Read Ninia Yali 1 SAMUEL 27 Bible Online

1 SAMUEL 27 - Ninia Yali bible

1 SAMUEL 27

¹At Daud anyo lauk kwit de, endama diroho wenggel hebag, “Eta airoho ehe famen ohore deg kweleg at Saul en an nebe nowaruhu lit deg. Anggere an den amuroho duk ale eke wereg fug o ap homi Filistin enobam etma wilibik la. Airoho dimin ai fam de at Saul en an it ap homi Israel wereg ma eke heranabuhu fug, ne an oho etma nakol eleg angge fano welaruhuk en,” ulug wenggelfag.

²Airoho wenggelfagdeg de at Daud inim, autsi enebe 600 en etano inim de ap Akhis hun Maokh amloho o kota Gad on enowe raja akit lebag.

³Airoho lebag ma re at Daud anyo autsi mel, it enohwesi, enomaliki hundomog mel mundoho lebagdeg o Gad etma yugdoho-aik lebagdeg welatfag. At Daud en de ohwesi biren, hwe Ahinoam o Yizreel ohwe anyo mel, hwe Abigail hun Nabal sohwe obam Karmel on anyo mel og-eneplug lebag.

⁴Airoho lebagdeg wereg ma at Saul esanggo holduk men de at Daud anyo o Gad etma wilibik lasireg wereg urukmu esanggo holfagdeg de aren senetmin ulug mutlug lauk ale anyo embesebag.

⁵Ai en at Daud en hun Akhis anyo fam wene kwelapuk kwit de, “Nakni hun haren an hamingming angge fam henda hahayeg boruk kahen halug de, an hamingming angge fam o kota lohon weregman de o kota doron yatma etma misig eke hweag-nimin, ne an airoho hweag-nitmihin mu re an nakni hun log hamingming angge hobam o kota logma welaruhuk aire fug anggere,” ulug hweag-etfag.

⁶Airoho hweag-etfag ma re at Akhis anyo en de o kota Ziklag ai at Daud og-etfag ai fam de o Ziklag aire it raja Yehuda on enobam atfag ma ketia hwili en inim it enobam wereg.

⁷At Daud anyo re ap homi Filistin on enobam etma re tahun misig dohore bigalem ohwan inim welatfag.

⁸Eta li em at Daud airoho wereg lit de, at Daud mel, autsi mel, en de it ap homi Gesur on mel, Girsi enap mel, Amalek enap mel, it enunggul unuk eta enap de endam et angge o etma kwenang fam wereg ma enowarik lauk katfag; Aren de o kwenang etma fam enowatil de o Sur huli yatdoho etman de o Mesir huli etma feik lebag.

⁹Aren de ap mel, homi mel, mundoho enowatuk kwit de, enengge domba, sapi, keledai, unta, mel etma mundoho hohouk-dauk kwit de, enesum wan-duruk on famen oho mundoho hwelebag. Airoho debagdeg de aren sombandoho hun Akhis anyo akit inaik watfag.

¹⁰Airoho inaik watfag ma at Akhis anyo en hein og-hauk kwit de, “Yohore hat ap kema fil enowarik lahen?” ulug hein og-hauk halug de at Daud en onggo uruk kwit de, “An de o Yehuda en il apma fil selatan etma, ite it ap homi Yerahmeel enap wereg kwe, oho ne it ap homi Keni enap wereg kwe oho lahi,” uruk katfag.

¹¹Airoho duruk kwit de at Daud mel, autsi mel, en duruk ale anyo ap homi etma on eke o Gat watlug, iren diroho duruk ulug enelukap debeik lano ulug de, iren ap homi enowarik kuruk katfag kwe etma re ap misig ulug oho oluk foruk katfag fug. At Daud ap homi Filistin on enanggwenang fam wereg lit de airoho duruk katfag ai.

¹²Airoho duruk katfag famen de at Akhis anyo en Daud en duruk on etmano fahet de demdoho boruk kwit de, aren endama diroho wenggel hebag, “At de ori unggul unuk misig on en enerim duruk on anggere nangginuk fug alereg anggere at de oluk welaruhu huli aire we an namingming angge neg welaruhu,” ulug enda wenggel-hebag.