Read Nocte Naga Mathiu 26 Bible Online

Mathiu 26 - Nocte Naga bible

Mathiu 26

¹Chenthu Jisu ma areheh tâhethô diko, atema ate dijunte hehnâng ngatwah,

²“Nema ajet, jânii diko Adankhoam lokuh dângmin, ngale erediko Mihnyan Chhapa rittekthuk rêmin.”

³Erediko soam aroakte adong ngale khhepho phannang heh soam aroakte adong Kaipas humko aroamma khôanchohmîn wah,

⁴ngale ahuhma Jisu huhlokhhek lahma ritphe rãng thômîn wah.

⁵Thinma ngatwah, “Arepa nãngma lokuh poatko lemomin”, “chenrãngma ngako mihnyan heh rin môangkhah a.”

⁶Jisu Bathani hahwah angêm khoanchette Simon humko dângwah.

⁷Jisu phhekchhah chhah thuko, dihiaknyu wathema longwah hôanwah thòko thãchaantien thòthe kephu lahma Jisu khoko lokkohwah.

⁸Dijunte hehma erepa khelahma rinkhah wah, thinma ngatwah, “Arepa mahto nâng chenrãngma diphe ekoa”

⁹“Are tienpa jahmõang ngunnâng sãnglihma ngunpa tangchhih hehnâng chenkoh mahtihne!”

¹⁰Thinma chenni ngaeka erepa Jisu ma jetlahma, thinnâng ngatwah, “Nema are dihiaknyu pa chenrãngma sekham eken a? Atema arepa ngarãngma asenli moeka.

¹¹Nedemnâng tangchhih heh roantangma echoh en, phumma nema nga roantangma chohmahha.

¹²Atema ngaphoangko tienma lokkoh ehangpa ngabînjâ rangwo rãng moeka.

¹³Ngama nenâng nginlinlin thôkoh eka, rangkhenko chenriang thenângjô akomin are nginkongsen pa phoangthôko, atema chenni moeka erepa ate thônghunrãng thômin.”

¹⁴Erediko echhi wanii dijunte kowah wathe - ate mînpa Juda Iskarot - pa soam aroakte adong tânâng wângwah

¹⁵ngale atema thôngphâ wah, “Ngama nenâng Jisu melothuk ako nema nganâng chenni kohha?” Thinma roakrem janngun weihlahma Juda Iskarot nâng kohwah.

¹⁶Ere diphumma Juda Iskarot ma thinnâng Jisu loatthukrãng sanpoat senpa lemsokwah.

¹⁷Wichhi lesak pheban phek lokuh khebeng jâko dijunte heh Jisu tâko hûlahma atenâng thôngphâ wah, “Nima nangrãngma Adankhoam lokuh phhekchhah pa chenriang nâng khoakhemkoh ea?”

¹⁸Jisu ma thinnâng ngatwah, “Hahdaang kowah wathe mihnyan tânâng wãngen”, “Ngale atenâng thôkoh en: ‘Hethôte ma ngaeka, nga sanpoat pa lâhûtha; nga ngale ngadijunte heh nanghumko Adankhoam lokuh pa kuhmin.’”

¹⁹Jisu ma chenroh thôkotah a eroh dijunte hehma Adankhoam lokuh phhekchhah pa khoakhêm wah.

²⁰Rangjâthah phumma, Jisu ngale ate dijunte echhi wanii pa phhekchhah chhahrãng tôngwakwah.

²¹Phhekchhah chhahthuko Jisu ma ngatwah, “Ngama thôkoh eka, nekhuwah wathema nga echen esengha.”

²²Dijunte heh nyahrãng hungke lahma wathe diko wathema atenâng thôngphâ wah, “Teso, nangma nganâng ngaehanga?”

²³Jisu ma dânthâng wah, “henma ate bankên pa nga demnâng johrûm phhekkat ehanga erepumma echen esenghang.

²⁴Joban nyapraang nâng chenroh raangeka eroh Mihnyan Chhapa eriia, rohkomin henma Mihnyan Chhapa chensãng eka ererãngma chentô chhih dângmin a! Ere mihnyan rãngma ate lechêm hongchha peba asen dângmin wah!”

²⁵Chen asãngte Juda hongjab lahma chhienwah, “Hethôte, nangma nganâng lenga ehanga?” “Nangma lâpun jabtoh,” ngama Jisu ma dânthâng wah.

²⁶Thin phhekchhah chhahthuko, Jisu ma bankên chhupthe toanlahma Joban nâng dangkoh a ngat rangsoam lahma chhupsiet lahma ate dijunte hehnâng kohwah. Atema ngatwah; “Thaha ngale phhek en,” “arepa ngaphoang.”

