Read Ninia Yali 1 SAMUEL 4 Bible Online

1 SAMUEL 4 - Ninia Yali bible

1 SAMUEL 4

¹Ne, at Samuel ele uruk li em de it ap homi enunggul unuk Israel on abirangge en holduk katfag. Eta li em it Filistin enap enautsi tentara esan lohwal-esebagdeg de it ap homi Israel on bin enowarik kul ulug debag. Airoho duruk ale en[12] de it ap homi Israel on oho dog yapukmu lebag. It enebe lebagdeg de o Eben-Haezer horogma etma o sabo salik lebag, ne it Filistin enap de o unuk Afek etma sabo salfag.

²Airoho salfagdeg de it Filistin on enautsi sehen foroho enap etmano fil en atam dog sinalik watfag ma, airoho ininim hag-labuk watuk kwit de, it ap homi Israel on fil enalong eleg-atfag. Ai fam it fil ap enebe 4.000 en dog yapukmu etman sehen en waratfag.

³Airoho enowatfag ma it ap homi Israel on anyo enobam sabo wirigmu etmano waharuk men de it Israel on enowesi log-lohon anyo en uruk kwit de, “Yoho su salim de At TUHAN en nunggwelug nit ap homi Filistin on ai en nenalong elehap debelug nenowarukwag ulug debeheik? Nit nenaselei on famen At TUHAN en[13] let-nenebeheg, ninili weheg, dukwag dohore, TUHAN en Sali Wene waroho og-nesasi on e Peti fam wirig angge anyo o Silo en wag-lauldeg suma feik wamukohon,” ulug ebag.

⁴ Airoho ebagdeg de iren Peti Sali Wene wareg At Allah Mun Omamne humon anyo ebe enam-aik waharuk angge anyo hambohweik lowag ulug ap o Silo mon-enepfag. Mon-enepfag ma it hun Eli omaliki Hofni inim, Pinehas inim etanore e Peti Sali Wene Wareg wirig angge ai bearulug waharukmu inim walug watfag.

⁵E Peti Sali Wene wareg anyo walug it ap homi Israel on en enobam sabo salegma etmano feik watfag ma, enehayegdoho amitmit sup ebag on de mun enele nguroho ebag ma kwenang et mundoho elek debag.

⁶Airoho urukmu it ap homi Filistin on en oho amimit-debag on anyo enesanggo holfagdeg, iren uruk kwit, “Ap homi Ibrani on etma re nunggwelug enahayeg en amitmit duruk?” Ebag, famen de e Peti Sali Wene wareg yohwareg angge anyo it enesahalimu aik waha ma uruk ulug enoluk atfagdeg,

⁷it mundoho enakol atfag ma, iren uruk kwit, “Kembu unuk dewa anyo it enesahalimu waha! Anggere nit alemat amukoho lahe! Nit de airoho on eke atuk mu hauk kahe fug ahi!

⁸We dik-demdoho alemat amukoho lahe! Ap san eke kembu unuk dewa omamne on ai famen ninili oko nenobahauk alereg? Kembu dewa ai en at ap homi Mesir on endam o leimu en enowatsi anyo.

⁹Aireg anggere, yaho ap Filistin henap, henambong si-se debeiyug! Henebe ap en hagdoho neg wilibik lakiyug, ne airoho duhup fugmen de, it ap homi Ibrani enap ai atam hit henamingming angge atlug welatswa anyo hagdoho, hiroho it enamingming angge amuhup. Aireg ma re henembong siseroho neg yabik lakiyug!” ulug ebag.

¹⁰Airoho ebagdeg it ap Filistin enap anyo dog mun bale fouk fug aleroho yapuk kwit de it Israel on enautsi sehen foroho on etmano enalong elehapdoho fesebag. Airoho duruk kwit it Israel on enobam sabo saleg kwe hundomog lebag. Ai salim ap Israel on sehen foroho on enebe 30.000 en enowatfag. Ai salim we dik-demdoho it fil enalong eleg atfag.

¹¹Airoho enowatuk kwit, e Peti Allah en Sali Wareg Wene yohwareg angge anyo it enaselei on en del-dauk, hun Eli omaliki Hofni mel, Pinehas mel, etano enowatfag ma waratuk, debag.

