Read Ninia Yali 1 SAMUEL 31 Bible Online

1 SAMUEL 31 - Ninia Yali bible

1 SAMUEL 31

¹Airoho duruk kweleg anyore it ap homi Filistin enap de it Israel on inim weim yapul ulug o Gilboa domma kwe etma yabik watfag. Etman de ap Israel on humdoho enowatfag ma waratfag, ne it fomane inim, at Saul inim, omaliki inim de heiye wilipfag.

²Famen de it ap Filistin on etmano enombolim lebagdeg de at hun Saul omaliki en enesahalimu enebe henahan angge: Yonatan mel, Abinadab mel, Malkisua mel etano re enowatfag ma waratfag.

³At Saul wereg ma horog kwe etano re dog mun anggoloroho yapukmu re at ebene it aselei on enandog en humdoho selerebebag ma dog en wareg kwe etma ebene yebil hum atfag.

⁴Airoho deg ale en de at Saul en ap sauwe on at asehen walug lauk katfag on anyo fam uruk kwit de, “Ap TUHAN enapeleg on en nele ying-bingdoho nowaruk no re haren henggarog ai lit halug de an dale nobahain,” ulug hweag-etfag. Famen de at nimi sauwe on anyo hun ai along boruk katfag ma dalduk ale nerim ulug embesebag. Ai fam de at Saul onggwareg en de enggarog anyo webagdeg de karog anyo ambiangma alukwe belabeg deiyal atfag.

⁵At nimi sauwe on anyo en il hauk men de hun Saul anyo mundoho waratfag ma hebagdeg de aroho enggarog ambiang lahabe folug alukwe belabeg karog anyo ambiangma deiyal atfagdeg Saul aluluk etano waratfag.

⁶Airoho at Saul inim omaliki enebe henahan etano inim, at autsi abirangge etmano inim, nimi sauwe on anyo inim, nukoho misig salim ai neg enebe waratfag ai.

⁷Airoho waratfag ma re it ap homi Israel on o Yizreel donggoman foma fil wereg latfag on mel, it Ik Yordan foma fil en mo lahaik waharuk fil welatfag on mel, en enesanggo holduk men de, ap Israel on en sehen foroho on etmano re enakol en wilibehesa o, ne at Saul anyo omaliki inim ohore mundoho enowarahesa, urukmu enesanggo holfagdeg de it etmano enobam kota sili embeselug enakol en lebag. Airoho lebag ma re it ap homi Filistin on etmano en de o kota etmano sebelik kwebag.

⁸Likiare it ap Filistin enap wareg on etmano enangge hwelaul ulug waharuk men de at Saul inim, omaliki henahan etano mel, ohore dom Gilboa fam etmano wareg ma esebag.

⁹Aireg ma hebagdeg de iren at Saul unggul kong bal-deheg, asum dog yapuk kwit wan-duruk katfag on anyo nonggol-deheg, debagdeg de it ap Filistin on etmano en de wene fano on at Saul waratfag ale anyo re o mundoho etmano ap homi Filistin on enobahet mel, enanggembu dewa mot-duruk katfag on fahet mel wene walug hweag-esa lowag ulug enele fatfag.

¹⁰Airoho fatfagdeg de at Saul asum dog yapuk kwit wan-duruk katfag on anyo re iren enanggembu hwe on unuk Dewi Asytoret anyo fahet owik ele hilinggoho wirigmu anyo feik lebag, ne ebe re o kota Bet-Sean obahat fam bosiemanggen waroho febag.

¹¹Airoho debag famen de it ap homi o Gilead en Yabesh enap anyo en de at Saul fam it Filistin enap en debag ale anyo enesanggo holfagdeg de,

¹²it etman ap mun enambong si sereg on neg wilipfagdeg de hup hundig de o Bet-Sean anyo lebag. Lebagdeg de iren at Saul wareg anyo inim ne at omaliki wareg o kota obahat fam waroho febag angge anyo loloho belabik watfagdeg de o Yabesh watfagdeg de etma indokma yal enepfag.

¹³Airoho yalfagdeg de enowagma etmano re mundoho kabog-debagdeg de iren e tamariska indipmu o kota ai fam etmano kwenangma salfag, ne airoho debebagdeg de it anyo siburu na fug eleg angge enambilik hweang neg weregman de nukoho sabiren welatfag.