Read Nocte Naga Mathiu 10 Bible Online

Mathiu 10 - Nocte Naga bible

Mathiu 10

¹Jisu ma ate dijunte echhi wanii pa roamroo lahma, thinnâng juchhih junloat rãng, jatrup khoanchet, ngale khun atam heh sênsietrãng chaan kohwah.

²Echhi wanii Jisu moattat chhoante mînpa areheh dângwah: Khebâng pa Simon (Atenâng piter ngamemin ngaeka) ate pho Andru; Jems ngale ate pho Jon Zibidi chha;

³Filip ngale Batholomi; Thomas le thãkho hâte Mathiu; Alfais chha Jems, ngale Thadi:

⁴Diakrãng latte Simon, ngale Jisu chênsângte Juda.

⁵Are echhi wanii mihnyan heh Jisu ma rîn akhah lahma chienchhoan wah: Atema ngatwah, “Jews ledangte diak hendiak nângmin nekchhoan en ngale Samaritan hah nângmin nekchhoan en.

⁶Ere noma Isrial humkâ wah mahsamte saak heh tânâng chhoan en.

⁷Chhoan letma thôchhoankoh en, ‘Rangkhethung Hahsông pa lânam katha!’

⁸Khun atamte heh mesiet, ritte heh ngakhinsiet, angêm khoanchette heh sensiet, juchhih heh junlo re en, nema thãhoma chohkenpa thãhoma koh en.

⁹Ne tõng akhak nâng ngun akem ngale lihân sêmmak nek hèn chhoan en;

¹⁰Ne lemkhôam korãng tõng akhak, khet akhu bâm, dapheng ngale menthun min nekkep en, chenrãngma ngako, moatlem moatte hehnâng thinma chenni lemeka erepa kohmin.

¹¹“Chenthu mihnok mihhah hehnâng mehû tetko, henma ne tãngroo ehèn a, erepa lemsû en, ngale erehah kowah mangak ngakchhoan ate demnâng tongen.

¹²Chenthu ne humkhen nâng menyup wãng tetko, ‘nenâng Joban ma rang ekohhèn ngama rânjab en.’

¹³Ere hum kowah mihnyan hehma metãngroo hènko, nema thinrãng rangsoam kotet pa thinkhoh nâng chentonga; rohkomin thinma letangroo medang hènko, nema rangsoam kotet heh ngakkep re en.

¹⁴Ngale chenre humkâ ba hahdaang ma ne letangroo, erediko ne ngin lekep medang hènko, erethe kowah loatchhoan ko neda wah bum kheb eka pemin finekthien en.

¹⁵Ngama nenâng linlin thôkoh eka, Joban ma metloat rangwo jâko erehah kowah mihnyan hehnâng mînchen noma Sodom ngale Gomora wah mihnyan hehnâng ba ajah emînchèn a!

¹⁶“Tat en! Ngama nekhu soan chhangnâng saak rãngrãng chienchhoan eka. Erohwah, pû rãngrãng nyahhîn dangen, ngale phâriwo rãngrãng mihnum dangen.

¹⁷Jetletma dangen, chenrãngma ngako, nea khhek lahma metloat thinnâng siethok rãng mihnyan heh tonga, ngale Sanagog nâng siethû lahma ewat hèn.

¹⁸Diak pênte ngale lowang heh, erediko Jews ledangte hehnâng ngawah Nginkongsen pa jienthôkoh rãng thin tânâng met elohû hèn.

¹⁹Chenthu thinma metloat ko, chenroh dânthâng min a, ngale chenli dânthâng min a ngama neksekmah en; nema dânthâng thinpa ere sanpoatko Joban ma ethôkoh hèn.

²⁰Chenrãngma ngako nema loatjabmin jabkhab pa newah ledangmin; ere jabkhab heh ne Wa Joban Ju ngewah kalahma nema ehongjab en.

²¹“Phoma naapa eritphethuk a, ngale wama chha hehmin eroh eritphethuk a; chha hehmemin thin nyong awa lelatnâng dãnglahma eritphe thuk a.

