Read Nocte Naga Mathiu 23 Bible Online

Mathiu 23 - Nocte Naga bible

Mathiu 23

¹Erediko Jisu ma loangchhang ngale ate dijunte hehnâng ngatwah.

²“Mosa Niem pa Niemarang hethôte ngale Farasi heh meba tâthô kohmin.

³Erohwah thinma nenâng chenni thôkoh ehèn a areheh phangtang kepen, ngale erejunko mo en; rohkomin thinrãngrãng nekdangen, chenrãngma ngako thinma chenroh thôeka eroh momah.

⁴Thinma mihnyan heh temko ahênrãng alat ngale alih hênpa henthuk wakeka, phumma ere hênpa tahên rãngma thinma deksu metômin chohtôanpê hunmah.

⁵Thinma chentô moatlem pa mihnyan hehma chenkhehi ngama hunlahma moeka. Thin khowah khhek eka khet ngale thin phhekthem wah khhek eka khet hehnâng sûtan en, Joban nyapraang pa raanglahma khhek eka, sûtan en chentôdông khhek eka, ngale thin khetsa wah sitkhhek eka riisa heh chentôloat thien eka!

⁶Thinma kuhhôanthin nângmin tôngthin senpa hunwak eka, ngale Sanagog nângmin tôngthin senpa châwak eka;

⁷Thinma bôjat nângmin mihnyan hehma thin ranchei nungma rânjab huneka, ngale ‘hethôte’ ngama roohun wakeka.

⁸Phumma nenâng ‘hethôte’ ngama leroomin, chenrãngma ngako, nekhua pho anaa tuta, ‘hethôte’ pa wathe loloba tonga.

⁹Ngale nekhuma are hahtokkhoh ko hennâng min ‘Wa’ ngama leroomin, chenrãngma ngako nekhu rãngma wathe loloba ‘Wa’ rangkhethung nâng tonga.

¹⁰Ngale nenâng ‘lemsênte khhepho’, ngamemin leroomin, chenrãngma ngako nekhurãng ‘lemsênte khhepho’ wathelolo tonga, arepa Krista.

¹¹Nekhu wah henpa adongthôan dângtea erepa nekhu haarãng dângmin.

¹²Hen komin atedede adong dangriieka erepa rînsiet rêmin, ngale hen komin atedede chentô noma rinthôan dangriieka erepa dôngsiet rêmin.

¹³“Niemarang hethôte ngale Farasi heh nekhu rãngma chentô chhih dângmin a! Nea ahuhkhoanglep! Nema mihnyan hehrãngma rangkhethung Hahsông lempa tangsekkoh eken, ngale nededemin ereko wãngmet, erediko eretheko wânghunte hehmin nema wãngthukmet!

¹⁵“Niemarang hethôte ngale Farasi heh nekhu rãngma chentô chhih dângmin a! Nea ahuhkhoanglep! Nema jodong ranka danletma ngale chentô diak akan heh dan reletma ne dijunte rãng dangthuk eken; phumma chenthu ne dijunte rãng meta dangthuk tetko, nenoma dûmnii achhih dangthuk letma nerãngrãng pap wendôko khamrii kathuk eken!

¹⁶“Mitdoak dangletma lemsente heh, nekhu rãngma chentô chhih dângmin a! nema aroh hethô eken, ‘Henma komin Rangsoamhum mînchheh lahma toam mesem ako, atema sekho nâng sem eka; phumma Rangsoamhum khenwah kem mînchheh lahma mesem ako arepa sekwin nâng sem eka.’

¹⁷Nea aba mitdoak! Chenpa adonga, kempa ale, kem sâsiette Rangsoamhum pa adonga?

¹⁸Nema arohmin hethô eken, ‘henma komin Joban nâng chhahkohthin chaammîn chheh lahma toam mesem ako ere toampa sekho nâng sem eka; phumma chaam khohwah thienkoh eka hînhô mînchheh lahma mesem ako arepa sekwin.’

¹⁹Nea nyahrãng mitdoak! Chenpa adonga, chaam khohkowah hînhô pa adong ale, ere hînhô sâsiette chaampa adonga?

