Read Ninia Yali 1 SAMUEL 6 Bible Online

1 SAMUEL 6 - Ninia Yali bible

1 SAMUEL 6

¹E Peti TUHAN en Sali Wene wareg anyo it ap homi Filistin on wereg ma bigalem sabiren wereg latfag ma,

²it ap homi Filistin on en de, “E Peti TUHAN en Sali Wene wat-esebag on aure nanggindul?” ulug, it hwal enap on inim, it hein og angge suroho aruhu ulug enele uruk katfag enap inim, hwi-enepfagdeg hein og-enepfag. Iren uruk kwit de, “Obalma feik lahuk halug de keroho feik lahuk?” ulug hein og-enepfag.

³Airoho hein og-enepfag ma iren onggo hweag-esauk kwit, “Peti it Israel on enakni Allah en Sali Wene wat-esebag on aure we airoho neg obalma feik lahupde fug, ite henesiag onggo balohore onggo enda fano angge inim feik lahup. Hiren airoho duhup ai fam de hit henebe fano aheg, ne it Israel on enakni Allah ai en de nunggwelug nit nenobam unggum neg foruk, ulug henoluk aheg, duhup,” ulug hweag-esebag.

⁴Airoho hweag-esebag ma, it ap homi etmano en hein og-esauk kwit de, “Nenesiag onggo aire onggo nunggwangge on at og-umuhuk?” Ulug ebag ma, it hwal enap on etmano en onggo uruk kwit de, “Ouk duk-duk angge ilitdoho re emas on foaben inim de, bak sipurik ilitdoho re emas on foaben inim it Filistin on raja wereg aleroho feik lahup. It ap homi holduk on inim, raja inim de fit-fit ilitdeg angge inim bak sipurik inim anggin-fanggin ai on enobam aik wahasi fug no a?

⁵Anggere hiren bak sipurik hit henobam silimu suma saha isireg ohwei fouk fug ale duruk on au en ilit angge duk heheg wiruhup. Airoho duhup ai fam de hiren At Allah Israel on anyo along bolug leho fohup. Ne, Aren ohore hit henebe inim, henanggembu dewa inim, henanggwenang inim, fam unggum foruk ale embesehu lit deg.

⁶Ap homi Mesir on inim enowe raja inim en enunggul owag omanne atlug duruk katswa hag aire nunggwe fahet duluhup? At Allah en it enobam enabusel sahal-fahal debeserukmu iren duk fug ale neg atil lauk-em it ap homi Israel on o Mesir embeselug wilibik wahausa ale anyo henapeleg-am fug.

⁷Aireg anggere hiren e wirig wam sapi en lisulug lauk angge unuk pedati keron eke inim wam sapi omalik owan ag nauk on biren e wirig ai owan lisulug lauk eleg on inim, walug de wam sapi biren aire e wirig ai fam het-debelug de omalik neg de siloho enobam feseik lakiyug.

⁸Airoho feseik lalug de e Peti TUHAN en Sali Wene wareg anyo hamboko e wirig wam en lisulug lauk angge anyo fam lahabe folug de, aluluk kwere hiren henesiag onggo baloho at og-umuhuk ulug foruhup angge, emas on en duk-duk angge ilitdeg mel bak sipurik ilitdeg mel etmano lahabe feiyug. Airoho lahabe fohupmu re sapi etano mel, e wirig unuk pedati wam en lisulug lauk angge anyo mel enemu fotog-esahupmu lowagdoho ulug embeseiyug.

⁹Airoho laukmu re hiren keroho lauk katmisi e, ulug hinil feiyug; Hinil furegman e Peti Sali anyo lahe obam indip fil o Bet-Semes etma lauk halug de, nit nenobam alemat humon atsi ale sure Allah Israel on enakni anyo en nenobam feik wahasi bohup. Famen de e wirig unuk pedati anyo ai fil lauk fug halug de At Allah ap homi Israel on enakni anyo en en nenobahaik wahasi fug, we aroho atmin besireg disi bohup,” ulug airoho hweag-esebag.

