Read Ninia Yali 1 SAMUEL 26 Bible Online

1 SAMUEL 26 - Ninia Yali bible

1 SAMUEL 26

¹ Nukoho misig salim de it ap homi Zif on de Saul akit o Gibea wereg ma lebagdeg hweag-utuk kwit, “Daud anyo re dom Hakhila fam lei Yehuda en elanma etano heraho lit wereg,” ulug hweag-irik lebag.

²Airoho hweag-etfag ma re Saul anyo folo-folo autsi ap homi Israel on weregman dog yapuk ale sehen anggen on neg enebe 3.000 en inim de Daud anyo herarik laul ulug o Zif etmano watfag.

³Watfagdeg de Saul anyo o Dom Hakhila aluluk etano o sum fam sabo wiroho nohorukmu re, Daud esanggo hol-hauk men de Saul anyo hombolim waharuk kwit o leimi wereg urukmu esanggo holfag.

⁴Airoho holfagdeg de aren ap yenal balduk on inil wag lowag ulug mon-enepfagdeg de, Saul ebe demdoho re deta wereg ulug oluk atfag.

⁵Airoho oluk atfagdeg Daud anyo folo-folo Saul en obam sabo sum on fam saloho nohorukmu etmano lebagdeg duruk men de Saul obam sabo nohorukmu anyore Abner hun Ner amloho anyo nohoruk katfag on horogma etma nohoruk katfag. Ne, Saul en obam sabo anyore bul wirigmu re, autsi tentara en on de foma-foma maseroho wirig latfag.

⁶Airoho deg ma hebagdeg, Daud en hun Ahimelekh o Het on anyo inim, Abisai, nimi Yoab are (it enesingare hwe Seruya) anyo omaliki etano mel fam hein og-esauk kwit de, “Hun Saul obam sabo saloho nohorukmu aure ap ambong se on de sa ninim kwik laul?” ulug hein og-esebag. Hein og-esebag ma Abisai en uruk kwit, “An!” ulug ebag.

⁷Airoho ebagdeg hup anyo salim de Daud mel, Abisai mel, de enebe bililoroho re o sabo salegma anyo kwik lebagdeg hauk men de, Saul ebere bik-bul nohorukmu abit anyo re unggul higitdoho etano kwenangma kwat-kwat deg latfag. Ne, Abner mel, it tentara omano mel de, Saul ebe maseroho nohoruk katfag.

⁸Airoho nohorukmu re Abisai en Daud fam uruk kwit, “Allah en de o yoho hup su fam hat haselei on anyo henggikmu og-hereheik su. Anggere an den onggwareg anggisim au fam we birenamdoho fug men we misiham at ebe dale feminmu kwenangma fug-fug dik wambukwagdohore airoho dimin en fano in!” ulug hweag-etfag.

⁹Famen de Daud en uruk kwit, “Haren diroho suroho ulug at obam debouk fug! Ap homi en ap raja TUHAN en momaloho unduhuk fesi on fam siag on debeseruk halug de TUHAN en unggum og-esauk anggere.

¹⁰Nakni TUHAN oluk wereg on unuk anggere, TUHAN onggwareg en neg Saul ebe waruhu ai noluk. At ebe waratuk ale horog aruhu halug oho, ne dog yapuk men dog ambiangma en halug oho.

¹¹Anggere we TUHAN en neg raja Aren momaloho unduhuk fesi on ai warihi hano uluh alele oho nobaharuk kamag! We anggisim ai mel, ahaikwag ai mel neg wakin, Nit de lakohon lahe anggere!” ulug hweag-etfag.

¹²Airoho ebagdeg de Daud en hun Saul en anggisim mel, ahaikwag mel, unggul foma fil wereg angge etano walug lebag. Airoho durukmu aire TUHAN en it enebe abirangge anyo noho mun homogdoho nohoukwag ulug debesebag ma re, ap misig en oho, atfag ale anyo inil eseheg, enoluk aheg, ite enebe enoluk inaheg debag fug.

¹³Airoho debagdeg de Daud anyo donggo amu on fam baloho kwik lebagdeg de dukmu etma lebag ma re Saul obam sabo salegma etano en de il yatdoho deg latfag.

¹⁴Airoho lebagdeg Daud en Abner mel, tentara Saul en on mel, fam hwiruruk kwit, “Abner! Haren an nele hesanggo holduk kahen a?” ulug hwirebag ma, Abner en oho hwiruruk kwit de, “Ap hele hwiruruk kwit neg welahen on aire hebere sa abi?” ulug hweag-etfag.

