Read Ninia Yali 1 SAMUEL 8 Bible Online

1 SAMUEL 8 - Ninia Yali bible

1 SAMUEL 8

¹At Samuel anyo ebe mundoho sobal atfagdeg de aren it Israel on fahet hakim welamag ulug de at omaliki unduhuk fesebag.

²Ne, at omaliki etan amloho wandeba on de unuk Yoel ne bireneg on de unuk Abia. It enebere o Bersyeba etma wene owag lolduk on welatfag.

³Airoho unduhuk welatfag famen de iren enakni obabut higitdoho duruk katfag fug, we iren enonggwareg dungap dauk on fahet neg heraruruk katfag. Airoho duruk kwit de iren uang enenggik apmane hweleheg, ap homi holduk on enawene katukdoho kongduk eleg angge deheg duruk katfag.

⁴Airoho duruk ale en de it ap homi Israel on enowesi neg kabog-debagdeg de hun Samuel akit o Rama kwik lebag.

⁵ Iren at hweag-utuk kwit de, “Hesanggo holin, nenakni hat de hebe mundoho sobal ahen, ne nenakni hat homaliki ohore hat hobabut higitdoho duruk eleg. Aireg ma re niroho it ap homi enunggul unuk amu on enowesi raja unduhuk wereg hagdoho nit fahet eke raja unduhuk welamag ulug in-nesamihin fano,” ulug hweag-etfag.

⁶Airoho hweag-etfag famen de at Samuel iren heng ebag on anyo fahet ahayeg bebag fugdeg ai fam aren TUHAN fam somban ebag.

⁷Somban ebag ma TUHAN en uruk kwit de, “It ap aire iren hat nenerim ehesa fug, An at nenerim ulug embesehesa. Ne, iren An raja it enobahet welamag bouk fug angge ehesa anggere, iren ehesa ale airoho enebin.

⁸An den o Mesir en og-eneplug wilibik waharihik huli en de iren An fam en ohwareroho kembu unuk dewa apne wauk katswa, ne iren An nobam duruk katswa alere ketia hat hobam duruk eta.

⁹Aireg ma re iren heng ehesa ale airoho duhun famen de at raja unduhuk fohup on ai en it enobam debeseruk karuhu ale fahet de it fik-furoho hweag-esauk kwit, enendama ebereg lamagdoho hweag-esakiyug,” ulug hweag-etfag.

¹⁰Airoho hweag-etfag ma TUHAN en ebag ale etmanore it nenowe raja nenda ulug heng ebag on etmano fam at Samuel en hweag-esauk kwit de diroho ebag,

¹¹“At henowe raja ai en de diroho henobaharuk karuhu,” ulug hweag-esebagdeg de, at samuel en dindiloho hweag-esauk kwit de, “At ai en de hit henomaliki tentara kukwag ulug omamne fam kwelab-enebeheg, it etman foma re kereta wirig angge ai fam lauk kamag ulug feseheg, it foma wam kuda fam lahalug dog yapil lauk kamag ulug debeseheg, ne foma re it eneyog fam lauk kamag ulug esan lohwale feseheg, duruk karuhu.

¹²Ne, it foma re it ap esan enebe 1.000 en lohwaleg on fahet leho on perwira welamag ulug unduhuk feseheg, ne foma re it esan 50 en lohwaleg on fahet kepala unduhuk feseheg, duruk karuhu. Ne, raja ai en de omamne fam hit henomaliki en eyabuk wutuk kamag ulug feseheg, fomane gandum anggen baleg on kabog-duruk kamag ulug feseheg, asehen wutuk kamag ulug feseheg, kereta dog yapil lauk angge wiroho fouk debeheg, duruk kamag ulug fesehu.

¹³Ne, hit henahwelanire ahalue amben fano on wutuk kamag ulug feseheg, at fahet esag-enepuk on feseheg, siburu roti weratuk kamag ulug feseheg, duhu.

¹⁴Aren de hit heneyabuk mundoho hwelauk kwit de, anggur yaho inim, zaitun yaho mun fanoma on inim, hwelalug de at autsi apma wereg lit eyabuk duruk on og-esauk karuhu.

¹⁵Hit heneyabuk inim, ne henahan anggur yaho on inim de kwenang onggo ulug de anggen yihig famen balduk on etmano en de numen on feik manik ulug de aren it ap sehen foroho on enowesi mel, at autsi apma yabuk duruk on mel og-esauk karuhu.

¹⁶Aren hit henamingming angge hwelani on et ap on et oko at obahet duruk kamag ulug debeheg, henowam[16] mun fano on etmano at hweleheg, ne henowam keledai re at eyabuk dukwag ulug weheg, duruk karuhu.

¹⁷Hit henowam kambing, domba mel en numen angge anyore aren neg hwelauk karuhu mu, hit de at amingming angge atuk kamuhup.

¹⁸Airoho duruk karuhu ulug ihi on ai li higit-aik waharuk halug de, hiren at raja unduhuk fohup on ai fahet de henenda ouk en henele siag atuk kamuhup, famen de hiren airoho uruk kamuhup on etma TUHAN en esanggo holuhu fug,” ulug hweag-esebag.

¹⁹Airoho hweag-esebag famen de it ap homi enunggul unuk ai enap anyo en de, at Samuel en hweag-esebag on anyo furebebag fug. We iren uruk kwit de, “Besein! Etma deg kweleg famen de nit de nenowe raja aire nenenda.

²⁰It ap homi enunggul unuk amu on deg higitdoho nit nenowe raja ai en nit melal-nenepuk kwit, dog yapukmu hwaloho nenobahaik laheg duruk karuhu,” ulug ebag.

²¹Airoho urukmu at Samuel en iren uruk on etmano mundoho esanggo holfagdeg de, aren TUHAN obam hweag-etfag.

²²TUHAN en onggo hweag-utuk kwit de, “It enenda behesa ale airoho duruk kwit de it fahet raja misig eke in-esakin,” ulug hweag-etfag. Airoho hweag-etfag ma at Samuel en it ap homi Israel on etmano enobam domog lowag ulug hweag-esebag.