²⁰Erohwah chenthu mihnyan pumma chaam mînchheh lahma toam mesem ako, atema chaam ngale chaam khohkowah chentô hînhô heh mînko sem eka;

²¹Ngale chenthu atema Rangsoamhum mînchheh lahma toam mesem ako, atema Rangsoamhum ngale erekowah sôngte Joban mînko sem eka;

²²Ngale chenthu mihnyan ma rangkhethung mînchheh lahma toam mesem ako, atema Joban tôngthin, ngale ere tôngthin kowah tôngte mînko sem eka.

²³“Niemarang hethôte ngale Farasi heh nekhu rãngma chentô chhih dângmin a! Nea ahuhkhoanglep! Nema chentô rangkuh sanha roakweih rongrup pôari, pheru wahra, hehwah Joban nâng thãkho kohhu eken, phumma Mosa Niem kowah alemthôan Niem pa nema momet, mihbab mihbâm ledang, mihnâng mînchen, ngale toangtang ererãngrãng heh nema momet. Ahan heh moatleko nema ereheh bengmoatmin dângwah.

²⁴Mitdoak dangletma lemsente heh! Nema ne koap kowah mitchit pa rephe letma ut pa jokkat eken!

²⁵“Niemarang hethôte ngale Farasi heh nekhu rãngma chentô chhih dângmin a! Nea ahuhkhoanglep! Nema ne wankhoang ngale bâti heh tokkhoh pa sâpa eken, phumma, akhenpa nema mihnâng phetwan letma nyenkep wahheh lolo.

²⁶Mitdoak Farasi heh! Khebengko bâti khenwah heh bângsâ sietmêngen, eredikoba tokkhoh pemin etasâa!

²⁷“Niemarang hethôte ngale Farasi heh nekhu rãngma chentô chhih dângmin a! Nea ahuhkhoanglep! Nea rongma pôhut wah mangruk rãngrãng, tokkhohko sokko sênmõang, phumma akhenko mangrok mangrã sânjâwah lolo.

²⁸Ererãngrãng nema tokkhohko anga nganâng asen khesok eken, phumma nehung khenpa ahuhkhoanglep ngale pap moatlem lolo.

²⁹“Niemarang hethôte ngale Farasi heh nekhu rãngma chentô chhih dângmin a! Nea ahuhkhoanglep! Nema mõng heh rukpa senthemthem hôankoh eken, ngale toangtang mihnyan riitah heh rukpa soangraang letma khoakhem eken;

³⁰Ngale nema ngaeken, nita niwa heh roanko ni dôngwah dângnomeko, thinma motah rãngrãng nima lemo minwah, ngale mõng hehmin leritphe minwah.

³¹Are junko nea ere mõng heh ritphete heh chhuchha jôba ngama loatjab eken!

³²Nekjek en, nete newa hehma bengmo thientah dekmãnpa nema laangmo en!

³³Nea pû! Ngale pû chha jôba! Pap wendôko khâmrit minwah epe e ngama chenroh jienthonghun eken a?

³⁴Ngama nenâng thôkoh eka, ngama netânâng mõng ngale mihnyansen, erediko hethôte mihnyan heh echien hûrâng; phumma nema khuthepa ritphe, khuthepa bãngphakko rittek, ngale khuthepa Sanagog nâng siethû letma buh awat letma chentô hahdaang rupwah ephoang junlo waken.

³⁵Ere toangtang mihnyan senheh ritphe thãpa nekhu khohko chêmchei ehûra, ngale nema toangtang mihnyan Abel ngale Bekaria chha Zakaria nii Rangsoamhum ngale Joban chhah kohthin chaam tungko ritphetet thãpa echoh en.

³⁶Ngama nenâng nginlinlin thôkoh eka: Ere mihnyan heh ritphethã chêmchei pa arerôan wah mihnyan heh khohnâng ehûra!

³⁷“Jeroselem, Jeroselem! Nangma mõng heh ritphe eko, ngale Joban ma nang tânâng nginmatte chienkat era heh longma ritpet eko! Wo nyongma ate chha heh ate rangkhenko rângkhôanwok arãngrãng, ngamemin nang mihnyan heh phangtang ngadekma roapkhit lekma thienrãng chentô thathuntek a, rohkomin nangma eroh mothuk mahhang!

³⁸Ngale erohwah nang Rangsoamhum pa petphe rêmin ngale sekhota rãng edangjâa.

³⁹Ngama nangnâng thôkoh eki, chenthu nangma ‘Teso mînko hokteko Joban ma rangkoh eka’ ” ngama manga nga ekoko nangma nga chenthumin lechoh khetumin.