Read Nocte Naga Mathiu 12 Bible Online

Mathiu 12 - Nocte Naga bible

Mathiu 12

¹Ere sanpoat kowah chentô letaangko, Jisu Pientông jâko chhah thongma dânkhoam wah. Ate dijunte heh rêmrii lahma chhahri kowah punphhek wah.

²Farasi hehma erepa lepkhe lahma, thinma Jisu nâng ngatwah, “Sûtan, nang dijunte hehma, Pientông jâko lemoli pa moeka, arepa nãngniem junko dangmah!”

³Jisu ma dânthâng wah, “Devit ngale ate mihnyan heh rêmrit poatko Devit ma chenni retah a erepa nema mathat weihne?

⁴Joban humnâng wãng lahma, ate ngale ate mihnyan hehma Joban nâng kohtah Joban phhekchhah pa tôanchhah wah, phumma erepa Niem junko soam aroak tema loloba tâphhek chhahthin dângwah.

⁵Roh akole nema Mosa Niem nâng chohweih hone, Pientông rangwo roakweih rangsoamhum wah soam aroakte hehma Pientông rangwo Niem tahwak pa, rohkomin thin a themah?

⁶Ngama nenâng thôkoh eka, rangsoamhum noma dong ako tonga.

⁷Joban nyapraangma ngaeka, ‘ngama ngem angah ma soamroak hunmek, mînchen ba hunkãng.’ Arepa nema linlin jetno meko, lethe mihnyan hehnâng nema lesekham minwah;

⁸Chenrãngma ngako Mihnyan Chhapa Pientông rangwo rãng memin Teso.”

⁹Jisu erethe kowah loatchhoan lahma Sanagog nâng wângwah,

¹⁰Enâng wathe dekkò mihnyan dângwah. Ngale eko mihnyan khuthema Jisu nâng athe lolahma sekhâmhun dângwah, ephumma thinma Jisu nâng chhienwah, “Pientông jâko nãng Niem junko khoanchette tamesiet ele?”

¹¹Jisu ma dânthâng wah, “Nekhuwah wathema saak lâpemtet, phumma arepa Pientông jâko jonglunâng mejârii ako, chenni rêmin a? atema erepa letoan sietka minne?

¹²Mihnyan nyuchha pa saak noma bâmbâm adong! Erohwah nãng Niem junkomin Pientông jâko mihnyan nyuchha nâng chohsok rãng tãngmahhi.”

¹³Erediko Jisu ma dekkò wako ngatwah, “nang dekpa chen o” Atema dekpa chênwah, ephumma dekpa deksente heh rãngrãng ngaksênwah.

¹⁴Ere diphumma Farasi heh chhoan lahma Jisu ritphe rãng themawa wakwah.

¹⁵Jisu ma ate khûm apânrãng themawa pa tatlahma, ate erethe kowah loatchhoan wah; ngale mihnyan heh jahmõang ate dijun wakwah. Ngale chentô khun atamte hehmin atema mesietwah.

¹⁶Ngale atema ngajunma nekphoangthô en ngama ngatwah.

¹⁷Atema are moeka pa Mõng Isaia ma Joban ngin jabtah pa toangtang dângwãng rãngma moatwah:

¹⁸“ngama rentek ngahaa pa ana, ngama Atenâng hun ekang, ngale ate demnâng nga rinme ekang. Ngama nga Ju ate seknâng echienkat ang, Ngale chentô diak akanko ngama metloat Nginpa atema ephoang thôkoh a.

¹⁹Atea lephoang chhiakmînmin, ngale lephoang rak akakmin, erediko noknyu lemdong hehnângmin henmejô ate jab letatmin.

²⁰Atea boan anaa heh demnâng min noapnene, ngale wentitdô rãngrãng dôeka wenpa lemut thukmin. Toangtang pumma mata tajien atema letôanmin,

²¹Ngale Atenâng chentô mihnyan nyuchha ma edâlem a.”

²²Erediko mihnyan khuthema Jisu tânâng juchhih luplahma mitdoak ngale lejienjab mihnyan siethok wah. Jisu ma ere mihnyan pa sênsietwah, erediko atema jienjab wah ngale jienkhe wah.

²³Jisu ma ere moatpa khelahma, mihnyan heh bârit rewah. Thinma chhienwah, “Atea Devit chha danga?”

²⁴Farasi hehma erepa tatlahma, thinma dânthâng wah, “Atema juchhih junlo ekapa thin pênte bilzibul ma Atenâng chaankoh lahma junlo eka.”

²⁵Thin hungwah thonghun ekapa Jisu ma jetlo lahma thinnâng ngatwah, “Hendiak komin thindede tungko phanmîn lahma, thindede memênmîn ako, ere diakpa leta rongmin. Ngale hen hahdaang komin, ba, hen humkâ komin thin tungko phanmîn lahma, thindede memênmîn ako, arepa aphanjâ erea.

²⁶Erohwah, joak hahsông komin khuthema khuthe demko memênmîn ako, thin a mâmâ khukhu dangeka, ngale sitsiak ephanjâa!

²⁷Nema ngaeken, bilzibul ma nganâng chaankoh lahma ngama juchhih junlo ekang, eroh medang ako, ne dijunte hehnâng henma ereheh junloat chaankoh eka? Ne dijunte hehma moeka moatlem junko ne athe ngama jetloeka!