²⁷Erediko atema bâti toanlahma Joban nâng dangkoh a ngat rangsoam lahma thinnâng kohwah, atema ngatwah, “nekhu chentôma arepa jok en,”

²⁸“arepa ngahei, areko Joban wah toamsemwin, ngahei pa ajahthem mihnyan heh pap mapkoh rãng hongeka.

²⁹Ngama nenâng thôkoh eka, Ewa Hahsông theko nedemnâng angurti anyan maroam roamjokko, ngama arepa lethe ngakjok tumin.”

³⁰Erediko thinma rangsoamsê selahma Oliv hahho nâng wângwakwah.

³¹Erediko Jisu ma thinnâng ngatwah, “Thejâ rangpen nekhu phangtang huhchhoan letma ngalolo ephethienha, chenrãngma ngako Joban nyapraang nâng ngaeka, ‘Joban ma saaksoktepa eritphea, ngale saak chhangpa mâmâ phânchhoan ephan chhoan a.’

³²Rohko-min nga ngakhîn diko, nga nemako Galili nâng ewãngla ang.”

³³Piter ma loatjab lahma Jisu nâng ngatwah, “Ahân hehma phangtang mejô mephethien hokomin, ngama nang chenthumin phethienmih!”

³⁴Jisu ma piter nâng ngatwah, “Ngama nangnâng thôkoh eki, thejâ rangpen wowen mako, nangma nga jetmahhang ngama ditrem enga hang.”

³⁵Piter ma dânthâng wah, “Nga nang demnângjô mejohrii ekomin eroh chenthumin jabmek!” Ngale dijunte ahan hehmemin mãnthe ngatwah.

³⁶Erediko Jisu ate dijunte heh demnâng Gathemani theko wângwah, ngale atema thinnâng ngatwah, “Nga ire theko wãnglekma rangsoam wângthuko, ne areko tongla en.”

³⁷Ate demko piter ngale Zibidi chha wanii johsietwên wah. Ereko Jisu nâng hungchhih chêmchoh hokwah,

³⁸Ngale atema thinnâng ngatwah, “Nga hungkhen wah hungchhih pa atôdông ngajômin lânkhasietroh hûera. Areko tongen ngale nga demnâng met hinhin johdangha.”

³⁹Roanche taangwãng lahma ate thhenpa hahko khupjup katlahma rangsoam wah, “Ewa, meta dangako, are ngawah chêmcheipa rephe kohhang! rohkomin ngama hunkang junko dangmah, nangma chenrohhun eko erejunko chendanga.”

⁴⁰Erediko dijunte warem tâko ngakka tahpa juplek lahma khekatwah; ngale atema piter nâng ngatwah, “Ne warem nga demnâng koantathe tômin met tajoh hintong mahhane?

⁴¹Met hin dangen ngale rangsoam letma tongen, nemin achhihma hungtôanko nekchen jârii eken. Juma mehun akomin, hei angem pa aboan.”

⁴²Eredikomin rekthe Jisu chhoan lahma rangsoam wah, “Ewa are ngawah chêmcheipa leta repheli medang ako, ngama hèn ang, nanghung junko chendanga.”

⁴³Ate wîenngak katkomin dijunte heh juplek lahma tônglâwah; thin a mitkân lahma tatongwak ho.

⁴⁴Eredikomin thin phethien lahma Jisu chhoan lahma lôremrãng mãnthethin pa rangsoam wah.

⁴⁵Erediko dijunte heh tânâng ngakka lahma thinnâng ngatwah, “Nea athângheh min boanjup boantong thune? Sûtan en! Mihnyan Chhapa papi mihnyan heh deknângkoh lâthângtah.

⁴⁶Chepen, chhoan eki. Sûtan en, ngachen asângte mihnyan pa anã!”

⁴⁷Jisu ma nginthô thuko echhi wanii dijunte kowah wathe ate mînpa Juda hokkhoam hokwah. Ate demko soam aroakte adong ngale khhepho phannang hehma mihnyan jahmõang dãng apah demnâng chienhokwah.

⁴⁸Jisu chên asângte pumma mihnyan hehnâng ngatwah: “Ngama chup ekang mihnyan pa nema lem ekenpa. Nema ate lokhhek en!”

⁴⁹Juda Jisu tâko tintin wãng lahma, “salem hethôte”, ngama ngatwah, ngale erediko atema Jisu nâng chupwah.

⁵⁰“Lemruchha sitsiakmo o!” ngama Jisu ma dânthâng wah. Erediko thin loatwãng lahma Jisu loatkhhek wah, ngale rongtêngtêng khhekwah.

⁵¹Jisu demwah wathema ate dãng toanlahma soam aroakte adonghaa nâ jâdoak wah.

⁵²Jisu ma ngatwah, “Nang dãngpa amãnmãnko ngakthien o”, “Henhenma dãng sem eka ereheh dãngnângjô ritmin.

⁵³Ngama Ewa nga pângrãng etaroo ang ngama nema jetmetne, ngale lemlienma atema rangwah echhi wanii ngintatte heh chenta chienkattha?

