Read Nocte Naga Mathiu 18 Bible Online

Mathiu 18 - Nocte Naga bible

Mathiu 18

¹Ere sanpoatko dijunte heh hûlahma Jisu nâng thôngphâ wah, “Rangkhethung Hahsông theko henpa adongthôan dângmin a?”

²Phumma, Jisu ma letachha wathe roolahma thinmako chepthuk wah,

³ngale atema ngatwah, “Ngama nenâng nginlinlin thôkoh eka, nemin hung arin litletma are letachha rãngrãng ledang kenko, rangkhethung Hahsông thenâng chenthumin leta chohwãngmin.

⁴Rangkhethung Hahsông thenâng adong thôanpa, are letachha rãngrãng atedede hen numnene dangeka ereheh dângmin.

⁵Ngale henma akomin are letachha rãngrãng danglahma ngamînko tãngroo eka, erepa nganâng tãngroo ehang.

⁶“Henma akomin nganâng putedâlemte are arinchha hehwah wathe nganâng putedâlem pa memah phethuk ako, ere mihnyan rãngma ate bohko longdong khhek lahma josiko jâtoakkat peba asen edanga.

⁷Are hahtokkhoh wah mihnyan heh putedâlem mahphe thukthin tongeka pa thinrãngma chentô cheilia! phumma arerãngrãng pa roantangma edanga - rohkomin ere mahphe thukte hehrãngma chentô cheili dângmin a!

⁸“Nedek ba neda ma ne putedâlem pa memah phethuk hènko, erepa thahdoak letma petphe en! nerãngma dektu datu dangletma khope choh peba, dek ada kaniinii thienletma chenthujô lemutthin papwendô nâng khâmrit rãng phekat noma asen edanga.

⁹Ngale nemit ma ne putedâlem pa memah phethuk hènko, erepa loatphe re en! nerãngma mitka dangletma khope choh peba, mit kaniinii thienletma chenthujô lemutthin papwendô nâng khâmrit rãng phekat noma asen edanga.

¹⁰“Jetletma dangen, nema are arinchha thôan hehnângmin thã nekjõ en. Ngama nenâng thôkoh eka, thin nângmin rangkhethung nâng thin ngintatte tonga, ereheh rangkhethung wah nga Wa Joban demko roantangma johtong eka.

¹²“Nema chenroh thonghun eken a, chenjô komin mihnyan wathema ate saak châthe kowah wanthe lâmah phetah? Atema roak ekhu wan ekhupa hahkong khoko phemphhek thukthien lahma, mahkhôam re eka saak wanthepa lemrãng echhoan a.

¹³Ngama nenâng thôkoh eka, chenthu atema erepa mechoh tahko, lemah khoamte roak ekhu wan ekhu noma, mah retah wanthe demko ajahthem rin eroan a.

¹⁴Ererãngrãng nekhu Wa rangkhethung nâng tôngte Joban memin are arinchha hehwah wathe tomin mahphe hunmah.

¹⁵“Nepho nenaa pumma nerãng pap memo ako, ate tânâng kaletma ate chenni nâng theka erepa khesok en. Phumma erepa nechhe tungko lolo huhphen sietmîn en. Phumma atema nang ngin mekep hoko nangma nangpho ba nangnaa pa lâta ngaksiettoh.

¹⁶Rohkomin atema nang nginpa lekep medang hoko, Joban nyapraang nâng raangeka rãngrãng, ‘nang demko wathe ba wanii mihnyan lesiet o, erohkoba wanii warem hâkhi demnâng kaletma ate chentônâng thê eka ereheh loatthôkoh en.’

¹⁷Ngale atema thin nginmin lekep medang ako, chentôpa Asâthem hehnâng thôkoh en, ngale atema Asâthem heh nginmin lekep medang ako, Joban lejette mihnyan ngale thãkho thâte mihnyan heh rãngrãng thinphe en.

¹⁸“Ngale ngama nekhu anga nganâng thôkoh eka: Nekhuma are hahtokkhoh ko chenpa lemothin moatlem a erepa rangkhethung nângmin lemomin, ngale nekhuma are hahtokkhoh ko chenpa moeken a arepa rangkhethung nângmin moatmin.

¹⁹“Ngale ngama nenâng ademin thôkoh eka: Are hahtokkhoh ko nekhu wah wanii hungjut letma chenni rãng komin rangmesoam enko, rangkhethung wah nga Wa Joban ma erepa nerãng emokohhèn.

²⁰Chenrãngma ngako, chenko wanii ba warem ngamînko khôan eka, ereko ngamin thin demnâng etongang.”

²¹Erediko Piter Jisu tânâng kalahma thôngphâ wah, “Teso, nga pho anaa ma ngarãng pap metham depmo ako, ngama Atenâng depmeroan map kohmin a? Dep engit kohminne?”

²²Jisu ma dânthâng wah, “Dangmah, Dep engit dangmah,” “roakengit dep engit kohmin,

²³Chenrãngma ngako, rangkhethung Hahsông pa arerãngrãng. Rekthenâng lowang wathema ate haaheh demnâng thãpê phênsietmîn rãng phungwah.

²⁴Atema phênsietmîn rãng ngatko, Atenâng hahjat echhi thãpê pête wathe bângsiet hokkohwah.

²⁵Phumma haako ate thãpê pa lanta ngakthumroh ngun aho dângwah, ephumma lowang pumma ate thãpê pa tâthum rãng, ere haako ate tangnyu, ate chha heh, ngale ate chhahkhem wanlem phangtang mihnâng hu ahaarãng senglohma thãpê heh thumhang ngatwah.

²⁶Haa pumma dakuhtho lahma lowang ko roatsep wah, ‘Nganâng mammînchen hang,’ ‘ngama chentôpa ethum e!’

²⁷Lowang pumma Atenâng mînchenwah, ngale ate thãpê heh map kohlahma chhoanthuk wak.

²⁸“Erediko ere haapa chhoan lahma ate rãngrãng haa Atenâng châthe thãpê pête chohmînwah. Phumma atema lolahma bohko phiet lahma, ‘ngawah thapê pêthangpa ngakthum ehang!’ ngama ngatwah.

²⁹Ephumma ere haa pumma khupjup lahma Atenâng roatsep wah, ‘nganâng mammînchen hang, ngama chentôpa ethum e!’

³⁰Rohkomin, atema mapkohmah; mapkoh noma, thapê heh phangtang mata tathum phâtek nâng sekwah.

³¹Chenthu haa ahan hehma chenni dangeka arepa khelahma, thin nyahrãng hungchhih lahma lowang tânâng wãng lahma chentôpa thôkoh wah.

³²Ephumma ate haapa roolahma ngatwah, ‘Nanga sekhothôan haa! nangma roatsep junko ngama nangwah thapê heh phangtang map lâkohtih.

³³Ngama nangnâng map kohtih rãngrãng, nang memin nang rãngrãng haako mapkohli dangmah tohne.’

³⁴Ephumma lowang pumma nyahrãng rinkhah lahma ere haapa Atenâng thapê heh mata tangak thum phâtek nâng sek lahma chêmsiet wah.”

³⁵Ngale Jisu ma jekthô wah, “Nememin nepho anaa hehnâng nehung khenma maplekoh kenko, rangkhethung wah tôngte nga Wa memin nenâng eroh ehôanhèn.”