¹⁰Airoho hweag-esebag ma ap homi etmano en higitdoho neg duruk kwit de, wam sapi owan ag nauk angge biren webagdeg e unuk pedati fam het-debebag, sapi omalik etmanore siloho enobam olma sok laroho feseik lebag.

¹¹Airoho debebagdeg de e Peti Sali anyo inim, kotak bak emas on ilitdeg angge etmano mel, duk-duk ahut waldoho hilinggebag angge etmano inim, pedati anyo emberimmu lahabe febag.

¹²Airoho lahabe febag ma re wam sapi etmanore bekit o Bet-Semes fil lebag. Lauk kwit de kwe obalowag on famen dahandoho elan foma-foma mel wilibik la fug angge we bikit-bekit neg su ngig il lauk katfag. At airoho laukmu re it ap homi Filistin on enowesi raja enebe foaben etanore ombolim lebagdeg de o Bet-Semes huli-hulimu etmano aik lebag.

¹³Airoho feik lauk men de etali em de it ap homi Bet-Semes on etma re donggoma etma gandum anggen yihig balduk katfag. Ne, iren e Peti Sali anyo hebagdeg de enahayegdoho olohotma lisik lebag.

¹⁴Pedati anyore lebagdeg de hun Yosua o Bet-Semes etma on misig eke eyabukmu helep log angge anyo aluluk bok aik lebag. Airoho bok aik lebag ma re ap homi Bet-Semes on en de pedati anyo e wiroho, wam sapi biren etano mel waroho TUHAN enda ahayeg howagdoho yaldul ulug debag.

¹⁵Airoho duruk kweleg it ap Lewi on en e Peti TUHAN en Sali Wene wareg anyo inim, kotak no emas on yohwareg angge anyo inim, belabe feik watfagdeg de helep humon anyo emberimmu febag. Mundoho airoho debebag ma neg de it ap homi Bet-Semes on en de TUHAN enda ahayeg howag ulug obahet wam waroho yaleheg, amu on fahet inim waroho yaleheg, debag.

¹⁶Airoho durukmu it raja Filistin on enebe foaben etano en inil-hebagdeg de nukoho anyo salim at o Ekron watfag.

¹⁷Airoho debag ai fam de it raja Filistin enebe foaben etano en o bumbuk kwenang foaben fam hwal-enepuk katfag ma enobahet enesiag onggo baloho ulug TUHAN obahet mondotfag. Ne, kota iren hwal-enepuk katfag on de su: Asdod, Gaza, Askelon, Gat mel, Ekron mel. Ne, o bumbuk etma re ekema fak lehet wiroho kwelabeg latfag, ne eke we elehet eleg angge welatfag. O eta enebe bumbuk higitdoho re emas on en duk deg angge anyo misig heheg ne bak sipurik emas on misig heheg mondotfag. Eneg aleroho ulug de helep humon e Peti TUHAN en Sali Wene wareg anyo febag ma ai. Ne, ketia huli en inim de helep aire hun Yosua ap o Bet-Semes on ai eyabukmu etma wereg.

¹⁹Airoho feik lebag ma welatfag famen de it ap homi Bet-Semes on en e Peti TUHAN en Sali Wene wat-esebag angge anyo elma enunggul kwelap-hebag ma re, TUHAN en it enesahalimu en enebe 70 en enowatfag. Airoho enowatfag ai fam TUHAN en anggin humon nenobam feik waha ulug fong watuk kwit welatfag.

²⁰Airoho watfagdeg it ap homi Bet-Semes on en uruk kwit, “TUHAN Allah Mun Amu Eneg wereg ahun ai olohotma re ap sa hag angge en bok unduhuk welam-alereg? E Peti Sali aire nit famen il yatdoho welamag ulug de kema oko feik laul behep?” ulug ebag.

²¹Airoho uruk katfagdeg iren enele o Kiryat-Yearim mondotuk kwit de, diroho mondotfag, “Ap Filistin enap en de e Peti TUHAN en Sali Wene wareg anyo obalma nikangge feik wahausa anggere hit watlug e peti au hit henobam walug laluhup en manik,” ulug hweag-esebag.