Read Ninia Yali 1 SAMUEL 25 Bible Online

1 SAMUEL 25 - Ninia Yali bible

1 SAMUEL 25

¹Airoho debagdeg enenggik anunuroho welam fugmen at Samuel anyo waratfag. At waratfag ma it ap homi Israel on mundoho fong watuk mu inim watul ulug kabog-debagdeg, at ebe obam o Rama etmano salfag. Airoho waratfag ma sale folug de at Daud anyo o Paran leimu etma lebag.

²At etma lauk men de o kota Maon etma re ap misig eke hun Kaleb ambiangma on en ondoho angge unuk de Nabal ai welatfag. Hun aire aren owam endag-enepukmu fahet de kwenang o kota Karmel horogma etma welatfag. At ebere dung ahun wereg lit de owam domba re 3.000 en welatfag, ne owam kambing de 1.000 en welatfag. At ohwe Abigail aire mun enggat deg lit de ebe oho mun buhundeg latfag, famen de at ahun Nabal aire ebe mun hapereg lit de obabut oho mun siag deg latfag. Nukoho misig salim de at Nabal anyo o Karmel etma owam domba oruk balduk katfag.

⁴Airoho duruk ulug ap en at Daud o leimu wereg on fam hweag-irik lebag ma esanggo holfagdeg de,

⁵aren ap sauwe on enebe num en o Karmel mon-enepuk kwit,

⁶“Laluhup deg de at Nabal ai mel ambi atlug de at Daud en diroho dang habeheik ulug hweag-umuk. Airoho aren mon-enepuk kwit de, iren de at Nabal fam de diroho uluhup,” ulug hweag-esalug de, “Hat honggwareg hebe fam inim, heyog indip kwe on fam inim, hangge di angge su angge fam inim mun fanoroho neg welamag.

⁷An nesanggo holduk men de hat de hundig-hundig howam domba oruk neg balduk kahen. Ne, eke hat homaliki howam hwalduk enap it enebe nit nenobam fil wereg ma ohore niren diroho-suroho ulug enobam foruk kahe fug, ne it enebe o Karmel wereg li re it enengge on en misig eke oho longgo isi fug ale aire hat oho holuk amag.

⁸It enebe fam hein og-esakiyug, iren oho aire demdoho uhup lit deg. Aireg ma re nit de nukoho humon leho on su fam waharuk kahema re, an nautsi aire fanoroho hat hobam og-enebukwag boruk kahi. Ekere nit hamingming angge su fam inim, an Daud hare hinim fanoreg lahe on anyo fam inim, hat henda fano en amu angge wereg on etma og-nesakin, eheik, ulug hweag-umuk,” ulug hweag-esebag.

⁹Airoho hweag-esebag ma re it ai o Karmel aik lebagdeg at Daud autsi etmano en de wene diroho iyug ulug hweag-esebag ale etano at Daud unukdoho hweag-etfagdeg aren onggo hweag-nesowag ulug nangno hauk katfag.

¹⁰Famen de at Nabal en onggo hweag-esauk kwit de, “Daud a? Aire sa? Hun Isai amloho aire sa? At fahet de an lohon nesanggo holduk kahi fug! Horog ketia welahe li eiya fam de ap enamingming angge wereg on humdoho enowesi fam en wiliplug o suma longgo ik wahausa!

¹¹Ap ebe sure diman waha ulug mel, indip napeleg kweleg famen an den nasiburu roti mel nahaik hwenanggeg mel, wam ino osoho mel, it nautsi wam oruk balduk on enobahet fouk dihi famen aire keroho og-isihi halereg ma!” ulug hweag-esebag.

¹²Airoho hweag-esebag ma re at Daud autsi anyo nikangge enembol somban Daud akit watfagdeg de at Nabal en ele ebag ale anyo hweag-etfag.

¹³Airoho hweag-etfag ma re at Daud en autsi etmano fam uruk kwit de, “Hiren henenggarog henemu hundomog etmano henowag kwe het-dakiek!” ulug hweag-esebag. Airoho hweag-esebag ma re at Daud autsi etmano aren ele hweag-esebag ale anyo folo-foloroho hole febag. At Daud ohore enggarog owagma het-debagdeg de it ap enebe 400 en hagdoho inim lauk kweleg de it ap enebe 200 en hag de enasum anggen etmano foroho lit welatfag.

¹⁴It etmano airoho duruk kweleg de, at Nabal anyo eyabuk duruk on eke en at Nabal ohwe fam hweag-iril lauk kwit de, “At Daud ebe o leimu omano en nit nenowe fam, Diroho dang-hapsi iyug, ulug ap monde-feseik wahasi famen de aren it enebe alitno enepsi ale aire hwe nisinga hat de hesanggo holdihin a, eleg a?