¹⁵Airoho hweag-etfag ma Daud en onggo uruk kwit, “Abner ao, it ap homi Israel on fam en de hat de ap mun along hahun no abi, hat de nunggwelug hakni hun raja ai fahet kahaleg lahen fug? We horog ketia eta neg ap eke en hun hakni watul ulug o sabo sum on fam salegma kwik wahesa aire.

¹⁶Abner, hat de yabuk furoho dehen fug halereg! Nakni hun TUHAN oluk wereg on unuk anggere hiren ap raja TUHAN en momaloho unduhuk fesi on furoho kahaleg lahep fug anggere hit mundoho re waramluhup en welahep. Hinil kumu hakiek! Henowe raja en anggisim anyo re ebe kea wereg? Ne, ahaikwag unggul foma fil welaha on anyo re ke ahi?” ulug ebag.

¹⁷Airoho urukmu re Saul en Daud ele eneg angge esanggo holfagdeg, aren hein og-hauk kwit, “Daud ao, Hat aire an namloho anyo a?” ulug hein og-hebag ma, Daud en onggo uruk kwit de, “Yu, hun log nakni an anyo abi,” ulug hweag-etfag.

¹⁸Airoho ebagdeg ele eke inim uruk kwit, “Nakni hun log haren de nunggwelug an hamingming angge mug naplug neg dil noruk kahen? An hamingming angge nasiag dirihik on de ebe ke?

¹⁹Nakni hun log, an hamingming angge en halong boruk kwit nele uruk kahi on su hol-nabin. TUHAN en nakni hun log mingming hapuk kwit an hamingming angge su warik lakin ulug isimen halug de, wam misig waroho yalduk men de ai fam TUHAN olok nobam wereg on elehapdoho fouk alereg. Famen de nakni hun log mingming hapsi on ai lahe ap en mingming hapsi halug de, it etma enebe TUHAN en neg hururungdoho feseruk kamag! Iren airoho neg duruk ai fam de an hamingming angge kwenang TUHAN onggwareg anggwenang famen wilip-atlug de anggolo roho nangginmin en ulug o amumu ap homi amu on en kembu dewa mun napeleg on etma fam apne wag lauk karuhuk ai.

²⁰An hamingming angge kwenang amu on napeleg on fam TUHAN olohotma en yatma etman waramag ulug nobahauk fug. Ap homi Israel on enowe raja en fi misig fahet, an hamingming angge su hag on mel fahet watmin ulug waharuk aire nunggwe fahet no? At ai en an amingming angge su ap en suwe e enggelama on mutlug lauk hag mug-naplug waharuk aire we alemaroho hag,” ulug ebag.

²¹Airoho ebag ma Saul en onggo uruk kwit, “An mun siag dirihik. Anggere Daud namloho hebe sombandoho ma! Haren fahe hup ai fam an noluk eke nim welamag ulug nobahakenma re an den siag on hat hobam eke hobahakuk fug. An nobabut de mun morue. An de we dik-demdoho nong-hongdoho dihi!” ulug hweag-etfag.

²²Airoho hweag-etfag ma Daud en onggo uruk kwit, “Nakni hun hat hanggisim anyo re ebe su anggere, hun hat hautsi tentara etman wag wamag ulug mingming enebin.

²³We TUHAN en neg ap bekitdoho duruk on mel, fik-furoho duruk on mel, fanoap debeseruk karuhu. Yoho su salim TUHAN en hat nakni an hamingming angge nenggikmu feheik famen de, an hamingming angge en nakni hun hat raja TUHAN en momaloho unduhuk hobahasi on fam siag ale debemin fug behi.

²⁴Aireg ma re, yoho su fam an den hun log su watmin fug ulug holuk hobahaki ai hagdoho, an hamingming angge oho airoho TUHAN en ili oko fahat-nusug lit anggin on famen loloho wilibi nobaharuk kamag!” ulug ebag.

²⁵Airoho ebag ma Saul en Daud fam uruk kwit de, “Namloho e! We TUHAN en neg fanoap hobaharuk kamag. Haren di yabuk su yabuk duruk on fam de ambiangma anggen fano on neg atuk kamag!” ulug hweag-etfag. Airoho ebag ma re Daud anyo kwe bekit laroho lauk kweleg, Saul anyo oho obam lebag.