Read Nocte Naga Mathiu 11 Bible Online

Mathiu 11 - Nocte Naga bible

Mathiu 11

¹Chenthu Jisu ma ate dijunte echhi wanii nâng rîn akhah diko, atea erethe kowah loatchhoan lahma, ere kêanâ wah hahdaang hehnâng Joban ngin hethô rãng chhoanwah.

²Chenthu Jon Baptisma phâtek khenma Krista ma moeka moatlem heh chohtat diko, atema ate dijunte heh Jisu tânâng chienkat wah.

³Thinma Jisu nâng chhienwah, “Ninâng thôkohhi, nanga Jon ma wathe hôngmin ngama ngatah pa dangole, roh akole nima ahan ngiakmin a?”

⁴Jisu ma dânthâng wah, “Ngakwãng letma nema chenni tat eken a, ngale chenni khe eken a, ereheh Jon nâng thôwãngkoh en:

⁵Mitdoak ma jienkhe eka, dakò heh jienkhoam, angêm khoanchet ma chêmte heh sen rewak eka nâba hehma tat, ritte heh ngakhinsiet, ngale Joban nginkongsen pa tangchhih naadi hehma chohtat reka.

⁶Nganâng henma letûngmaang thangma dâlem ehanga, erehehma rangkepmin!”

⁷Chenthu Jon dijunte heh ngakchhoan ko, Jisu ma Jon junma mihnyan hehnâng thôkoh wah: “Chenthu ne sehah nâng Jon tânâng chhoantet ko, nema chenni echohkhe e ngama thonghuntet a? wun heh pôngma juhmet lahma chohkhe e ngama thonghuntet a?

⁸Chenni chohkhe rãng chhoantet a? Khet akhusen kepte mihnyan echohkhe e ngama thonghuntet a? Khet akhusen kepte mihnyan heh Lowang heh humnângba songeka!

⁹Thôkohha, nema chenni chohkherãng chhoantet a? Mõng chohkherãng chhoantet a? Mõng chohkherãng tadangthem a, rohkomin nema mõng noma ajahthem adong chohhkhe eken.

¹⁰Chenrãngma ngako Joban nyapraangma ngatah pa Jon rãngma ngatwah: ‘Joban ma ngatwah, ngama nginmatte nang mako nangrãng lemlaang kohrãng echienkat ang.’

¹¹Ngama nenâng nginlinlin thôkoh eka, Jon baptis noma adong mihnyan nyuchha mahongchha eka. Rohkomin henpa rangkhethung wah hahsôngko arinthôan dangeka arepa Jon noma dong.

¹²Jon baptisma Joban nginthô sanpoat thuwah, athâng sanpoat tôkotuk rangkhethung Hahsông pa patrit chêmchoh dangeka, ngale arepa mihnyan chhih hehma chaanma nyenkep hunwak eka.

¹³Jon baptis sanpoat tôko, chentô mõng hehma Mosa Niem ngale Joban Hahsông ngin heh thôwah;

¹⁴Ngale, Jon pa, Ilija katmin ngama thôtah pa kaera ngama thinma thôeka ko nema mepute enko.

¹⁵Eroh medang ako, nenâng nâ metong hènko tet en!

¹⁶“Ngama arethâng sanpoat wah mihnyan heh chenni nâng thakthô anga? Thin a bôjat nâng phôang tôngte leta lechhih khuthema khuthe nâng chohrak mînte rãngrãng,

¹⁷‘Nima nerãngma nemnyansiet pupe metkoh eka, rohkomin ne boangmet! nima mangrûsê sekoh eka, rohkomin nea sepmet!’

¹⁸Jon baptisma chenjô lejok lechhah thangma dângko, anga ngama, ‘Atenâng joak lup eka ngama ngatwah!’

¹⁹Phumma chenthu Mihnyan Chhama jokphhek chhahko, anga ngama Atenâng, ‘Are mihnyan ko sûtan en! rem awak ngale jokphhek chhahte, thãkho thate ngale papi mihnyan heh lemruchha, ngama ngaeken!’ Joban wah buthi mongthem pa moatlem pumma ekhesok wênra.”

²⁰Jisu ma ajahthem patritli moatlem motah hahdaang hehwah mihnyan heh thin papwah hung lengaklit dâng phumma, Jisu ma ere hahdaang hehnâng ritngat wah.

²¹“Korajin, nangrãngma chentô cheili dângmin a! Batsida, nangrãng memin chentô cheili dângmin a! Ne tânâng patritli moatlem motek pa Tair ngale Sidon nâng moat ngako, thinma papwah hunglittih ngama jetthukrãng, enângwah mihnyan heh chenthu thuma bosta khetpakep ngale bumma thinkhoko phuhrii chenre waktah!!

²²Ngama nginlinlin thôkoh eka, metloatjâ rangwo ko nenoma Tair ngale Sidon wah mihnyan hehnâng Joban ma ate mînchen pa ajah ekhesok a!

²³Ngale Kaparnam! nangmin rangkhethung nâng lanleproh choangrit huntoh a? nanga pap wendô ko ejâsietkat e! nang tânâng patritli moatlem motek heh Sodom nâng moat ngako, erepa athângheh min asenthu chenlek tongtah!

²⁴Ngama nginlinlin thôkoh eka, metloatjâ rangwo ko nang noma Sodam wah mihnyan hehnâng Joban ma ate mînchen pa ajah ekhesok a!”

²⁵Ere sanpoatko Jisu ma ngatwah, “Ewa, nanga rangkhethung ngale hahtokkhoh Teso! ngama nangnâng dangkoh a ngaeki, chenrãngma ngako, jet ajien hehnâng lekhesok thangma huhriem lohma nokba hehnâng khesok eko.

²⁶Ewa, are pa nangma aroh chendanga ngama hun lohma dangthuk eko.

²⁷“Ewa ma nganâng chentôpa lâkoh thang. Chhapa henmemin jetmah, Wa maloloba jeteka, ngale Wa min henmejô jetmah, Chha maloloba jeteka, ngale henhen nâng Chhama khesok rãng ren eka erehehnâng ekhesok a.”

²⁸“Henhen hênlih henletma boanrii eken a, ngatânâng wãngrên, ngama boanjek tongthuk a.

²⁹Nga ngewah kengpa kepletma ne chhoakhoko pe en, ngale nga ngewah heha; chenrãngma ngako, nga Jupa numnene ngale noapnene.

³⁰Chen-rãngma ngako ngama koheka apethin kengpa aperãng ala, ngale ngama nenâng hènthuk eka hênpa hênchã.”