Read Ninia Yali 1 SAMUEL 9 Bible Online

1 SAMUEL 9 - Ninia Yali bible

1 SAMUEL 9

¹Ap misig eke unggul unuk Benyamin on famen enggik wereg deg lit along-balong deg latfag ahun unuk de, Kish. At ebere hun Bekhorat ambiangma en ondoho on, enunggul unuk enggikdoho Afiah on famen ondoho on welatfag. Akni re hun Abiel Pagawak ne omba re hun Zeror ai.

²Hun Kish aire amloho ap angge eke welatfag on unuk de Saul, ne at ebere mun ape songdeg eleg angge il aluli buhundeg latfag. It ap homi Israel on welatfag ma etman at Saul hag on nenggambik on eke welatfag fug. Ne, owag hweisere it ap homi Israel on foma enowag we at um fam huli deg kweleg de at neg de mun yit-yatdeg lit leho benggeleg deg latfag.

³Nukoho misig salim de hun Kish anyo en owam keledai hwe on foma longgo ebag. Airoho longgo ebag ma re at Kish en Saul hweag-utuk kwit de, “Hamingming angge misig hondog halug de keledai longgo ehesa on eta herarik lakin,” ulug hweag-etfag.

⁴Airoho hweag-etfag ma, at Saul inim amingming angge anyo inim de o Efraim en dom kwe mel, o Salisa kwe mel, etma lahaik-wambuk, wilip-am kuk herarik lebag, famen de wam etmano hweag-enepfag fug. Airoho deg latfag ma iren o Sahalim kwe mel herarik lebag, famen de keledai omano etma oho welatfag fug. Aireg latfag ma etmano en wilayah Benyamin on kwe mel herarik lebag famen de hweahauk fug ale neg deg latfag.

⁵Aireg latfag ma it etano o Suf aik lebagdeg de at Saul en amingming angge anyo hweag-utuk kwit, “Nayon en wam etma fahet de enda seramdoho ebetuk kwit, nit fahet mun enda firoho ebet-nenepuk kam nore nenobam lakohon,” ulug hweag-etfag.

⁶Airoho hweag-etfag ma at amingming angge anyo en uruk kwit de, “Bok-bok! o kota su fam de ap Allah amingming angge misig eke wereg ma, aren uruk on de mundoho dip-uruk mu ap homi at leho foruk anggere, aren wam keledai etmano fahet deta wereg ulug hweag-nesamisi ane, nit akit lakohon,” ulug hweag-etfag.

⁷Airoho hweag-etfag ma at Saul en uruk kwit, “Nit hun Allah amingming angge ai akit laul halug, niren nunggwangge og-umul? Niren siburu kwemangge nauk on fouk duruhuk on etano mundoho eleg-atsi mu, amu angge oho wereg fug oma re?” ulug hweag-etfag.

⁸Airoho hweag-etfag ma at amingming angge anyo en uruk kwit, “Eleg famen de an den uang perak on misig neg eke weregman, anggere wam keledai etma deta wereg ulug hweag-nesowag dohore an den ap Allah amingming angge ai onggo og-itmin,” ulug ebag.

⁹Airoho ebag ma at Saul en onggo uruk kwit de, “Fano anggere, nit lakohon ma,” ulug hweag-etfag. Airoho hweag-etfag ma iren o kota ap Allah amingming angge anyo wereg ma akit lebag. Ne, it lebagdeg o kota ai laukmu etma lahaul ulug hebema laharuk men de hwelani duhum on enebe nunggwe en hagdoho ik bohwe elma hwenanggul ulug duruk katfag. Airoho duruk katfag ma iren hwelani etano hein og-esauk kwit, “Ap hein og angge o kota su wereg a?” ulug hein og-esebag. (Airoho ebag aire etali em ap Allah ele hweag-esauk on fahet de hein og angge uruk katfag ma, aireg ma ap misig eke en wene misig atuk ale fahet Allah hein og-haroholit halug de aren diroho uruk katfag, “Nit hun hein og angge anyo akit lakohon,” ulug uruk katfag.)

¹²Airoho hein og-esebag ma it hwelani etano en uruk kwit de, “Yu, wereg,” ebag. “We horog ketia hit henalukwema eiya atam laha. Ne, hit folo-folo hagdoho walepman de at mug-ha walep. At o kota suma ap homi enobahet dukmu etma mezbah fam wam waroho yalusa en de at we ketia waha. Ne, it ap homi airoho durukmu enesa wamag ulug enayonggo fehesa on de, at ebe owan wam fug mu it atam nakohoreg fug, aren atam wam wareg etma fanoap debemisimu neg de nakohoreg. Anggere hit ketia eya laluhup halug de, at naroho duk fam etma lahauk elegma ambi amluhup lit deg,” ulug hweag-esebag.