²⁸Dangmah, arepa bilzibul ma kohdangmah, Joban Juma nganâng juchhih heh junloat rãng chaankoh ehang, erejunko Joban Hahsông pa nekhu khohnâng râkatha ngama khesok eka.

²⁹“Henmemin lochaanwa humpa chhihsiet lahma ate sêmmak heh tatoan chhoanmah; khebengko lochaan wapa khhekmêng lahmaba ate humpa tâlôngmin.”

³⁰“Hen komin ngarãng ledangte pa, alinlin nga lelatnâng dângte; ngale henma nganâng khôansietko lechohsûte a, erepa alinlin aphânsiette.

³¹Ngale erohwah ngama nenâng thôkoh eka: mihnyan nâng chenni pap komin ngale jabchhih jabkhah mejab akomin map tâkohmin; rohkomin henhenma Asâthôanju lelatnâng chhihjab eka erehehnâng chenthumin map lekohmin.

³²Henma komin Mihnyan Chharãng mechhihjab ako map tâkohmin; rohkomin henma Asâthôanju lelatnâng chhihjab eka erehehnâng map lekohmin, athângheh min, ngale roantang roanjêng komin lekohmin.

³³“Bãngpa bãngsen medang ako, rimin risen eria; nenâng bãngchhih metong hènko, rimin richhih echoh en. Bãngpa ateri junko ejet e.

³⁴Pûchha heh - ne achhih dangletma jabsen chenroh ejien hongjab en a? chenrãngma ngako hungnâng mênchong danglahma ba thunma hongjab eka.

³⁵Mihnyan senma ate hungnâng asentong lahma jabkhabsen hongjabwên era; ngale mihnyan chhih ma ate hungnâng achhih tonglahma jabkhab chhih hôngjabwên era.

³⁶“Ngama nenâng thôkoh eka, metloatjâ rãngwoko chentô mihnyan ma atema chentô jabkhab chhih jabtah a ereheh eloat sietkoh a.

³⁷Ne jabkhab heh nenâng metloatrãng kepmin, ne asenba achhih pa ne jabkhab pumma eloatsiet a.”

³⁸Erediko Niemarang jette ngale Farasi khuthema hongjab lahma ngatwah, “Hethôte”, “nangma patritli moatlem molohma ninâng khesok hi ngama huneki.”

³⁹Jisu patrii lahma dânthâng wah, “Areroan wah mihnyan heh chentô chhih a, ngale Joban min jetwak mah!” “nganâng patritli moatlem khesokrãng chien eha? khesokmah! Mõng Jona patritli petah pa loloba nerãng patritli moatlem dângmin.

⁴⁰Chenroh Mõng Jona ngahdong wokkhen nâng ngihrem penrem tongtah a, ererãngrãng jôba, Mihnyan Chha pemin ngihrem penrem hahken khennâng etonga.

⁴¹Metloat rangwo jâko, Ninivi wah mihnyan heh ne mathahko toanchep lahma nenâng achhih engahèn, chenrãngma ngako Jona ma Joban nginthô tatlahma thinpap wah hungngaklit wah; ngale ngama nenâng thôkoh eka, Jona noma ajahthem adongpa thejâ ako tonga!

⁴²Khope renjâ rangwo ko, sannyup wah Siba wangcha memin toanchep lahma achhih engahèn, chenrãngma ngako, ate diak hahtaang wah Solomon lowang buthi mongthem senpa herãng hokwah; phumma ngama nenâng thôkoh eka, Solomon nomemin ajahthem adongpa thejâ ako tonga!

⁴³“Chenthu juchhih pa mihnyan wah meloatchhoan tahko, hahran khojêng jêngnâng phoangchhoan lahma ate boantông rãng the rânglem chhoan a. Phumma the lechoh medang ako,

⁴⁴atedede rângngariia, ‘chenre ngahum kowah loatchhoantek a, ere kojô ngakwang ang’ ephumma chenthu ere humko ngakhokko, humpa sekho, sâpoangpoang ngale tiamtete etongla a.

⁴⁵Erediko ate ngakchhoan lahma ate noma ajahthem juchhih ahan wanengit lêsiet lahma ere humko ngaksong hûeka. Ere diphumma, ere mihnyan pa khebâng wah noma ajahthem achhih dangeka. Eroh jôba arerôan wah mihnyan chhih hehnângmin dângmin.”

⁴⁶Jisu mihnyan heh demnâng jabmîn thuko, ate nyong ngale atenaa heh hokwah. Thin a thakhoko cheplahma Jisu demnâng jabmîn hunwakwah.

⁴⁷Ephum-ma erekowah mihnyan wathema Jisu nâng ngatwah, “Sûtan, nang nyong ngale nangnaa heh thakhoko chepwak eka, ngale nang demnâng jabmîn hunwak eho.”

⁴⁸Jisu ma dânthâng wah, “Nga nyong pa hen a? ngale nganaa heh hen a?”

⁴⁹Erediko ate dijunte hehnâng thhetkat lahma Jisu ma ngatwah, “Sûtan en! nga nyong ngale nganaa heh anã heh!

⁵⁰Hen-henma rangkhethung wah nga Wa Joban ma huneka ere moatlem heh moeka ere hehba nga pho, nga nya, ngale nga nyong.”