Read Nocte Naga Mathiu 14 Bible Online

Mathiu 14 - Nocte Naga bible

Mathiu 14

¹Ere sanpoatko Galili pênte Hirot ma Jisu ngin chohtat wah.

²Atema ate khenwah sahhabdong hehnâng thôkoh wah, “Atea linlin Jon Baptis, ngakhîn reka,” “Erohwah Atenâng are patritli moatlem moatrãng chaantong eka.”

³Chenrãngma ngako, Hirot ma Jon loatkhhek rãng chienwah, phumma janruma khhek lahma phâtek nâng sekwah. Atema arepa atenaa Filip tangnyu Hirodik ma ngatjunko moatwah.

⁴Chenrãngma ngako, khema nâng Jon baptisma Hirot nâng, “nangma Hirodik pa nang tangnyu rãng kepniem aho ngama ngatwah!”

⁵Hirot ma Jon baptis ritphe hunwah, rohkomin Jews mihnyan heh ranchei rewah, chenrãngma ngako, thinma Jon pa mõng ngama ngatwah.

⁶Hirot chhatjâ rangwo ko Hirodik chha dihiaknya pa nok atang mako bôangwah. Erepa khelahma Hirot nyahrãng hungsên wah

⁷Hirot ma dihiaknya ko toamsem jabkhab jablahma ngatwah, “ngama toamsem ekang nangma chenni tha ehanga erepa ngama ekoh e!”

⁸Ate nyongma thôkoh junko dihiaknya pumma Hirot ngewah thâwah. “Nganâng athângheh aretheko Jon baptis khophang pa wankhoang nâng kohhu hang!”

⁹Lowang pa nyahrãng hungchhih wah, rohkomin, atema rootah mihnyan heh mako toamsêm wah dâng phumma, dihiaknya ma hun ekapa moatkoh rãng chienwah.

¹⁰Ephumma Jon khopa phâtek khenko thahdoak katwah.

¹¹Khophang pa wankhoang ko thien lahma dihiaknya ko kohwah, ngale dihiaknya pumma ate nyong nâng katkohwah.

¹²Jon dijunte heh hûlahma ate mangpa pechhoan lahma ruchhoan wah; erediko thinma Jisu nâng thôkoh wah.

¹³Jisu ma Jon nginpa chohtat diko, erethe kowah khôankhoma atelolo mihnyan lesongthe nâng chhoanwah. Mihnyan hehma arepa chohtatwah, Ephumma thin hahpa phethien lahma dakhoam lemma Jisu diko junchhoan wah.

¹⁴Jisu khôankho kowah loatkhôam ko, mihnyan heh jahmõang chohkhe wah, phumma thinnâng atema nyahrãng mînchen wah, ngale khun atamte heh atema mesiet wakwah.

¹⁵Erejâ rangjâ thahko ate dijunte heh ate tânâng hûlahma ngatwah, “San nyahrãng lâhemtah, ngale aretheko mihnyan min hênjô songmah. Are mihnyan heh chienchhoan eko, hahdaang hehnâng chhoan lahma thin dedema phhekchhah chenri chhah chhoanwak a.”

¹⁶Jisu ma dânthâng wah, “Thin nekchen chhoan eka, nema chenli komin phhekchhah liwah koh en!”

¹⁷Thinma dânthâng wah, “Ninâng bankên wanbangâ ngale ngah lanii loloba etonghi”

¹⁸Jisu ma ngatwah, “Ereheh nganâng wênkohha,”

¹⁹Atema mihnyan hehnâng hinkhohko tongen ngama chienwah; erediko atema bankên wanbangâ ngale ngah lanii pa semlahma rangkhethung nâng sûwên lahma Joban nâng dangkoh a ngalahma rangsoam wah. Erediko atema bankên pa chhupsiet lahma ate dijunte hehnâng kohwah, ngale ate dijunte hehma mihnyan hehnâng phênkohwah.

²⁰Anga ngama phoatphoat phhekchhah wah. Erediko dijunte hehma abâ achâ heh echhi phânii chõngchõng khôantôan wah.

²¹Erekowah phhekchhah tah mihnyan heh dihiak ngale leta lechhih heh leweih thangma hahjat bangâ dângwah.

²²Erediko Jisu ma dijunte heh khôankhoko chhangthuk lahma josi rankanâng dânwânglâ thukwah, ngale mihnyan han hehmin chienchhoan wah.

²³Mihnyan heh chienchhoan diko, hahhokho nâng wãng lahma atelolo ma rangsoam wah. Sanhêmthah komin eretheko Jisu atelolo dângwah;

²⁴Ngale ere sanpoat phumma khôankho pa ataangnâng josi mongtang nâng pôngpông junko jowakma ditwak lahma dângwah.

²⁵Rangkhahkho wanrem ngale wan erok sanpoat tôko, dijunte heh tânâng Jisu jokhohma khôamhok wah.

²⁶Jo-khohko khoam lahma kheko, thin patrit rewah, ngale chei nungma, “Arepa mihdâpha khe eki!” ngama rakwak wah.

²⁷Jisu ma thinnâng lemlienma rânjab lahma ngatwah, “Hungdongsiet en!” “Ngae, nekchei en!”

²⁸Erediko Piter ma dânjabwah, “Teso, linlin nang medang oko, ngamin jokhohma nang tânâng khoamka thukhang.”

²⁹Jisu ma dânthâng wah, “Karoo!” Ephumma Piter khôankho kowah jâkhoam lahma jokhohma Jisu tânâng khoamkat wah.

³⁰Phumma atema pôngdong pônghok khelahma chei rewah, ngale ate joko lûmjâkat wah. Ephumma, “Teso pênghang!” ngama Piter raksepwah.

³¹Lemlienma Jisu Piter tâko hûka lahma Atenâng lolahma ngatwah, “Nangnâng dâlem pa atôrîn ne! chenrãngma rinsamtoh a?”

³²Waniinii khôankhoko chhangwãng phumma pôngpông pa jekwah.

³³Erediko khôankho kowah dijunte hehma Jisu nâng soamwah, ngale “Linlin nanga Joban Chha!” ngama Atenâng ngatwah.

³⁴Thinma josi danlahma Ginisarat hahnâng hokwah,

³⁵Enângwah mihnyan hehma Jisu jetloatwah. Ephumma khoanchette mihnyan heh Jisu tânâng siethok kohrãng thin tûm arien diak hehnângmin thinma ngin matchhoan wah.

³⁶Jisu nâng thinma khunte hehnâng nang khetsako sahlothuk mêngo ngama roatsep wah; ngale ate khetsako sahloatte chentô heh khoanchet wah mêwah.