⁵⁴Phumma ngama eroh meroo angko, Joban nyapraang nâng nga aroh dângmin ngama raang ekapa chenroh toangtang jiendângmin a?”

⁵⁵Erediko Jisu ma mihnyan hehnâng ngatwah, “Nga a mihngoan rãngrãng nema nga loatkhhek rãng dãng apah heh kepletma hûeren a? Rangwo roakweih ngama rangsoam humko tonglekma hethôtek poatko lokhhek mahthani.

⁵⁶Are chentôpa mõng hehma Joban nyapraang nâng raangtah heh toangtang dângrãngma dangeka.” Erediko dijunte hehma ate phethien lahma huhchhoan wah.

⁵⁷Jisu loatkhhekte hehma soam aroakte adong Kaipas, humko Niemarang hethôte, ngale khhepho phannang heh khôan eka chhangko siethokwah.

⁵⁸Piter ataang taangma soam aroakte adong humthakho tôko junhokwah. Ate thakhoko wãng lahma abemte sipâhi heh demko chenroh chendanga ngama jetrãng johtông wângwah.

⁵⁹Soam aroakte adong ngale Jews khhepho phannang hehma Jisu jienritphe rãng atenâng athe chohloatrãng hunwakwah;

⁶⁰Ajahthem mihnyan hehma Jisu lelatnâng mothô khoanglep heh hôngthô hokwah, rohkomin thinma athepa jienchoh loho. Athôanko wanii mihnyan hongchep lahma ngatwah

⁶¹wanii pumma ngatwah, “Are mihnyan pumma ngatah, ‘Ngama are Joban rangsoamhum pa chhihsiet lekma jârem diko amãnmãn tangak hoan ang ngama.’ ”

⁶²Soam aroakte adongpa toanchep lahma Jisu nâng ngatwah, “Are nang lelatnâng jab ekako nangma chenjô dânthângthin ahone?”

⁶³Rohkomin Jisu kihchepchep tôngwah. Eredikomin soam aroakte adong pumma atenâng ngatwah, “Ahinte Joban mînko toamsem lekma nangnâng ngaeki: Ninâng thôkohhi, nanga Joban Chha Misaia ne.”

⁶⁴Jisu ma atenâng dânthâng wah, “Nangma lâpun jabtoh. Rohkomin ngama nekhu phangtang nâng thôkoh eka: Are sanpoat pumma nema Mihnyan Chhapa Achaanthôan Joban dekchahko tonglahma phoamkhohnâng kalahma ekhe en!”

⁶⁵Aroh ngatko, soam aroakte adong pumma ate khetpa khasiet lahma ngatwah, “Joban thãse eko! Nima ahan hâkhi lemtumih! Nangma Joban thãsê pa nima athângheh lâchoh tattih!

⁶⁶Nema chenni thonghun eken a?” “Atea lâthetah, ritphe rêmin” ngama thinma dânthâng wah.

⁶⁷Erediko thinma Jisu thhenko thoakkah ma thoakwak lahma watwah; ngale atenâng watte hehma

⁶⁸ngatwah, “Misaia! nangnâng wattepa hen a, arepa profisi hôantan, jettan nangnâng henma wat ehoa!”

⁶⁹Piter hum thakhoko tongthuko, soam aroakte haa dihiaknya wathe kalahma atenâng ngatwah, “Nangmin Galili wah Jisu demko johdângwah”,

⁷⁰Phumma thinkhu phangtang mako, Piter ma “Nema chenni ngaeken a, erepa ngama jetmek” ngama sâthângwah.

⁷¹Ngale erediko piter thakho kowah chhoan lahma, panlien nâng katwah. Eredikomin, ahan dihiaknya haa wanthe ma piter wienkhe lahma ere thekowah mihnyan hehnâng ngatwah, “Atemin Nazarat wah Jisu demko dângwah.”

⁷²Erekomin piter ma daklahma dânthâng wah, “Ngama toamsem ekang, are mihnyan pa ngama jetmek.”

⁷³Chuthe ritko erekowah chepte mihnyan kalahma piter nâng ngatwah. Thinma ngaeka rãngrãng, “Nangmin ire heh khukowah wathe eta dangthem o,” “Chenrãngma ngako nang jabnyoung pa thin jabnyoung rãngrãng jab eko!”

⁷⁴Erediko piter ma ngatwah, “Ngama toamsem lekma toangtang jabekang! mothô methô angko Joban ma chenchêmsiet hang! ngama ire mihnyan pa jetmek!” Ere rienrienko wowenwah,

⁷⁵Ngale Jisu ma atenâng chenni thôkotah a erepa piter ma thônghun wah: “Wowen mako, nangma nga jetmek ngama ditrem enga hang.” Erediko piter loatchhoan lahma nyahrãng chhihsep chhoanwah.