Read Ninia Yali 1 SAMUEL 29 Bible Online

1 SAMUEL 29 - Ninia Yali bible

1 SAMUEL 29

¹Ap homi Filistin enap enautsi sehen foroho on abirangge o Afek kabog-debag, ne it it Israel on de ik horogma o Yizreel donggoma etma o sabo sum fam on salfag.

²Airoho debagdeg de it Filistin on enowesi raja enebe foaben etano enautsi eke 100 en nim helaheroho, ne eke 1.000 en nim helaheroho eratfagdeg de waharuk katfag; Ne, at Daud autsi mel de enembolma at Raja Akhis mel fobik eratfagdeg waharuk katfag.

³Airoho waharukmu re it Filistin enap sehen foroho on enowesi panglima lohon etmano en esebagdeg uruk kwit de, “Ap Ibrani enap aire suma nunggwe fahet wereg?” ulug hein-og-esebag ma, At Akhis en onggo uruk kwit, “Sure Daud atam at Saul it Israel on enowe raja obahet pegawai welatsi on anyo. At ebere horog anunuroho an ninim welahe. At ebe suma wahasi huli en angge ketia huli aire aren siag disi on ulug eke hauk kahi fug,” ulug hweag-esebag.

⁴Airoho hweag-esebag famen de it Filistin on en sehen foroho on enowesi panglima etmano en Akhis fam enolokdoho bet-duruk kwit de, “Ap aire o kota og-itihin mu etma lowagdoho hweag-imin. Aren nit dog yapukmu anggelegma etman nit lal-nenebuk no re at de nit ninim seberoho dog yabik lamisi fug. Airoho duruk li aure aren eiyale aha ma ulug owe raja enda oko ulug aren nit nenautsi enowaruk alereg anggere.

⁵ At aure Daud no a? Hun au fahet endam hwelani en suni wiliboho siruruk kwit de, diroho uruk katswa, At Saul en de aselei on de we beribu-ribu en neg enowatsi, famen de at Daud en de berpuluh-puluh ribu en enowatsi, ulug uruk katswa omanore,” ulug hweag-etfag.

⁶Airoho hweag-etfag ma at Akhis anyo en Daud wol-debagdeg ele obam uruk kwit de, “TUHAN oluk wereg on unuk anggere, haren an nobam furoho duruk kahen ale ai fahet de nahayeg boruk kahi. Ne, hat hebe an ninim sisiroho dog yapukmu su yabik kwela aire nahayeg boruk kahi. Hat an wereg ma waharihin huli en ketia huli ai haren siag dirihin on ulug eke hauk kahi fug mu re. Famen de it enowesi amu on aire hat fahet enerim hapuk.

⁷Anggere hobam we koloroho lakiyug, ne it enolok amag ulug amu ale eke duk fug,” ulug hweag-etfag.

⁸Airoho hweag-etfag ma at Daud en onggo uruk kwit de, “Nakni hun log an den de siag nangginig on dirihik mu? Nakni hun log haren ehen hagdoho, nakni hun log haren an den siag dirihik on eke an hamingming angge nakni hun log hat hobahet duruk ale indip dirihik huli en ketia dia huli wereg elegma neauihin halug de, nunggwelug an hamingming angge it hun log haselei on etma inim dog yabik lamihin fug ulug hweag-nutuk kahen?” ulug hweag-etfag.

⁹Airoho hweag-etfag ma at Akhis en onggo uruk kwit de, “An den de haren fik-furoho duruk kahen ale ai fahet hat de Allah en boholma yonggo etmano hag deg lahen ulug boruk kahi ale anyo hat de mun holuk. Famen de it sehen foroho on enowesi panglima etman katukdoho uruk kwit de, hat de nit ninim dog yabik laul fug ulug ehesa.

¹⁰Aireg anggere, Daud, sonore hubetdoho inatlug de mo lahaik waruhu mu etare hit at Saul wereg ma en embeselug an nakit waharuhup on anyo re folo-folo lakiyug,” ulug hweag-etfag.

¹¹Airoho ebag ma re likia sekandoho hubet de Daud mel, at autsi mel de o ap homi Filistin on enobam etmano watfag, ne it Filistin enap sehen foroho on anyore o Yizreel etma lebag.