Read Ninia Yali 1 SAMUEL 28 Bible Online

1 SAMUEL 28 - Ninia Yali bible

1 SAMUEL 28

¹Il misig eke welatlug de it ap homi Filistin enap enautsi sehen foroho on fol-esalug de ap homi Israel enap enowarik kul ulug duruk kwit de, at Akhis anyo en Daud fam uruk kwit de, “Hat de holukdoho, hat nim hat hautsi nim de an nibil atlug dog yabik kuluhup anyo i,” ulug hweag-etfag.

²Airoho hweag-etfag ma re, at Daud en onggo uruk kwit de, “Aire duk alereg, we nakni hun haren nesamihin men, an hamingming angge en hun nakni hat fahet de keroho durukmu neamihin e,” ulug hweag-etfag. Airoho ebag ma at Akhis anyo en uruk kwit de, “Fano! Hat de an nonggwareg nalong apdoho naluluk unduhuk lit ninim lauk katmihin en unduhuk hobahaki,” ulug hweag-etfag.

³ At Samuel anyo re mundoho waratfag ma it ap homi Israel on en obahet oba yaho febagdeg o Rama, at onggwareg obam kota etmano salfag. Horog bul etanore at Saul anyo en ap fobik diroho aruhu suroho aruhu ulug uruk on mel hein og angge mel ap waratuk on enaheime wol-enepuk on mel de ap homi Israel on wereg ma suma welamlusa fug ulug mundoho muko wilibi fesebag.

⁴Airoho debebagdeg weregman de it ap Filistin dog yapuk enap anyore o kota Sunem horogma etma o sabo wirik watfag ma re, at Saul anyo oho ap homi Israel on kabog-esebagdeg de it de Dom Gilboa fam o sum fam sabo wirik lebag.

⁵Airoho wirik lebagdeg de aren esauk men de it Filistin on sehen foroho enap etano esebagdeg de akol humon atfag.

⁶ Airoho debagdeg de aren de At TUHAN en diroho-suroho hweag-nomag ulug heng debag famen de TUHAN en onggo hweag-etfag fug. A fene en oho eke hweag-etfag fug, ne Urim mel, Tumim mel, Allah enda boruk ale hweag-nesaog ulug heng duruk katfag angge eta fam oho, ne it Allah ele hweag-esauk katfag on nabi etmano fene en oho onggo eke hweag-etfag fug.

⁷Ai fam de Saul en autsi along baloho wereg on etmano fam uruk kwit de, “Hiren hwe ai hein og-angge ap waratswa on enaheime wol-enepuk on eke herarik lakiek, an hwe ai akit diroho dimihin hweag-nomag ulug akit lamin anggere,” ulug hweag-esebag. Airoho ebag ma iren onggo uruk kwit de, “O En-Dor etma neg de hein og-angge ai hag on wereg,” ulug hweag-etfag.

⁸Airoho hweag-etfag ma re Saul anyo ap en inil neano ulug de sum amu on wan-debebagdeg de ap biren en eyogmaroho re hwe hein-og angge anyo akit hup deg ma aik lebag. Airoho aik lebagdeg Raja Saul en uruk kwit de, “An den ap unuk imin on ai aheime angge wol-din, ne wol-dulug de, aren diroho aruhu su roho aruhu ulug hweag-homag dohore heng diyug,” ulug hweag-etfag.

⁹Airoho ebag ma at hwe anyo en onggo uruk kwit de, “Nowe hat oho holuk deg lit deg, at Raja Saul anyo en de ap fobik diroho aruhu-suroho aruhu ulug uruk on mel, hein og-angge ap waratswa on enaheime wol-enepuk on[71] mel, de it ap homi Israel on weregman mundoho muko wilibi fesesi anyo anggere. Aireg ma re nunggwelug nowe haren an alema re nobalug nowarukwag ulug duruk kahen?” ulug hweag-etfag.

¹⁰Airoho hweag-etfag ma at Saul anyo en ele hombuk balduk kwit de, diroho ebag, “TUHAN oluk wereg on unuk, anggere haren airoho dimihin ai fam unggum og-humuhup fug ulug an den sali wat-hutuk kahi,” ulug hweag-etfag.

¹¹Airoho ebag ma hwe anyo en uruk kwit de, “Nowe hat hobahet de ap sa aheime wol-dimin?” ulug hein-og-hebag ma, At Saul en onggo uruk kwit de, “Samuel aheime,” ulug hweag-etfag.

¹²Airoho ebagdeg duruk men hwe anyo en Samuel hebagdeg ngaruruk kwit de aren hun Saul anyo fam de, “Nowe haren nunggwelug an hamingming angge lal-nabehen? Nowe hebere raja Saul hag!” ulug hweag-etfag.