¹⁴Airoho hweag-esebag ma at Saul inim at amingming angge inim o kota etmano lebag. Lebagdeg it o kota sokolma etano kwik lauk men de at Samuel dukmu wam waroho TUHAN obahet durukmu etmano lahamin ulug wilibik watfag hag, sal-kwal ebag.

¹⁵Ai ebe owan am fug mu sono hag aruhu ulug wereg lit de, TUHAN en Samuel fam de diroho hweag-etfag, “Sono hubet de o orohole dia hag deg li,

¹⁶An den ap unggul unuk Benyamin on eke hat hinim ambi amag ulug mingming duhukmu waruhu. Anggere ap ai An nomaliki Israel on fahet raja unduhuk welamag dohore unggulmu ahalue hilili folug unduhuk feiyug. At ai en de An nomaliki Israel on ap homi Filistin on enenggikmen del-enebuhu. It ap homi Israel on ai en anggin-fanggin hauk ale inim, iren let-nenebin ulug hweag-nutuk ale inim mundoho holdihik,” ulug hweag-etfag.

¹⁷Airoho hweag-etfag ma weregman, at Samuel en Saul hebagdeg duruk men TUHAN en hweag-utuk kwit, “An den ap abug hweag-hitihik on anyo ebere su, aren An nomaliki melal-enepuk karuhu,” ulug hweag-etfag.

¹⁸Etano atuk kweleg at Saul anyo Samuel akit o fak lehet oho on sokolma etano ambi atfagdeg hein og-hauk kwit, “Yehei nakni, ap hein og angge ai obam de kema wereg?” ulug hein og-hebag.

¹⁹Airoho hein og-hebag ma at Samuel en onggo hweag-utuk kwit, “Hein og angge nebe an. Yohore hat hebe an ninim naul anggere hat dam dukmu wam waroho yaldukmu etma lahaik lauk kamin. Sono hubet halug neg de haren hein og neahun on etma onggo hweag-huruhukmu neg hobam lahun.

²⁰Ne, hat howam keledai nukoho henahan hunduko longgo isi on eta fahet de mundoho hweahausa anggere henda firuk fug. Ai neg de fug famen ap homi Israel on weregman mun along angge anyo ohore hat inim, ne hat hakni[17] ahain elekwe on inim og-hesahup,” ulug hweag-etfag.

²¹Airoho hweag-etfag ma at Saul en onggo uruk kwit de, “An sure nunggul unuk Benyamin on, it Israel fam enunggul unuk wereg on etmano en de nit de nenunggul unuk dotdeg on, ne an nahain elekwe on ohore nit nenunggul unuk ai famen de mun hwaleg eleg on. Aireg ma re nunggwelug nakni haren an nobam airoho hweag-nutuk kahen?” ulug hweag-etfag.

²²Airoho hweag-etfagdeg at Samuel at Saul inim amingming angge anyo inim de o ilonggo ele healeg on fam og-eneplug kwebagdeg, ap homi kabog-dik wamag ulug enayonggo febag on etmano enebe seberoho 30 en hagdoho hwerieg wereg kweleg it enolohotma obale mun lehoma anyo at hwerie febag.

²³Airoho hwerie febagdeg de at Samuel en soni esetuk on anyo hweag-utuk kwit, “Wam lenggareg fahe an den hobam hobale fehi on anyo osoko ologdoho feik manu,” ulug hweag-etfag.

²⁴Airoho hweag-etfag ma at soni esetuk on anyo en mun eneg on aho fam en neg webagdeg de at Saul apma etano osoko ologdoho feik watfag. Feik watfag ma at Samuel[18] en uruk kwit, “Sure an den hat hobahet it ap bohon amu on[19] oma inim ambine nowag ulug eneko fehi on, anggere, nakin,” ulug hweag-etfag. Airoho hweag-etfag ma at Saul anyo nebag. Aireg ma nukoho anyo salim neg at Saul de Samuel inim nebag.

²⁵Anyo mundoho nebagdeg de wam waroho yaldukmu anyo en wambik watfagdeg o kota kwik watfagdeg de at Saul anyo o dummu ambolma[20] hagdoho wirigmu nohoukwag[21] doho ulug og-etfag,

²⁶og-etfag ma nohobagdeg[22] inatfag. O hil yingguruk kweleg at Saul o dumu welatfag on at Samuel en wol-hebagdeg hweag-utuk kwit, “Inamin, an den hondoko hobahaik larohon,” ulug hweag-etfag ma, at Saul anyo inatfag ma Samuel inim seberoho lebag.

²⁷Lebagdeg it enebe o kota elan fil etma aik lebagdeg, at Samuel en Saul hweag-utuk kwit, “Hat hamingming angge aire at dam lauk kamagdoho mingming din,” ulug hweag-etfag. Hweag-etfag ma at amingming angge anyo lebag, lauk kweleg at Samuel en eke uruk kwit, “An wene Allah en eheik ale hweag-hitmin anggere dia il misig lohon bok-amuldeg,” ulug hweag-etfag.