¹⁵It aire nit ninim de mun fano deg lit, nit nenobam mel diroho suroho nenepuk fug, ne nit nenebe it ninim o leimu ambi atuhuk huli en de nit nenangge misig ulug oho eke longgo uruk eleg famen.

¹⁶Nit it enebe horogma wam hwalduk kwit wereg ma, iren hindik-hundig nit along baloho fahat-nunusug kweleg famen.

¹⁷Aireg ma re hat nenesinga en keroho dehen halereg aire furoho wal halug, an den diroho dimin ulug katukdoho in. Nit nenowe aire mundoho unggul owag omamne deg lit de ele ukwag ulug koru og-haukmu ohore uk fug alereg angge. Ne, aren airoho disi on ai onggore at nenowe fam inim, ne at ahain elekwe on mundoho fam inim aik waruhu lit deg!” ulug hweag-irik lebag.

¹⁸Airoho hweag-etfag ma, at hwe Abigail anyo en folo-folo etano neg roti 200 en inim, anggur ahaik ikwag ahap fam wirig on biren ele sopdoho hwenanggeg inim, wam domba indokma sahaliroho weraho angge foaben mel, gandum anggen wam ahalue fam weraho angge 17 kilo inim, e anggur anggen yiko suknig angge iringgig on 100 en inim, e ara anggen famen kue wirig angge 200 en inim, etma webagdeg de abirangge anyo wam keledai emberim kwe lahapfag.

¹⁹Airoho lahabe febagdeg de aren omaliki eyabuk duruk on etmano fam uruk kwit de, “An de hit henombolim fobik watmin anggere, hit de atam an nalukwema lauk kamek,” ulug mingming debesebag famen de aren ahun fam diroho suroho mel ulug lohon hweag-etfag fug.

²⁰At hwe Abigail anyore wam keledai fam lahabagdeg at ebe lebagdeg dom aluluk kwaniroho laukmu etma aik lebagdeg duruk men de at Daud mel autsi mel at hwe at ibil wambik waharukmu sal-kwal ebag.

²¹Eta li em de at Daud anyo endama wenggel-hauk kwit de, “An den ap ai angge o leimu hwalduk kahi anyore we alemaroho deg oma re! At anggere we misig ulug oho eke longgo isi fug, aireg kweleg ketia an den fanoroho debeseruk kahi on anyore siag on inim wut-deberuk au a!

²²An den ap neg o etma wereg on mo lahaik waharuk eleg kweleg eta enowatmin halug de, we At Allah en neg an[68] nowarukwag!” ulug wenggeldil waharuk men ambi atfag.

²³At hwe Abigail anyo en Daud waharukmu il hebagdeg de, at ebe folo-folo wam keledai emberim fam en wambik watlug, hun Daud eyogma elenggen dimi-debelug dang-duruk kwit de,

²⁴ele diroho ebag, “Nakni, an nele imin on su hesanggo hol-nabin! Ne, siag atsi on aire an hamingming angge nobam aruhu an neg anggin hahuk!

²⁵Nakni hun haren de at Nabal aren fano ale eke duk eleg ahun, onggwareg unuk higitdoho mun moruwe[69] ahun ai fahet wenggeluk fug! Nakni haren ap mon-enebik waharihin on etma an hamingming angge en lohon nil esauihik fug.

²⁶Hat nakni en haselei on fam onggo og-nomag ulug heng-enebeheg, enebe enowareheg duk ale anyo At Allah en kwe bale hobahakeikma, At TUHAN oluk mundoho wereg on anyo unuk fam de an den hombuk balduk kahi ai. Nakni hat haselei on mel, it hat hebe alema re hobahaul ulug duruk on etma enobam atuk ale higitdoho re at Nabal ai obam higitdoho atuk kamag.

²⁷Aireg anggere an hamingming angge en herangge dorangge hun nakni hat hobahet mel, it hun hat hautsi fahet mel, dia hwelakiek.

²⁸An hamingming angge en furoho dirihik fug on ai fahet de henapelehapdoho nobahaiyug. Nakni hun haren At TUHAN fahet weim yapuk kahenma re At TUHAN en de nakni hun hat mel, haren ondohoma on mel de it ap homi Israel on enobahet raja unduhuk lamag ulug henobaharuk karuhu, ne nakni hun hat de holuk welaruhun huli etma kwasik ale on eke duhun fug.[70]

²⁹Ne, ap eke en lahe nakni hun hat howatmin ulug mug-heauk halug de, hun nakni hat de At TUHAN Allah en de, ap homi en enengge bukiroho fahat-dalug anyo hag ili oko fahat-husug laruhu. Famen de hun nakni hat haselei on de At TUHAN en yatma hwik-hwak eseheg, it hwik angge fam enowatuk on en yatma hwik-esahup.

³⁰At TUHAN en de, Diroho-suroho habuhuk, ulug abug wene wat-hitsi ale higitdoho fano on nakni hun hat hobam deberuk karuhu, ne we il misig welatlug de nakni hun hat de it ap homi Israel on enobahet raja unduhuk hobahaku.