¹³Airoho hweag-etfag ma at raja anyo en uruk kwit de, “Hakol duk fug! We haren hil hehen on ai hweag-nimin!” ulug hweag-etfag. Hweag-etfag ma at hwe anyo en onggo uruk kwit de, “An hamingming angge en de heime kwenang apma en enamaik waharukmu hihi,” ulug hweag-etfag.

¹⁴Ai ebag ma Saul hein-og-hauk kwit de, “Apere nangginig laha?” ulug hein-og-hebag ma, Aren onggo uruk kwit de, “Ap misig sobal ahun, aren asum ummen bekit eyogma jubah anyo wandeg angge enam aha,” ulug hweag-etfag. Airoho hweag-etfag ma, ai fam de at Saul en de aire Samuel anyo ulug oluk atfagdeg, aren elenggen dimi-debelug along deg bebagdeg mot-debag.

¹⁵Airoho debagdeg at Samuel en Saul fam uruk kwit de, “Nunggwelug haren an elel-napuk kahen? Nunggwelug haren an nikangge sombandoho wamag ulug wol-nabehen?” ulug hweag-etfag. Airoho hweag-etfag ma at Saul en onggo uruk kwit de, “An den At Allah en nobahakeikma re it ap Filistin enap en nenowarik kwik wamukoho duruk en de nenda nong-hong eheikma duruk kahi. An den it Allah ele hweag-nesauk on fene en ulug oho, na fam ulug oho hein og-hihi famen de an nele onggo hweag-nereheik fug mu. Ai fam de nakni haren an nobam diroho din ulug hweag-nomag ulug nakni hat heng hapuk kahi,” ulug hweag-etfag.

¹⁶Hweag-etfag ma at Samuel en uruk kwit de, “At TUHAN famen hat haselei on ahareg hat hobaharuk kweleg de an de nunggwe fahet wol-nabehen?

¹⁷ At TUHAN en de an fene en uruk katsi ale etano higitdoho deheik ai. TUHAN en de hat raja wereg lit melal-enepuk kahen on anyo okore at Daud fam og-ereheik.

¹⁸ Hat de TUHAN awene melaleg hweag-hutuk kwit, Diroho diyug suroho diyug, ulug hweag-hitsi on anyo sahaloho folug, ap homi Amalek on enebe mel, enangge mel, elehapdoho fesouk eleg angge dirihin ai fam de, ketia At TUHAN en hat hobam airoho hobaharuk ai.

¹⁹Hat inim ap homi Israel on inim de ap homi Filistin on fam og-esahu. Sonore hat inim, hat homaliki ap angge on nim de an ninim kabog-duhuk anyo i; ne it Israel on en sehen foroho on famen ohore TUHAN en ap Filistin on enenggikmu og-esahu,” ulug hweag-etfag.

²⁰Airoho hweag-etfag ma re at Samuel en urukmu holfag on anyo fahet youk lebagdeg de, etano li em at at Saul anyo ululu sipukdoho enobam sahali uruk en duruk etano hagdoho at Saul anyo kwenangma sisaroho ying-atfag. Ne, at ebe oho hup hundig nukoho hundig siburu eke nebag fug mu re ebe et lilipnaroho debag.

²¹At airoho durukmu re hwe hein-og angge anyo aluluk aik lebagdeg hauk men de Saul anyo keroho dimin ulug nong-hong angge durukmu hebagdeg de, hwe anyo en at obam uruk kwit de, “Nowe an de nowe haren din ulug hweag-nerehen ale anyo fahet de nebe et mundoho eleg-am aleroho dihi.

²²Anggere nowe haren ohore an hamingming angge en hweag-hitmin on hol-nabiyug. Nowe hat nikangge kwe fam lamihin anggere nauk on dorangge an hamingming angge en werako feik watmin on eta nakiyug,” ulug hweag-etfag.

²³Airoho hweag-etfag ma, at Saul en airoho ebag on anyo owag oko embeseruk kwit de, “An den namin fug,” ulug ebag. Famen it autsi pegawai omano en oho enele abiroho neg nakin uruk en de, it enele hole febagdeg at ebe kwenangma en inatfagdeg hweriatuk angge anyo fam hweria atfag.

²⁴Airoho hwerieg kweleg de folo-folo etano hwe anyo en de owam sapi omalik asei wereg on anyo wat-hebagdeg de tepung okore berelfagdeg de aren roti fituk angge fouk fug angge witfag.

²⁵Airoho wiri febagdeg de nauk angge anyo at Saul mel, autsi pegawai etmano mel fam nowag ulug feseik watfag ma, it etmano nebag. Mundoho nebagdeg de it enebe hup anyo salim neg lebag.