Read Ninia Yali 1 SAMUEL 24 Bible Online

1 SAMUEL 24 - Ninia Yali bible

1 SAMUEL 24

¹Etan de Daud anyo wilayah En-Gedi fam lebagdeg helep owik kwe etmano herag aik lebag.

²Airoho aik lebagdeg wereg kweleg, Saul de ap homi Filistin enap mel dog yabik lebagdeg, watfagdeg hol-hauk men de, Daud anyo re o En-Gedi horogma leimu etma wereg urukmu hol-hebag.

³ Airoho hol-hebagdeg de fil-fili folo-folo etano re at Saul autsi it ap homi Israel on famen sehen foroho on mun memereg on neg eneko enebe 3.000 en fesebagdeg de at Daud mel, at autsi mel o mo lahaik waharuk fil etman dom helep eke unuk de Kambing Maro urukmu, etma hera-enebik laul ulug lebag.

⁴Lebagdeg de at Saul anyo kwe elanma o wam domba enobam lohon wirigmu aik lebag. Aik lebagdeg de eta owik eke wereg ma re at Saul anyo miema etma kwik lebag. Eta li em de at Daud oho inim autsi mel de owik ai ilonggoma mun yatma atlumuno herahoman at Saul airoho kwik lebag.

⁵Airoho kwik lebag ma re at Daud autsi etmano en Daud fam uruk kwit de, “TUHAN en hat hweag-hutuk kwit, Hat haselei on de hat henggikmu og-huruhukmu, hat henda at fam dimin boruk ale duhun isi fug no a? Uswama ketia sure nenakni hat hobahet eiale koloreg wereg ai anggere at ai fam de hat henda behen ale etmaroho debein!” ulug hweag-etfag. Airoho hweag-etfag ma re Daud anyo ling-long Saul wereg ma etano aik lebagdeg de ele eleg angge at Saul asum jubah atogma dorangge lohon denele febag.

⁶Airoho denele febag famen de, fobik en de Daud en an airoho dihi ai siagdoho dihi bebag.

⁷Airoho bebagdeg de aren autsi etmano fam uruk kwit de, “An nakni raja At TUHAN en momaloho unduhuk fesi on fam siag dihi hano ulug At TUHAN en neg hwal-napuk kamag. At ebe aire TUHAN en momaloho unduhuk fesimu re we dorangge ulug oho obam oukap debehi ha fug halereg!” ulug hweag-esebag.

⁸Aren autsi airoho hweag-esebag ai fam it etmano enenda hambuge fesebagdeg, hiren at Saul ebe warik laluhup fug ulug alele og-enepfag. At Saul anyore amieman inatfagdeg de owik anyo famen wiliplug de kwe laul en ulug lebag.

⁹At airoho wiliplug laukmu re at Daud anyo oho Saul ombolim owik anyo famen wiliplug lebagdeg de, at Saul ambol filen hwiruruk kwit de, “Nayon, ao!” ebag ma,

¹⁰at Saul anyo alukwe endenoho fu hauk men de, at Daud anyo elenggen dimirebelug Saul mot-duruk kwit de diroho ebag, “Hun nakni haren de nunggwelug ap en uruk kwit, At Daud en hat hebe alema re hobahaikoho duruk, uruk on hesanggo holduk kahen?

¹¹Ketiare hat honggwareg en owikmu ai en hil hehen ai, TUHAN en de nakni hun hat hebe an hamingming angge nenggikmu og-nereheik. Ne, an nautsi eke en de an hamingming angge nobam nakni hat hebe howarukwag ulug enele hweag-nerehesa, famen de an hamingming angge en de nerim ulug embesehi. An hamingming angge en uruk kwit de, An hamingming angge nakni raja TUHAN en momaloho unduhuk fesi on ai obam di ale su ale oukap ale eke debemin fug, ulug ihi.

¹²An nakni su hakin! Nakni hun hat hasum jubah atog deneleg angge an hamingming angge en seneg lahi angge su hakin! Ebe demdoho re an hamingming angge en hat nakni howatle famen de, an hamingming angge en de we hasum jubah atog dorangge neg deneloho wihi. Ai fam de an hamingming angge en nolok deg lahi fug ale mel, ne an den hat nakni hele sahaloho duruk kahi fug ale mel, anyo enameg hehen ai. An den dorangge ulug mel oho eke siag hat nakni hobam dirihik fug famen de hat nakni en an hamingming angge nowatmin ulug en mug neauk kahen.

¹³Nit nenebe biren eiya famen sa siag ulug aire At TUHAN en neg kongdoho hweag-nesowag. Hun nakni haren an hamingming angge fam napuk kahen on aire at TUHAN en neg obalma onggo og-hutuk kamag, ai deg kweleg famen de an hamingming angge en dorangge ulug oho hat hun nakni hendama oukap kwelabe hobaharihik fug.

¹⁴Nakni hun hat de indik-endam etma alik oko diroho uruk katswa alere hat oho holuk, Enolok ale aire iroho ap enolok wereg enap en neg duruk, ulug uruk katswa ma re an hamingming angge en hat nakni hobam eke henda oukap hobahakuk fug.

¹⁵It ap homi Israel on enowe raja en an hamingming angge nowarikoho duruk on fubi nobahain! Hil neakin an hamingming angge su at aren mug neauk angge! An hamingming anggere we mene unggul misig wareg on hag, ne we fi misig hag abi.

¹⁶At TUHAN en neg nit an hamingming angge inim, nakni hun hat inim fahet at neg nenewene bilinggoho nenowag enerukwag. We Aren neg wene su kumu howag. Airoho kumu halug de an nibil aheg, hun nakni hat famen nili og-nabeheg dukwag,” ulug hweag-etfag.

¹⁷At Daud anyo en ele airoho ebag on anyo mundoho ebag ma re at Saul en uruk kwit de, “Daud, namloho ahwi, aire hat ani abi?” ulug ebagdeg de Saul anyo oba yatfag.

¹⁸Oba yatfagdeg aren Daud fam uruk kwit de, “An siag duruk kahi famen de hat neg de demdoho on o.

¹⁹An den hat hobam nolok ale duruk kahi famen de haren onggo fano nobahaken. At TUHAN en an nebe hat henggikmu feheik famen de an nebe nowarehen fug ai fam de, haren yoho su salim an nobam fano on duruk kahen ale anyo enam aha.

²⁰Ap it eneselei on mel ambi atlug enoluk eke wilibi feseruk ale eke wereg fug! Anggere haren yoho su salim an nobam fano on dehen ai fahet At TUHAN en neg fanoap hobaharuk kamag!

²¹Hat demdoho ap homi Israel on enobahet raja inaruhun anyo yoho an demdoho noluk aha. Ne, hat raja wereg lit melal-enepukmu re it Israel on en kerajaan aire mundoho omamneroho unduhuk welaruhu.

²²Ketiare haren an nambiangma endag-amuhup on mel, enowaruhuk fug ulug inim, an nahain elekwe on enunuk elehap duhuk fug ulug mel, Nenakni TUHAN unuk fam wene sali watnimin!” ulug hweag-etfag.

²³Airoho hweag-etfag ma re at Daud en de, “An haren ehen ai hagdoho duhuk,” ulug hombuk balfag. Airoho hombuk balfagdeg, at Saul anyo obam wereg ma lauk kweleg at Daud oho austi mel enobale heraho wereg ma etmano lebag.