Read Nocte Naga Mathiu 19 Bible Online

Mathiu 19 - Nocte Naga bible

Mathiu 19

¹Chenthu Jisu ma are nginpa thôkoh diko, Galili wah chhoan lahma jordanjo ranka wah Judia diaknâng katwah.

²Loangchhang dongpa ate diko junkhoam wah, ngale Atema eretheko mesiet wakwah.

³Farasi khuthe hûlahma ate bukritthuk hunlahma Atenâng thôngphâ wah, “Nãng Niem junko, tangwa ma ate tangnyu pa atema chenni junko chiakphe huneka, erejunko tachiakphe ale?”

⁴Jisu ma dânthâng wah, “Joban ma rang ahah bânghôan thuko mihnyan pa dihiak ngale dela hôanwah, ngama Joban nyapraang nâng raang ekapa nema mathat chohweihne?

⁵Ngale Joban ma ngatwah, ‘Are junko tangwa ma ate nyong awa thinphe lahma ate tangnyu demnâng johroam sôngmin, ngale wanii pa phoangtherãng dângmin.’

⁶Erohwah thin a wanii dangtumah, wathe lâdangtah. Joban ma chenpa roapsiet eka, erepa mihnyan ma lephan sietmin.”

⁷Phumma Farasi hehma atenâng chhienwah, “Eroh medang ako, Mosa ma kohwah ate Niem junko tangwa ma ate tangnyu ko chiakphe nyapraang raang kolahma chenchien chhoan a, ngama chenrãng ngatwah a?”

⁸Jisu ma dânthâng wah, “Nenâng hethô pa alat dângjun ko Mosa ma ne tangnyu tachiakphe en ngama ngatwah. Rohkomin rang ahah benghôan thuko eroh ledangwah.

⁹Ngama nenâng thôkoh eka, henma komin ate tangnyu mihdela demnâng kaamchhih moatjun wah ledang thangma chiakphe lahma tangnyu ahan methe ngakkep ako, ere thêkep reka dihiaknyu demko kaamchhih lâmotah.”

¹⁰Ate dijunte hehma atenâng ngatwah, “Tangnyu tangwanii are ngin junko lolo tâchiakphe mînmin ngama medang ako, lechêm kepmîn peba asen.”

¹¹Jisu ma dânthâng wah, “Are hethô ekapa anga ngama takepmah, Joban ma henhen nâng koh eka erehehma loloba takep eka.

¹²Chenrãngma ngako mihnyan nâng mâmâ jat apat junko dihiak lekep thangma tôngte hongeka: wawathe pa achhat mejû lekepjat hongchha eka; wawathe pa mihnyan hehma dihiak lekepte dangthuk eka. Ngale wawathe pa rangkhethung Hahsông rãngma sênrãngma lekep thangma tongwak eka. Are niem pa chente ma takep eka erehehma chenkep a.”

¹³Mihnyan khuthema thin chhuchha heh Jisu tânâng ate dekma sahlo lahma rangsoam koh rãng siethok wah, phumma dijunte hehma mihnyan hehnâng ritngat rewah.

¹⁴Jisu ma thinnâng ngatwah, “Nekjek tangen, letachha heh ngatânâng chenwãngra, chenrãngma ngako rangkhethung Hahsông pa are letachha rãngrãng heh thiak.”

¹⁵Atema letachha heh khoko dekma sahlo lahma chienchhoan wah.

¹⁶Rekthenâng mihnyan wathe Jisu tânâng hûlahma atenâng chhienhok wah. “Hethôte,” “ngama roantang roanjêng lerii roandông chohrãngma chenni moatlemsen moatmin a?”

¹⁷Jisu ma dânthâng wah, “Nganâng chenpa moatlemsen moatthin a erepa chenrãngma chhien ehanga?” “Asenpa wathe loloba tonga. Nangma roantang roanjêng lerii roandông chohhun medang oko, Joban hôkum heh phangtang kep o.”

¹⁸Mihwa pumma dânthâng wah, “Joban hôkum heh chenheh a?” Jisu ma dânthâng wah, “Mih nekritphe, mihdihiak demnâng kaamchhih nekmo; ahuh nekre; mihnâng ledangli nâng neksekham;

¹⁹Nang nyong nangwa rancheichei dango; ngale nang kêanâ wah mihnyan hehnâng nangdede phoangko hunrii eko rãngrãng hun o.”

²⁰Techhuwa ma dânthâng wah, “Are chentô hôkum heh ngama kepkangjû” “Are leko ngama lihân chenni moatthin tongtûa?”

²¹Jisu ma atenâng ngatwah, “Nanga rongrup ngenâng asen dânghun medang oko, chhoan lohma nang chhahkhem chentôpa senglohma ngunpa tangchhih hehnâng koh o, ephumma nanga rangkhethung nâng techhu thôan edango; ngale erediko ngakka lohma ngadijun hang.”

²²Chenthu techhuwa ma erengin pa chohtattah diko hungkeke danglahma ngakchhoan wah, chenrãngma ngako atea nyahrãng techhu dângwah.

²³Erediko Jisu ma ate dijunte hehnâng ngatwah, “Ngama nenâng nginlinlin thôkoh eka: Techhu hehrãngma rangkhethung Hahsông thenâng wângpa nyahrãng alat.

²⁴Ngama ademin thethôkoh eka: Techhuwa pa Joban Hahsông thenâng tâwâng noma, ut peba metku polo pumma eta lienlup a.”

²⁵Chenthu dijunte hehma erengin pa chohtatko, thin bârit rewakwah, ngale thinma chhienwah, “Eroh medang ako henkho tâpemin a?”

²⁶Jisu ma thinnâng thongthong sûkat lahma ngatwah, “Arepa mihnyan ma chenthumin letamin, rohkomin Joban rãngma chenjo letathin aho.”

²⁷Erediko Piter ma loatjab lahma ngatwah, “Sûtan” “nima chentôpa thînphethien lihma nang dijun eki. Phumma nima chenni chohmin a?”

²⁸Jisu ma thinnâng ngatwah, “Ngama nenâng nginlinlin thôkoh eka, chenthu roannyan pa mehong tahko, Mihnyan Chhapa ate tôngthin phiakko etonga, ngale ngadijunte nekhu echhi wanii pa, ngademko johtong letma echhi jatnii Isrial mihnyan heh pênmin.

²⁹Ngale henhenma ngarãngma ate hum ahah, pho nya, nyong awa, chhuchha, ngale pitthin jolem heh thînphe eka, erehehma châthe nomemin depjah engakchoh a, ngale roantang roanjêng roandôngmin echohwak a.

³⁰Rohkomin, athângheh ajahthem khekho dangeka heh khedinâng elit danga, ngale athângheh ajahthem khedi dangeka heh khekho elit danga.