³¹Airoho atuk li em de nakni hun haren de ebet hauk kwit de, An den we hesangge indip eleg kweleg enowatihik fug, ne an den we noggwareg en katukdoho debemin ulug dirihik fug, anyore, ulug wenggel-halug de hendama wenggel-hauk kwit henda hesileheg, nambiken dirihik e, beheg duk fug. Ne, At TUHAN en lahe nakni hun hat hobam fanoap hobaharuk halug de, nakni hun hat hamingming angge an su hapeleg am fug,” ulug hweag-etfag.

³²Airoho hweag-etfag ma at Daud en hwe anyo fam uruk kwit de, “Hat an ninim suma ambi amag ulug mon-habik waha on ap homi Israel on enakni TUHAN Allah ai motdeg-motdeg neg welamag!

³³An den ap wareheg, nonggwareg en katukdoho dimin ulug wenggele folug deheg, duk no ulug kwe bale nobahaik wahen on ai hat hendama enggatdoho wenggelehen on ai motdeg welaheg, honggwareg hebe motdeg welaheg deg lamuk.

³⁴An den hat hobam kwasik on duk no ulug kwe bale nobahakek. Nakni TUHAN ap homi Israel on enakni Allah ai unuk fam anggere, hat folo-folo wahen ale ai walen fugmen de, mo owan lahaik wam fug mu re at Nabal autsi re mundoho enowatlep waralep!” ulug ebag.

³⁵Airoho ebagdeg de at Daud en de hwe Abigail en obahet og-eneplug watfag angge etmano hwelebagdeg, at ebe fam uruk kwit de, “Henda firuk fug, we hobam lakin. Ne, haren airoho nobahaiyug ehen ale aire an mundoho holihi,” ulug hweag-etfag.

³⁶Airoho hweag-etfag ma at hwe Abigail anyo sombandoho hun Nabal akit waharuk men de, it ap raja en pesta esetuk omano hagdoho olma pesta humon esetuk katfag. Airoho esetuk kwit de, at Nabal anyo siomo debagdeg ahayeg hum ale durukmu re at ohwe di ale su ale eke anyo salim hweag-om fug angge welatfagdeg likia huli atfag.

³⁷Hubet de at Nabal anyo siomo duruk eleg li at ohwe en de siag kwasikdoho debag ale anyo fahet mundoho hweag-etfag. Airoho hweag-etfag ma re at Nabal anyo enda anggen leberuruk ale bok atfagdeg ebe mundoho wareg on hag atfag.

³⁸Ai en nukoho numen hagdoho welatfagdeg de At TUHAN en hun Nabal anyo fam ouk enda anggen leberuruk eleg ale obam debeik watfag ma at ebe waratfag.

³⁹Ne, at Daud esanggo holduk men de at Nabal anyo waratsi urukmu holfagdeg, aren uruk kwit de, “At TUHAN neg motdeg welamag! Aren de at Nabal en an mabenap nobaharuk kwit nunuk siahapdoho fesi on anyo onggo ware foruk kwit de Aren neg an amingming angge su en kwasik on eke duk no ulug kwe bale nobahakeik ai. At Nabal de asiag onggo re TUHAN en unggum obam feheik ai,” ulug ebag. Airoho ebagdeg de at Daud en hwe Abigail ohweap dahuk en ulug ap hwe at obam mon-enepfag.

⁴⁰Mon-enepfag ma at Daud en mon-enepfag on etano hwe anyo o Karmel wereg ma obam aik lebagdeg enele hweag-utuk kwit, “Nit de hun Daud en mon-nenebik waha ma, at endama hat ohweap dahuk boruk kwit hweag-irik lakiek eheikma wahe,” ulug hweag-etfag.

⁴¹Airoho ebag ma re at Abigail anyo oho inatfagdeg de elenggen dimi-debelug uruk kwit de, “An sure hun Daud ai amingming angge deg lahimu re, it at amingming angge etma eneyog de ho-enepuk karuhuk neg,” ulug hweag-esebag.

⁴²Airoho hweag-esebagdeg de, at ebe folo-folo etano fik-fouk debagdeg, at ebe wam keledai emberimmu lahalug, amingming angge hwelani on enebe foaben eyogmaroho re, it Daud en mon-enebik lebag on etmano mel, watfagdeg de, at anyo hun Daud ohwe atfag.

⁴³Hwe ai owan hwela fug mu re at Daud de hwe Ahinoam obam Yizreel on hwelebag ne ombolim de at Abigail ohweap debag ai.

⁴⁴Airoho duruk kweleg de at Saul en de ahaloho hwele Mikhal hun Daud ohwe anyo re hun Palti Lais amloho o kota Galim on anyo inim lombo debesebag.