Read Nocte Naga Mathiu 1 Bible Online

Mathiu 1 - Nocte Naga bible

Mathiu 1

¹Arepa Abraham Chha, ngale Devit Chha, Jisu Krista te awa heh nginkong.

²Abraham tôpumma Devit Lowang tôko, te awa heh areheh dângwah: Abraham, Isak, Jakob, Juda ngale ate pho anaa heh; erediko paraz ngale Zera (thin nyongpa Tama dângwah), Haran, Ram, Aminadab, Nason, Salmon, Boz (ate nyong pa Rahab dângwah), Obad (ate nyong pa Rut dângwah), Jisi, ngale Devit Lowang.

⁶Devit Lowang tôpumma chenthu Isrial mihnyan heh Babilon nâng chêmsiet rãng sietkattah tôko te awa heh areheh dângwah: Devit, Solomon (ate nyong pa Uria tangnyu dangtah dihiaknyu pa dângwah), Rihobom, Abija, Asa, Jihosapat, Jihoram, Uzia, Jotham, Ahas, Hizikia, Manisa, Amon, Josia ngale Jihochin ngale ate pho anaa heh.

¹²Babilon nâng chêmsiet rãng sietkattah tôpumma Jisu Chhat sanpoat tôko te awa heh areheh dangwah: Jihochin, Saltial, Zirubabal, Abuid, Iliakim, Ajor, Jadok, Achim, Iluid, Iliajar, Mathan, Jakob, ngale Josep, Josep pa Misaia ngama rooeka Jisu nyong Mariam keptepa.

¹⁷Abraham tôpumma Devit tôko echhi roanbelii, Devit tôpumma Babilon nâng chêmsiet rãng sietkattah tôko echhi roanbelii, Babilon nâng chêmsiet rãng sietkattah tôpumma Krista tôko echhi roanbelii dângwah.

¹⁸Jisu Krista chhat pa aroh dângwah. Ate nyong Mariam pa Josep demnâng kepmînrâng ngama kahkhetmîn wah, rohkomin atenii roamsông mako Mariam ma Asâthôanju wah naawun lahma dângwah.

¹⁹Mariam tangwa Josep pa toangtang mihnyan dâng phumma, Mariam nok atang mako rêsê chohthuk lehunma; atema ahuh chhama chiakpherãng themawa wah.

²⁰Josep ma aroh themawa poatko, Teso ngintatte kalahma Josep nâng metmãngnâng ngatkatwah, “Josep Devit chha, Mariam pa nang tangnyurãng keprãng nekchei. Chenrãngma ngako atema wun eka naapa Asâthôanju chaanma wun eka.

²¹Atema delachha echha a, ngale nangma ate mînpa Jisu ngama mînmin - Chenrãngma ngako atema ate mihnyan heh papwah pepângmin.”

²²Joban ma Mõng hehnâng jabthuktah nginpa toangtang dângkatrãng arepa dangeka,

²³“Janchhôsâ ma naawun lahma delachha ehongchha a, ate mînpa Imanual ngama mînmin” (Are ngaeka pa, “Joban pa nãngdemnâng ngaeka”).

²⁴Josep jupwah satlahma, Teso ngintatte ma chenroh chientah a ererãngrãng, atema Mariam ate tangnyu rãng kepwah.

²⁵Rohkomin Mariam ma atechaa delachha pa chhatmako Josep ma Mariam nâng ate tangnyu rãngrãng keplahma roamjup ho. Ngale Josep ma Jisu ngama mînwah.