Read Ninia Yali 1 SAMUEL 5 Bible Online

1 SAMUEL 5 - Ninia Yali bible

1 SAMUEL 5

¹It ap homi Filistin enap en e Peti Allah en Sali Wene wareg anyo delfagdeg de o Eben-Haezer en walug de it enobam o kota Asdod feik lebag.

²Walug lebagdeg de e Peti anyo walug iren enanggembu unuk Dewa Dagon obam wirigmu etmano walug kwebagdeg, dewa anyo aluluk etano feik lebag.

³Airoho feik lebag ma hubet sekandoho it ap homi Asdod on o kembu dewa obam wirigmu anyo waharuk men de kembu Dagon anyore e Peti Allah en Sali wene wareg anyo olohotma etano orohole belabeg sebeleg latfag! Airoho deg latfag ma iren kembu anyo oko obalma endenoho unduhuk febag.

⁴Famen de likia hubet nikangge kumu hauk men de kembu anyo e Peti Sali anyo olohotma dalorebagdeg wereg ma inil hebag. Airoho deg ma hebag famen de bireneg angge dalorebag on ai fam de kembu ilitdeg anyo enggik mel, unggul mel, de sanogdoho o sokole kurukmu etano wereg latfag; ne ebe obahare neg de buhun angge welatfag. (

⁵Ai fam de it ap kembu unuk Dewa Dagon obahet duruk katfag on inim, ne it Dagon ai apne wauk katfag on it Asdod enap inim de ketia huli en sok kembu Dagon obam ai elma kwik lauk kwit de eneyog sobit ha fug angge sohwandoho kwik lauk.)

⁶Ai en ombolim de TUHAN en ap homi Asdod on inim, it foma horog kwe etma welatfag on inim de enebe fene duk-duk angge[15] fam unggum og-esebag.

⁷Airoho enobam atuk ale anyo iren inil hebagdeg iren uruk kwit de, “Allah it ap homi Israel on anyo en de nit nenebe nim nenanggembu Dewa Dagon mel fam unggum og-nesauk anggere, niren e Peti Sali aure suma anunuroho welamag ulug duk fug,” ulug ebag.

⁸Airoho ebagdeg de iren ap homi Filistin on enowesi raja enebe foaben etano kabog-dik wamag ulug wol-enesebagdeg hweag-esauk kwit, “Ap homi Israel on en enahan Peti Sali aure niren nanggini foul behep?” ulug hein og-esebag. Airoho hein og-esebag ma iren onggo uruk kwit de, “O Gad oko feik lakiek,” ulug hweag-esebag ma, okore o it Filistin on enobam amumu eke unuk Gad etma feik lebag.

⁹Etma feik lebag famen de At TUHAN en it kota ai enap fam oho unggum enobam febag ma re enele alikdoho youk kwelap esebag. Ap homi on de ap sauwe on mel, sobal on mel enebe fene duk-duk angge fam unggum og-esebag ma, enebene fitil lebag.

¹⁰Airoho duruk katfag ma e Peti Sali anyo hamboko walug de it ap homi Filistin on enobam amumu eke unuk Ekron etma feik lebag. Airoho feik lakoho walug lebagdeg o anyo fam kwik lauk men de ap homi o etma on en amitmit duruk kwit de, “E Peti it ap homi Israel on enakni Allah en Sali Wene wareg aire nit mundoho binggi nenowarukwag ulug suma feik waharuk kahep a,” ulug ebag.

¹¹Airoho ebag ma iren ap raja Filistin on etmano abirangge kabog-dik wamag ulug wol-enepfagdeg hweag-esauk kwit, “E Peti Allah en Sali Wene wareg it Israel on en aire nit nenebe inim nit nenahain elekwe inim mundoho binggi nenowaruk aleroho feik wahep anggere obale keram welatsi mu etma feik lakiek,” ulug hweag-esebag. Allah en it ap homi o etma on anggin mun hondoroho enobam febag ma enenda youkdoho debag.

¹²Ap homi waratfag fug on de enebene duk-duk angge aik watfag ma, it ap homi o kota etma on en enanggembu dewa fam let nenebukwag ulug hwiruruk katfag.