Read Nocte Naga Mathiu 22 Bible Online

Mathiu 22 - Nocte Naga bible

Mathiu 22

¹Jisu ma nginthakthô wienkep lahmejô mihnyan heh demnâng jabmînwah.

²“Rangkhethung Hahsông pa arerãngrãng. Rekthenâng lowang wathema ate chharãng nemnyansiet kuhhôan khoakhêm wah.

³Lowang pumma nemnyansiet thinnâng hokrãng bisuntah mihnyan heh roorãng ate haaheh chienchhoan wah, phumma ere mihnyan heh ahok hunwak ho.

⁴Phumma Lowang pumma ate haa ahan hehnâng nginthôko lahma chienchhoan wah: Atema aroh thôkoh en ngama ngatwah, ‘Ngama phhekchhah heh lâta khoakhemtek, ngama leepongdong pemin lâjoattek, ngale chentôpa phangtang lâta khoakhemtek. Nemnyansiet kuhhôan thinko phhekchhah rãng hûren!’

⁵Rohkomin bitangtah mihnyan hehma nâletha thangma mâmâ moatlem nâng choanwak wah: wathepa ate pitnâng katwah, ahan wathepa ate duken nâng katwah,

⁶Ahan hehma bisun hokte haaheh lolahma buh awat relahma ritphewah.

⁷Phumma Lowang pa nyahrãng rinkhah wah; ngale ate haa ritphete mihnyan heh ritphe letma thin hahdaang pa wenma rokphe en ngama ate sipâhi heh chienchhoan wah.

⁸Erediko Lowang pumma ate haa ahan heh khôanroo lahma thinnâng ngatwah, ‘Ngama phhekchhah heh lâta khoakhemtek, rohkomin ngama bisuntek mihnyan hehma arepa chhahrãng punwakmah.

⁹Erohwah noknyu lemdongnâng chhoan letma nema chentô mihnyan chohmîn eken a ereheh phangtang roohuren.’

¹⁰Ephumma haaheh chhoan lahma thinma noknyu lemdongnâng chentô chohmîn eka ereheh phangtang chhih asen mihnyan khoakthe siethok wah; ephumma nemnyansiet kuhhôan humpa mihnyan ma mênchong dângwah.

¹¹“Lowang pumma humkhen nâng wãng lahma mihnyan khôanhutah hehnâng sokwângko nemnyansiet kuhhôankhet lekep thangma hûlahma chohkhe wah.

¹²Phumma Lowang pumma atenâng ngatwah, ‘lemruchha, nemnyansiet kuhhôankhet lekep thangma chenroh jienhu eroa?’ ngama thôngphâ wah. Phumma ere mihnyan pumma chenmin dânthangmah.

¹³Erediko lowang pumma ate haaheh nâng ngatwah, ‘Ate dek ada heh khhek letma rangsâ wah rangnyek khenko petphekat en. Ereko ate pâchupkek lahma seplahma chentonga.’ ”

¹⁴Jisu ma aroh jekthô wah, “Aroo pa ajah rooeka, rohkomin arenpa amãnchha ren eka.”

¹⁵Farasi heh chhoan lahma Jisu atedede jabkhab junko bukrit thukrãng buthi hôanwah.

¹⁶Erediko Farasi hehma thin dijunte ngale Hirot mihnyan hehwah khuthe Jisu tânâng chienkat wah, thinma Jisu nâng ngatwah, “Hethôte, nima jet nanga toangtang ko thôte. Ngale hennâng min adong arin roak atoak weihmoh, erediko mihnyan hehma manga hango, ngamemin lesoang thangma hethô eko, nangma mihnyan hehnâng Joban nginpa toangtangma phoangthôkoh eko.

¹⁷Nangma chenroh thonghun eko erepa ninâng thôkoh tanhi? Nima Roman Chofa nâng thãkho takoh ele takohmih a?”

¹⁸Thinma achhih themawa wak ekapa Jisu ma jetlahma, thinnâng ngatwah, “Ahuhkhoanglep heh! Nema nga chenrãngma thethuk huneha?

¹⁹Thãkho kohthin janngun pa nganâng khesok tanha!” Ephumma thinma Jisu nâng janngun kohhokwah,

²⁰Ngale Jisu ma thinnâng chhienwah, “Arepa hen thhenphanga, ngale arepa henmîn raangeka?”