¹²Airoho atfag ma it enunggul unuk Benyamin on misig eke dog yapukmu etmano en de buroho o Silo nukoho anyo salim neg aik lebag. Airoho lebagdeg de enda ouk en ulug de asum mun dilip-dalap esebagdeg kwenang unggulmu lahapfag.

¹³Airoho duruk kweleg de at hun Eli anyo obam si ebagdeg e Peti Sali Wene wareg yohwareg angge wirig ai keroho ahap wendareg welaruhu ulug de kwe elanma e doaleg hweria-atuk angge fam hwerieg lit meneni ebetuk katfag. Ne, at airoho ebetuk kweleg ap lebag on anyo en it Israel enap hwarea enowatfag ma enalong eleg atfag ale anyo dindilik watfag ma re ap homi o sili wereg on etmano mundoho oba yingguluk ebag.

¹⁴Airoho oba yatuk mu at hun Eli anyo en hol hebagdeg hein og-esauk kwit de, “Enele neg hum ale uruk aire nunggwe fahet?” ulug hein og-esebag ma, at airoho hein og-enepuk kweleg ap lebag on anyo buroho at hun Eli akit aik watfagdeg, wene mun siag on anyo hweag-etfag.

¹⁵At hun Eli ebere umur 98 tahun atfagdeg il mundoho hupni-am alereg latfag.

¹⁶Airoho deg lit wereg ma ap lebag on anyo en hun Eli hweag-utuk kwit, “An den we yoho neg dog yapukmu etmano en buroho suma aik wahi,” ulug hweag-etfag ma, at hun Eli en hein og-hauk kwit de, “Namloho, wenere keroho i?” ulug hein og-hebag.

¹⁷Airoho hein og-hebag ma at wene walug lebag on anyo en onggo hweag-utuk kwit, “Israel enap de it Filistin enap fam en hou wilibehesa. Nit ninibil de ap wareg on hum aha ma welahe angge anyo i. Ne, ap de mun hum-hamdoho nenowarehesa, ne nakni hat homaliki Hofni inim, Pinehas inim etano oho enowarehesa. Ai en e Peti Allah en Sali Wareg wene yohwareg angge anyo ohore it ap nenaselei on en del dehesa!” ulug hweag-etfag.

¹⁸Ne, at wene walug lebag on anyo en e Peti TUHAN en Sali Wareg yohwareg angge anyo fahet uruk li etanore at hun Eli o elehet oho on sokole foma fil e doaleg hweriatuk angge fam hwerieg latfag angge anyo orohole belabeg sapurik wambebag. At ebe mun sobal atfag famen de obahare firig ahun deg latfag ma re at ebe wamburuk kwit anggolobag somboroho waratfag. Ne, at ebere it ap homi Israel on 40 tahun melal-enepuk katfagdeg waratfag.

¹⁹Etano li em at hun Eli eyamalhwe amloho Pinehas ohwe anyore omalik ahummu mundoho wirik atfagdeg enderikoho horog deg latfag. Airoho wereg kweleg at hol-hauk men de e Peti Allah en Sali Wene anyo ap en del-dehesa eheg, at eyamal inim, ahun inim oho warahesa eheg, urukmu esanggo holfagdeg, fetagdoho etano neg omalik ambol nebagdeg, il dorangge welatlug etano-at omalik anyo endetfag.

²⁰Omalik endetfagdeg en at ebe waratmin ulug duruk li etanore it homi at omalik endag-daukmu let-debag on etmano en uruk kwit de, “Homalik de ap omalik! Anggere henda hambuk debeiyug!” ulug hweag-etfag famen de aren it onggo eke hweag-esa fug angge ne it mel fubi debesouk fug angge welatfag.

²¹Airoho wereg kweleg omalik anyo unuk de, “At Allah aseleg ambogbag on fam watlug wereg ma anyo it Israel famen eleg aha” ulug de Ikabod[14] soalfag. Ne, iren airoho soalfag aire e Peti Allah en Sali Wene wareg angge anyo del-dausa ne eyamal inim, ahun inim de waratswa ulug soalfag. Ai fam aren uruk kwit, e Peti Allah en Sali Wene wareg anyo ap homi en del-duswa ulug de “Allah At mun ambogbag ahun wereg lit enam-aik waharuk on anyo it Israel fam en longgo eheik,” ulug ebag ai.