Read Ninia Yali 1 SAMUEL 3 Bible Online

1 SAMUEL 3 - Ninia Yali bible

1 SAMUEL 3

¹Airoho atil lauk kweleg de at Samuel ebe dorangge anyo hun Eli apma wereg lit TUHAN obahet duruk katfag. Ne, etali em de At TUHAN en diroho aruhu ulug ena fam hag hweag-esauk ale nim, ele fam diroho diyug ulug hweag-esauk ale nim de duruk katfag fug.

²Airoho duruk katfag fug famen de, hup misig salim de at hun Eli mun sobal atfagdeg, il mundoho hupni-am ale duruk katfag on anyo at obam olma ambe baleg nohorukmu etmano nohoruk katfag.

³Ne at Samuel de o TUHAN Obam Sabo wirigmu etmano en e Peti Allah en Sali Wene waroho og-enepfag angge baleg on yohwareg ulug walug noruk katfag angge anyo aluluk nohoruk katfag. O orohole owan hil yingguruk kweleg, lampu mel ambogbagdeg wereg ma

⁴TUHAN en Samuel wol-debag ma, at Samuel en onggo hweag-utuk kwit, “Wui, Nakni!” ebag.

⁵Airoho ebagdeg at ebe buroho hun Eli akit lebagdeg aren uruk kwit, “Nakni nunggwangge wereg? Nunggwelug an wol-nabehen?” ulug hweag-etfag. Airoho hweag-etfag famen de Eli en uruk kwit de, “An de hat wol-habihi fug anggere nikangge nohweik lakin,” ulug hweag-etfag ma at Samuel anyo nohweik lebag.

⁶Ai en ombolim TUHAN en Samuel ekenim wol-debag, famen de TUHAN Samuel inim ele eke ebag fug mu, ai TUHAN en wol-napuk anyo at apeleg deg latfag. Ai fam de at ebe nohoruk men inatlug hun Eli wereg ma lebagdeg hein-og-hauk kwit, “Nakni nunggwangge wereg? Nakni haren an wol-nabehen ai nunggwelug?” ulug hein og-hebagman at hun Eli en uruk kwit de, “Namloho; an de hat wol-habihi fug anggere nikangge nohweik lakin,” ulug hweag-etfag.

⁸Enggik henahaneg on nikale TUHAN en Samuel wol-debag. Airoho wol-debag ma at Samuel anyo oluk atfagdeg hun Eli wereg ma akit lebagdeg ele uruk kwit de, “Nakni nunggwangge wereg? Nakni haren an wol-nabehen ai nunggwelug?” ulug hweag-etfag. Airoho hweag-etfag ma at Eli anyo en de aire TUHAN en omalik su wol-duruk ulug ape enggat-debag.

⁹Ai fam de aren Samuel hweag-utuk kwit, “Nikangge nohweik lakin, ne nohoruk men hat nikangge wol-hapuk neg halug de diroho iyug, TUHAN nakni, an hamingming angge nesanggo holeg lahi anggere hele hweag-nimin, iyug,” ulug hweag-etfag ma at Samuel anyo nikangge nohweik lebag.

¹⁰Airoho hweag-etfag man at lebagdeg nohoruk men fobik en TUHAN watfagdeg nikema etano inaik watlug at Samuel wol-duruk kwit, “Samuel, Samuel!” ebag ma at Samuel en onggo uruk kwit, “TUHAN nakni, an hamingming angge nesanggo holeg lahi anggere hele hweag-nimin,” ebag.

¹¹Airoho ebag ma TUHAN en hweag-utuk kwit, “An den mun fulu laleg on eke it ap homi Israel on fam duhukmu, it ap homi enemu domog enesanggo holuhup on en de enenda nong-hong uhup.

¹²Ai salim de an den hun Eli ahain elekwe inim enobam di on su on debesehuk en ulug nelewal irihik on anyo keram huli en ambiangma huli mundoho debehuk.

¹³An den at hweag-utuk kwit, hat homaliki en An nunuk sebeloho foruk kweleg at Eli omaliki enesiag duruk ale oluk deg liren it bet-enebuk fug angge welatsi ai fam de An den at ahain elekwe on unggum mundoho-mundoho enobam fohuk ulug hweag-itihik.[11]

¹⁴Aireg ma re An den hun Eli ahain elekwe on fahet hombuk balduk kahi ai, it omaliki enesiag mun hum-ham on aire wam waroho ulug oho, amu angge nunggwangge en ulug oho, mundoho-mundoho fahet elehapdoho fouk fug alereg,” ulug hweag-etfag.

¹⁵Airoho hweag-etfag ma at Samuel anyo nikangge nohobag. Nohobagdeg hubetdoho inatlug o Tuhan obam wirig anyo sok husi fil lebag. Airoho duruk kwit de aren hup angge a fam hebag ale anyo fahet de hun Eli hweag-utuk ale akol atfag.

¹⁶Famen de at hun Eli en ebe wol-hebagdeg ele uruk kwit de, “Samuel, namloho.” Ebag ma, at Samuel en onggo hweag-utuk kwit de, “Wui, Nakni,” ulug hweag-etfag.

¹⁷Airoho wol-hebagdeg at hun Eli en hein og-hauk kwit, “TUHAN en wene hat hobam hweag-hereheik on eke wereg a? An nobam abirangge dindilin. Ne, haren foma heraho femihin halug de At Allah en hat demdoho unggum hobam fohu,” ulug hweag-etfag.

¹⁸Airoho hweag-etfag ma at Samuel en wene mundoho etmano hun Eli hweag-etfag. Ne, aren foma eke herahabag fug. Airoho dindil-etfag ma at hun Eli en uruk kwit de, “At de TUHAN, deg ma Aren su fano boruk ale airoho neg dukwag,” ulug ebag.

¹⁹Ne, at Samuel anyo ebe mun log-atuk katfag. At ebe TUHAN inim wereg lit aren duruk on etmano ambiangma mundoho neg atuk kamag ulug deberuk katfag.

²⁰Ai fam de it ap homi Allah omaliki Israel on etmano en inim, ap homi o etma welatfag on en inim de at Samuel fahet de sure Allah ele hweag-esauk on wereg, uruk katfag. Kirim-keram TUHAN ebe at Samuel fam enam-atfagdeg inim enele matfag ma o Silo etmano enam-atuk kwit neg welatfag.