de, it ap homi Filistin on inim dog yabik lamin ulug lebag. Ai fam de dom ai unuk de minggit enepuk andom ulug Gunung Pemisahan soalfag.

²⁹Etman de at Daud anyo o En-Gedi kwenang on fam etma lebagdeg etma owik elekwe etmano heraho latfag.