²²Anga ngama ngajunma nenâng emitchek hèn. Rohkomin henhen pa athôan kotuk dâlemsen lektong eka ere hehba khope min.

²³Chenthu thinma hahdaang wantheko mechêmsiet hènko, hahdaang ahan wantheko danchhoan en. Ngama linlin thôkoh eka, Mihnyan Chha ngakkat mako Isrial hahdaang kowah nemoatlem pa chenthumin leta thôanmin.

²⁴“Ahete henmin ate hethôte noma adong dangmah; ngale haa henmin ate tângtewa noma adong dangmah.

²⁵Erohwah ahete pa hethôte rãngrãng dângko rinmemin, ngale haapa ate tângtewa rãngrãng dângko rinmemin. Humkâ kowah khhepho thôanko Bilzibul ngama menga ako, humkhen kowah ahan mihnyan heh nângjã chentô chhih ngatmin a!”

²⁶“Erohwah mihnyan ran nekchei en. Athângheh chentô huhthien eka heh phangtang laangjâ rêmin, ngale athângheh chentô riem eka ereheh loatjâ rêmin.

²⁷Ngama rangnyek nâng chenni thôkoh eka, arepa nema rangwo nâng thengak thôngthô kohmin, ngale nema chenni huhtat eken a, arepa humkho nâng kowãng letma rakthômin.

²⁸Phoang ritphete ran nekchei en, thinma ju taritphe mah; Ere noma phoang ngale ju wanniinii pap wendô nâng rokthhek lahma târitphete Joban ran chei en.

²⁹Nema ngunpha phathe pumma wasaangsut wochha wannii tarii en, rohkomin ne Wa Joban ma lejet thangma wochha wanthemin hahko mahjâ riimah.

³⁰Nekho wah khochoo heh tumin phangtang weih lahma thieneka.

³¹Erohwah nekchei en; nea jahmõang wochha nomemin thãchaan!

³²“Henma komin nok atang mathahko atea ngarãng ngama meloatjab ako, ngamemin rangkhethung wah tôngte nga Wa mathahko erohjô eloatjab ang.

³³Phumma henma komin nok atang mathahko nga medak hangko, ngamemin rangkhethung wah tôngte nga Wa mathahko atemin erohjô edak ang”.

³⁴“Are hahtokkhoh ko ngama mêmo kohrãng kaerâng ngama nekthonghun en. Ngama mêmo kohrãng kat dangmek, dãng loamrãng kaerâng.

³⁵Nga kaerâng pa delachha pa ate wa lelatnâng dang, erediko dihiakchha pa ate nyong lelatnâng dang, ngale nem pa ate nyipanyu lelatnâng dangthuk rerãng kaerâng;

³⁶Mihnyan rãngma ranchhih thôanpa ate humkâ wah mihnyan pa dângmin.”

³⁷“Henhen ma ate nyong awa nâng nganoma ajah huneka arepa ngadijunte tadangmah; ngale henhenma ate chha dela ba dihiak nâng nganoma ajah huneka arepa ngadijunte tadangmah.

³⁸Henhen ma ate bãngphak pa lepe thangma nga damãnko toanlahma ngadijun ehanga, arepa ngadijunte tadangmah.

³⁹Henhen ma ate roandông rãng lololem eka, arepa mahto nâng edanga. Rohkomin henhenma ate roandông pa ngarãng koheka, erehehma khope echoh a”

⁴⁰“Henma komin ne metãngroo hènko, erepa nganâng tãngroo ehang; ngale henma nga tãngroo ehanga, arepa nga chienkatte pa tãngroo eka.

⁴¹Henma komin mõngnâng atea mõng dângjunko asenma tãngroo eka, atema mõngthã echoh a. Ngale henma komin mihnyan senpa, atea mihnyansen dângthã asenma chohtãngroo eka, erepumma mihnyan senthã chohmin.

⁴²Erediko henma komin, ngadijunte dângthã, ngadijunte hehwah arinthôan wathe nâng jokih koapthe mejokthuk ako, ere thãpa atema metkep chohmin.”