²¹Thinma, “Chofa thhenphãng ngale atemîn raangeka” ngama dânthâng wah. Ephumma Jisu ma thinnâng ngatwah, “Eroh medang ako Chofa thiakpa Chofa nâng koh en, ngale Joban thiakpa Joban nâng koh en.”

²²Ere mihnyan hehma Jisu nginpa tat lahma bârit rewah; ngale thinma Jisu phethien lahma ngakchhoan wah.

²³Erejâjâ ko, Saduki khuthe Jisu tânâng hûlahma mihnyan pa riichoanwah ngakhinmah ngama ngathok wah.

²⁴Thinma ngatwah, “Hethôte, Mosa ma ngatwah, delawa wathe chha machhama merii ako, atema phethien eka janthoinyu pa ate naa pumma chhachhat rãngma ngakkepmin, phumma ere wanii pumma chhaeka pa rit retahwa chha ngama ngatmin.

²⁵Phumma rekthenâng chhepho waengit dângwah. Phumma khhepho thôan pumma dihiak keplahma chha machhama ritwah. Phumma ate tangnyu pa naako phethien kohwah.

²⁶Phumma medemwa pemin erohjô ritwah, ere diwah pemin erohjô ritwah, ngale chhepho waengitlat eroh thôanrit wah.

²⁷Athôanko dihiaknyu pemin ritwah.

²⁸Phumma chenthu ritte heh ngakhîn jâko, atea hen tangnyu dângmin a? chenrãngma ngako chhepho waengitlat ma ate kepwah.”

²⁹Jisu ma thinnâng dânthâng wah, “Nea nyahrãng athe! Nema Joban nyapraang pa lejet junko arepa jetmet! ngale Joban chaan pemin nema jetmet.

³⁰Chenthu ritte heh mengakhin tahko, thin a rangkhethung wah ngintatte heh rãngrãng dângmin ngale dihiak delamin lekepmîn tumin.

³¹Aritte heh ngakhîn junma Joban ma nenâng thôkohthen pa nema mathat chohweihne? Joban ma ngatwah,

³²‘Nga a Abraham Joban, Isak Joban, ngale Jakob Joban.’ Atea ahînte heh Joban, aritte heh Joban dangmah.”

³³Chenthu loangchhang pumma erepa chohtat phumma, Jisu ma hethôeka junko thin bârit rewakwah.

³⁴Jisu ma Saduki heh jienchhiak pa Farasi hehma tatlahma, thin aroamma chohmîn wah,

³⁵Thinkhuchhang wah Niemarang hethôte wathema Jisu bukritthuk rãng atenâng ngin chhienwah.

³⁶Atema chhienwah, “Hethôte, Mosa Niem wah chenpa adongthôan a?”

³⁷Jisu ma dânthâng wah, “ ‘Nang Teso Joban nâng nanghung nangrñ phangtang kohlohma hun o, ngale nangju amoangmin phangtang koh o, erediko nangchaan phangtang kohlohma hun o.’

³⁸Are hôkum pa adongthôan ngale alemthôan hôkum.

³⁹Are dikowah wanthe nyahrãng alemli thôan hôkum pa arepa: ‘Nangdede nâng hunriieko rãngrãng mihhan nângmin eroh hun o.’

⁴⁰Mosa Niem phangtang nâng ngale mõng hehma hethôeka heh are hôkum junko tuta jôba hethôeka.”

⁴¹Farasi khuthe aroamma khôan poatko Jisu ma thinnâng thôngphâ wah,

⁴²Nema Misaia junma chenroh thonghun eken a? Atea hen Chhuchha a? “Atea Devit Chhuchha” ngama thinma dânthâng wah.

⁴³Jisu ma thinnâng chhienwah, “Eroh medang ako,” Devit ma Misaia nâng ‘Teso’ ngama roorãng Juma chenrãng chienwah a? Devit ma ngatwah,

⁴⁴‘Teso ma nga Teso nâng ngaeka: Ngama nangran heh nang daphâ khenko mathien thienkoh are nga dekchahko tongo.’

⁴⁵Phumma, Devit ma atenâng ‘Teso,’ ngama meroo ako, Misaia pa Devit Chhuchha chenroh jiendângmin a?”

⁴⁶Henmemin Jisu nâng chenjô jiendân thangho, ngale erejâ phumma henmemin Jisu nâng chenni nginjô chinchhien tuho.